In cudesch d'uffants cunter fake news

Scolar:as da la scola professiunala sviluppan lur atgna idea da fatschenta en il rom dal program d’emprender «myidea». A chaschun da la concurrenza «My Challenge» ad Olten vegn surdà per l’emprima giada in premi per il meglier project cunter fake news. La SRG SSR sustegna quest premi per il meglier project en la categoria «Fake News».

La tensiun è gronda en il center da cultura bain plain ad Olten. Il setting sumeglia quel da la show da televisiun «Höhle der Löwen», pertge che era qua vulan las participantas ed ils participants persvader il team d’expert:as da lur idea. Per il final ad Olten èn sa qualifitgads en tut nov projects en il rom dal program d’emprender «myidea». Var 30 scolar:as da tschintg scolas professiunalas da l’entira Svizra han elavurà e concretisà lur ideas da fatschenta sur pliras emnas. Ussa survegnan ellas ed els in coaching professiunal per lur pitch sin tribuna, e quai da spezialist:as da cussegliaziun per start-ups. Tuttas e tuts vulan numnadamain persvader la giuria da lur idea da fatschenta ed uschia gudagnar l’emprim premi en lur categoria. Ina da las categorias sa deditgescha al cumbat cunter fake news e vegn sustegnida da la SRG SSR sco partenaria.

«
Per nus sco SRG SSR èsi fitg impurtant che bunas ideas per cumbatter fake news vegnian derasadas en l’entira populaziun. Questa concurrenza cun projects da scolar:as da scolas professiunalas è per nus spezialmain impressiunanta.»
Henriette Engbersen, Public Value SRG SSR

Igl è l’emprima concurrenza svizra che premiescha scolar:as da scolas professiunalas per lur ideas en la categoria «Fight Fake News».

Il video da l’occurrenza ad Olten.

La categoria tutga in gnerv dal temp, da quai è persvas er il mainafatschenta dal Center svizzer per agir e pensar tenor princips d’interpresa (szUDH) Rolf Schmid: «Fight Fake News è in tema extrem impurtant e central en il temp dad oz.»

Image

Il mainafatschenta dal szUDH Rolf Schmid durant ses pled d’avertura.

Ils trais projects finals mussan co ch’ils giuvenils vulan far frunt a la dischinfurmaziun. E perquai «tribuna libra» per:

«Die kleinen Detektive und der Nachrichtenschwindel» – in cudesch illustrà davart fake news (1. plaz)
«
Sco collavuraturas e collavuraturs da canortas d’uffants vesain nus ch’ils uffants èn gia fitg baud activs en las medias socialas e vegnan perquai savens en contact cun fake news.»
Sven Känzig, finalist

Cun in cudesch illustrà dad els sezs vulan Thalia Mendonca Freitas e Sven Känzig, che frequentan la scola professiunala da sanadad e fatgs socials ad Olten, infurmar uffants tranter 5 e 10 onns davart fake news. A basa da sias experientschas da lavur declera Freitas: «Per famigliarisar ils uffants cun temas specifics lavurain nus savens cun cudeschs da maletgs. Per sensibilisar ils pitschens era per il tema da fake news avain nus decis d’integrar tut las infurmaziuns necessarias en in cudesch illustrà.»

Image

Thalia Mendonca Freitas e Sven Känzig.

Las gruppas en mira èn en in’emprima fasa las canortas d’uffants, las scolinas e las scolas primaras dal chantun da Soloturn. Freitas e Känzig, che lavuran tuts dus en canortas d’uffants, èn persvas da lur idea, perquai ch’i na dat tenor els nagut sumegliant en las regiuns germanofonas, ed il problem da la dischinfurmaziun cumenza gia en la vegliadetgna prescolara. Cun lur cudesch vulessan els svegliar l’interess dals pli pitschens en nossa societad per quest tema e motivar els da metter en dumonda criticamain las chaussas.

L’idea da fatschenta da la scolara e dal scolar da la scola professiunala persvada era la giuria ed uschia gudogna il cudesch da maletgs l’emprim premi en la categoria «Fight Fake News».

