Infurmaziuns fundadas – e nagin:as pseudoexpert:as da teorias conspirativas

Scolas autas e RTS èn sa mess ensemen ed han sviluppà ina plattafurma per infurmaziuns scientificas.

La crisa climatica, il debachel bancar u mutaziuns da corona – infurmaziuns en quel connex chatt’ins svelt en la rait. Ma tge infurmaziuns derivan da pseudoexpert:as e tgeninas da funtaunas fundadas scientificamain?

Image

Extract da la website Avis d’experts

Cun lur iniziativa «Verified» è era l’ONU s’occupada il 2020 cun il tema da l’access ad infurmaziuns fidablas. Era schurnalist:as che intermedieschan mintga di infurmaziuns èn dumandad:as.

La plattafurma da savida è ina reuniun da las Universitads e RTS

Ina resposta ha sviluppà gia avant diesch onns il «Triangle Azur» – ina reuniun en Svizra franzosa da las Universitads da Genevra, da Losanna e da Neuchâtel cun RTS. Avis d’experts è ina plattafurma da savida.

Entant dispona la plattafurma da var 13’400 contribuziuns da video ed audio davart temas da la scienza natirala e l’ambient, da sanadad e medischina, mund e societad. Sch’ins endatescha per exempel la noziun «clima», cumparan var 550 contribuziuns e 40 expert:as. Betg mo persunas dal fatg da las trais universitads da la Svizra franzosa dattan pled e fatg sin la plattafurma, entant èn da la partida era 34 partenari:as d’autras scolas autas e d’instituts da perscrutaziun da la Svizra. Igl è damai ina collecziun da numerusas contribuziuns academicas che analiseschan e mettan a lieu a moda objectiva eveniments actuals.

«
La finamira è da cuntinuar a meglierar la plattafurma per schurnalist:as. Nus vulain ch’el:las chattian svelt la dretga persuna dal fatg […]»
Agathe Chevalier, la responsabla «Avis d’experts»

La plattafurma da savida è averta per tuttas e tuts, betg mo per schurnalist:as, ed ella vegn optimada cuntinuadamain: «La finamira è da cuntinuar a meglierar la plattafurma per schurnalist:as. Nus vulain ch’el:las chattian svelt la dretga persuna dal fatg, pertge che bler:as sa crain d’esser ina tala», declera la responsabla Agathe Chevalier en il rom d’ina dieta da l’Iniziativa per l’innovaziun en las medias. 

Il proxim pass è il project per il futur «CompaSciences». Per mintga tema u per mintga noziun duai ins survegnir in’analisa tgi che ha discurrì u scrit davart il tema e tgi che perscrutescha en quel connex. En pli duain far part da la plattafurma nov:as expert:as e perscrutad:ras. Il project duai vegnir lantschà l’avust 2023 ed ha la finamira da concepir a moda anc pli attractiva la plattafurma da savida. 

Infurmaziuns fidablas quellas èn centralas per la democrazia en Svizra

La SRG SSR s’engascha per infurmaziuns fidablas, pertge che quellas èn centralas per la democrazia en Svizra.

Ella fa quai tant cun partenadis e cooperaziuns externas sco era cun ses program. 17 pertschient da las contribuziuns en las unitads d’interpresa da la SRG SSR sa deditgeschan a la furmaziun – temas da la scienza, per exempel da la medischina, da la fauna e da la natira, da l’economia e da la protecziun da consument:as, da l’istorgia, da l’art, da las medias, da viadis e da la cultura.

Henriette Engbersen, zercladur 2023

«Nus faschain program cun uffants per uffants»

Reportaschas d'uffants e novitads per la stanza da scola cuntanschan era blers uffants che vegnan strusch en contact cun novitads ed ellas promovan lur cumpetenza da medias.

Uffants davos la camera: il Minisguard

En l'emissiun Minisguard da RTR mainan las scolaras ed ils scolars reschia: els defineschan ils temas, fan retschertgas, filmeschan e taglian. Uschia emprendan els era da metter en dumonda criticamain las infurmaziuns e da parter ellas a moda responsabla.

Newstest.ch – in autotest digital per promover la cumpetenza mediala

La dischinfurmaziun è ina da las pli grondas sfidas dal temp dad oz. La SRG SSR lantscha perquai ensemen cun l'uniun Politools, l'institut da medias da l'associaziun dals editurs MEDIAS SVIZRAS e la fundaziun Mercator Svizra la pagina-web newstest.ch. L'autotest digital duai rinforzar las cumpetenzas medialas e gidar per far frunt a la dischinfurmaziun.