Newstest.ch – in autotest digital per promover la cumpetenza mediala

La dischinfurmaziun è ina da las pli grondas sfidas dal temp dad oz. La SRG SSR lantscha perquai ensemen cun l’uniun Politools, l’institut da medias da l’associaziun dals editurs MEDIAS SVIZRAS e la fundaziun Mercator Svizra la pagina-web newstest.ch. L’autotest digital duai rinforzar las cumpetenzas medialas e gidar per far frunt a la dischinfurmaziun.

L’augment da la massa d’infurmaziuns sin tut las plattafurmas pussaivlas fa adina pli grev per las utilisadras ed ils utilisaders da differenziar tranter reclama pajada, contribuziuns schurnalisticas e fake news derasadas a posta. La dischinfurmaziun è perquai ina da las pli grondas sfidas dal temp dad oz.

Ina cumpetenza mediala rinforzada gida da far frunt a la dischinfurmaziun e da s’orientar en in mund medial adina pli cumplex. Quest rinforzament è impurtant, sco quai ch’in studi da l’Uffizi federal da communicaziun (UFCOM) ha er mussà il december 2022. Perquai han la SRG SSR Public Value, l’uniun Politools (direcziun dal project), l’institut da medias da l’associaziun dals editurs Medias Svizras e la fundaziun Mercator Svizra lantschà communablamain newstest.ch.

L’autotest digital gida d’examinar e da promover a moda ludica la cumpetenza mediala da giuvenils e creschids. El cuntegna dumondas da tschintg champs che erueschan co ch’ins vegn a frida cun las novitads en l’internet. En la valitaziun vegnan lura mussads meds d’agid e tips per rinforzar l’atgna cumpetenza mediala.

Il newstest porscha in fitg bun access al tema da la cumpetenza mediala. Da quel pon sa sviluppar discussiuns ch’èn fitg decisivas per il schurnalissem, la democrazia e per temas socials en general.
Nadja Burri, scolasta da tudestg, Scola professiunala spezialisada gibb, Berna
Buna purschida per l’instrucziun da medias en scola

Newstest.ch sa basa sin il model der-newstest.de ch’è vegnì sviluppà il 2021 da la fundaziun Neue Verantwortung für Deutschland. Las adattaziuns da la versiun svizra han ins fatg en il rom da l’emprim studi svizzer davart la cumpetenza mediala «Die Medienkompetenz der Schweizer Bevölkerung». L’agentura «nach morgen» è responsabla per la realisaziun tecnica. Il newstest svizzer è actualmain accessibel per tudestg e franzos. Ina versiun taliana suonda proximamain.

«
Il newstest mussa fitg bain quant impurtanta che l’intermediaziun da la cumpetenza mediala è. Grazia a las dumondas vegnan ins conscient ch’i n’è betg adina simpel da valitar tge ch’è in fatg. Tge è reclama pajada? Tge è in’opiniun? Tge èn fake news? E co valitesch jau quai? Tenor mai è il newstest in super tool per mussar a las scolaras ed als scolars pertge ch’igl è relevant da s’occupar da quest tema.»
Janine Surber, scolasta d'istorgia, Scola chantunala da Baden
Partenaris

Davart l’uniun Politools 
L’uniun Politools sviluppa projects a basa da l’internet en il champ da l’analisa politica e da la furmaziun politica (p.ex. l’agid per votaziuns online smartvote). L’uniun ha eruì il 2022, en collavuraziun cun l’Universitad da Berna e la Scola auta spezialisada da Berna, la cumpetenza mediala da la populaziun svizra cun agid d’in studi represchentativ. Quai ha ella fatg cun ina versiun dal newstest adattada per la Svizra. L’UFCOM ha cofinanzià il project da perscrutaziun.

Davart la fundaziun Mercator Svizra  
La Fundaziun Mercator Svizra sviluppa, emprova e derasa ensemen cun different:as actur:as ideas per schliar sfidas actualas. Ella rinforza la societad civila e furma allianzas cumplessivas per iniziar midadas e concepir l’avegnir. Tut quai per ademplir sia visiun – ina societad democratica cun schanzas egualas per tut:tas ed in’ecologia persistenta.

Davart l’associaziun dals editurs MEDIAS SVIZRAS 
L’associaziun dals editurs MEDIAS SVIZRAS è l’organisaziun da la branscha da las interpresas da medias privatas cun l’accent meds stampads e digitals. Ella unescha passa 100 interpresas e commembers associads che edeschan ensemen var 300 gasettas e magazins e porschan differentas plattafurmas da novitads e medias

CONTACT
Post da medias SRG SSR
Edi Estermann
Tel. 058 136 21 21
medienstelle.srg@srgssr.ch

Communicaziuns a las medias, 5.10.2023

Commentari

Cun avatars cunter fake news

Las persunas d'instrucziun grischunas collavuran stretgamain cun Radiotelevisiun Svizra Rumantscha, per che la generaziun giuvna possia s'orientar en la dschungla da medias e far frunt a fake news. Il pli nov project: in studio da novitads virtual.

«Dapi che jau viv a Mexico, sun jau pli svizzer che mai»

Il dumber da las Svizras e dals Svizzers che vivan a l'exteriur surpassa per l'emprima giada la marca dad 800'000 – ed è ussa tuttina aut sco il dumber da la populaziun dal pli grond chantun da la Svizra, il chantun Vad. Per tut quellas e quels che vivan a l'ester rapporta swissinfo.ch dals fatgs politics en Svizra e da quai che occupa uschiglio anc noss pajais. 

Uffants davos la camera: il Minisguard

En l'emissiun Minisguard da RTR mainan las scolaras ed ils scolars reschia: els defineschan ils temas, fan retschertgas, filmeschan e taglian. Uschia emprendan els era da metter en dumonda criticamain las infurmaziuns e da parter ellas a moda responsabla.