Campagna d’infurmaziun «Klartext» (2. plaz)
«
La finamira: dar a giuvens umans in access pli simpel e quotidian ad infurmaziuns fidablas.»
Stephanie Heckers, finalista

Pussibilitar da rumper or da l’atgna borla d’opiniuns e sviluppar in’opiniun clera e basada sin fatgs davart temas actuals – quai vulan las duas finalistas cun lur plattafurma allesklartext.ch. L’idea da las duas absolventas da la Scola d’art applitgà a Son Gagl è gia preschenta sin Instagram.
Las duas scolaras Stephanie Heckers e Yasmine Secka èn persvasas: «Sch’ils giuvenils consumassan damain fake news e dapli medias da qualitad, fissan era lur discussiuns bler pli cleras ed interessantas.»

Image

Stephanie Heckers e Yasmine Secka (da dretga a sanestra) respundan a dumondas da Georg Berger, il president dal szUDH, davart lur project.

Stephanie di davart sia proposta per cumbatter fake news: «Nossa campagna d’infurmaziun consista d’ina plattafurma emplenida cun videos curts e captivants da schurnalist:as giuv:nas che infurmeschan a moda fidabla davart in tema.»

L’idea da promover il dialog tranter giuvenils e schurnalist:as giuv:nas ha cuntanschì il segund plaz en la categoria 2 «Fight Fake News».

Campagna d’infurmaziun «Wahrzeichen» (plaz 3)
«
Il pli grond privel da fake news è ch’ina societad po vegnir dirigida a bainplaschair, sch’ella crai questas infurmaziuns sbagliadas.»
Vincent Gehl, finalist

Il segund team da la Scola d’art applitgà da Son Gagl ha elavurà in manual 3D cunter fake news: Denken, Dahinter schauen, Durchblicken.

Era las finalistas Misa Tanner e Giulia Becce ed il finalist Vincent Gehl èn persvas che la ristga da crair fake news è spezialmain gronda tar giuvenils, perquai che bleras e blers dad els na consumeschan betg cuntegns schurnalistics.

Image

Vincent Gehl retschaiva il premi per ses team da Henriette Engbersen (SRG SSR).

Perquai vulan els agir e sensibilisar per il tema fake news. Per quest intent han els creà in «segn caracteristic» animà e tridimensiunal – in segn d’exclamaziun che sa mida en in segn da dumonda, sch’ins volva el. «Davos mintga novitad (segn d’exclamaziun) stat er in segn da dumonda: mintga infurmaziun duess pia era pudair vegnir messa en dumonda criticamain.»
Il cuntegn da coc da la campagna èn il manual 3D ed ina pagina-web cumplessiva cun nundumbraivels quizs per differentas gruppas en mira che duain intermediar a moda ludica infurmaziuns davart novitads e fake news.

Er a la giuria plascha l’idea fitg bain ed ella cusseglia d’approfundar vinavant il concept. Il team cuntanscha il 3. plaz.

Francesca Guicciardi, mars 2024

Program d'emprender«myidea»

In pensar critic ed ina cumpetenza mediala èn indispensabels per ina democrazia directa. Perquai ha la SRG SSR collavurà sco partenaria cun il Center svizzer per agir e pensar tenor princips d’interpresa (szUDH). La finamira dal program d’emprender«myidea» è da dar a tut las scolaras ed a tut ils scolars da las scolas professiunalas las medemas schanzas e la chaschun d’acquistar cumpetenzas per agir tenor princips d’interpresa. «La SRG ed il szUDH han interess sumegliants. Perquai fai senn da sustegnair cuminaivlamain la furmaziun professiunala da basa dals giuvenils», di il president dal szUDH Georg Berger. «Gist cura ch’i sa tracta da nizzegiar in pensar critic en situaziuns realas.»

Commentari

«I vegn consumà quai che l'algoritmus propona»

Tge cumpetenza mediala ha la giuventetgna e co s'orientescha ella en il spessom da novitads sin Instagram & co.? Tge rolla gioga en quel connex la SRG SSR? Fiona Fehlmann ha fatg retschertgas davart quest tema e declera pertge che cuntegns da la SRG SSR èn dumandads cunzunt en temps da crisa.

Cotschen, oransch u verd: in'ampla per fake news

Scolar:as da la scola professiunala spezialisada emprovan da sviluppar instruments per controllar la vardaivladad da novitads. Eine Initiative unterstützt von der SRG.

Infurmaziuns fundadas – e nagin:as pseudoexpert:as da teorias conspirativas

Scolas autas e RTS èn sa mess ensemen ed han sviluppà ina plattafurma per infurmaziuns scientificas.