Uschia vegn controllada la SRG SSR
Co giuditgeschan instituziuns externas e scienziadas e scienziads la lavur schurnalistica da la SRG SSR? Ina survista da studis scientifics externs.
L’intermediaziun d’infurmaziuns e sia qualitad èn facturs relevants per la purschida da la SRG SSR. Perquai faschain nus regularmain controllas internas. Ultra da la controlla interna è impurtanta era la controlla externa. Co giuditgeschan scienziad:as ed instituziuns la lavur schurnalistica da la SRG SSR? Satisfa la purschida a las pretensiuns da qualitad da perscrutad:ras?
Il Center da retschertga per la publicitad e societad (Fög) da l’Universitad da Turitg publitgescha mintg’onn il «Jahrbuch Qualität der Medien» cun indicaturs actuals davart la qualitad mediala, il diever da las medias, la concentraziun da las medias sco er il svilup dal sistem medial en Svizra. Il 2022 ha la SRG SSR danovamain retschet bunas notas per ses products. Ulteriuras infurmaziuns pudais Vus leger qua.
Qua chattais Vus ina glista da studis relevants che analiseschan la qualitad mediala. Insaquants studis controlleschan exclusivamain la SRG SSR, auters analiseschan las prestaziuns da differentas chasas da medias en Svizra.
«Jahrbuch Qualität der Medien», 2022, Center da retschertga per la publicitad e societad (Fög)
«La pandemia da corona ha influenzà fundamentalmain numerus champs da la societad. Er il schurnalissem è pertutgà. Durant la fasa iniziala da la pandemia hai anc dà indizis per effects positivs sin medias schurnalisticas. Quellas èn stadas fitg dumandadas sco funtaunas d’infurmaziun vardaivlas. Almain a curt termin ha la societad parì da vegnir pli conscienta da l’impurtanza da prestaziuns medialas d’auta qualitad. Mo suenter passa in onn en il modus da crisa è la bilantscha dischillusiunanta. La basa finanziala dal schurnalissem ha patì vinavant durant la crisa.» (Fög)
Quant svizra è la Televisiun svizra? In’analisa da relaziuns structuralas e tematicas en la purschida da program da televisiun da la SRG SSR, 2022, Libra Universitad da Berlin
«La SRG SSR ha reagì sin las discussiuns intensivas davart sia incumbensa sociala ed ha tschertgà cun agid d’enquistas il contact cun la populaziun per sa barattar davart il tema Public Value.»
Rapport da structura, stadi e svilup da la cuntrada da radio e televisiun en Svizra 2015-2020, 2022, Uffizi federal da communicaziun (UFCOM)
«La digitalisaziun transfurma la branscha mediala da fund ensi. […] Il rapport da structura da l’UFCOM illustrescha questa transfurmaziun e sias consequenzas per la cuntrada mediala en Svizra. El rimna datas existentas davart la cuntrada da radio e televisiun en Svizra e vegn actualisà en l’avegnir mintga segund onn.» (UFCOM)
Enquista dal public: valitaziun dal program, 2012-2021, Uffizi federal da communicaziun (UFCOM)
«Quest studi periodic relevescha tenor criteris scientifics l’impressiun subjectiva represchentativa ch’il public svizzer ha da las prestaziuns dals programs da radio e televisiun privats e publics. Las aspectaturas ed ils auditurs giuditgeschan ils emetturs publics e privats ch’els consumeschan il pli savens.» (UFCOM)
Analisas dal program dal radio da la SRG SSR, 2012-2021, Uffizi federal da communicaziun (UFCOM)
«Per il mument sa mida il focus linguistic-regiunal da las analisas scientificas dals programs da radio da la SRG SSR (Svizra tudestga; Svizra franzosa; Svizra taliana e Svizra rumantscha).» (UFCOM)
Analisas dal program da televisiun da la SRG SSR, 2012-2021, Uffizi federal da communicaziun (UFCOM)
«Las analisas scientificas dals programs da televisiun da la SRG SSR vegnan fatgas periodicamain. Tut ils programs da televisiun da la SRG SSR vegnan examinads cun agid d’analisas quantitativas dal cuntegn (enquista cumplessiva).» (UFCOM)
Infurmaziuns falladas, medias alternativas e teorias conspirativas – co che la populaziun svizra vegn a frida cun dischinfurmaziun, 2021, Center da retschertga per la publicitad e societad (Fög)
«Il rapport mussa ils resultats d’ina enquista da la populaziun represchentativa davart la problematica da la dischinfurmaziun en Svizra, dat in inventari da paginas-web e purschidas da social media da medias alternativas e mussa la valur da medias alternativas a maun d’ina analisa assistida dal computer da tut las persunas activas sin Twitter en Svizra.» (Fög)
Resumaziun Digimonitor IGEM 2021, Cuminanza d’interess medias electronicas (IGEM)
«TikTok surpassa Facebook tar la giuventetgna en Svizra. Malgrà la digitalisaziun: televisiun e radio cuntanschan las massas.» (IGEM)
Republik è la marca da medias la pli cumpetenta en Svizra, 2021, Publicom; en quel connex era: La marca da radio la pli simpatica en Svizra 2021
«Cun il studi mediaBrands eruescha Publicom mintg’onn la performanza da marcas medialas en la populaziun svizra. La retschertga 2021 han ins fatg l’avrigl ed il matg. Ella sa basa sin ina procedura da provas represchentativa cun 4’700 persunas da 15-79 onns.» (Publicom)
Analisas dal program SRG SSR online, 2012-2020, Uffizi federal da communicaziun (UFCOM)
Las analisas scientificas da la purschida online da la SRG SSR vegnan fatgas periodicamain. Ellas consistan d’analisas quantitativas dal cuntegn da l’entira purschida online da la SRG SSR.
Monitoring da medias Svizra, 2017-2020. Uffizi federal da communicaziun – UFCOM
«Il monitoring da medias Svizra examinescha las prestaziuns da las medias per la furmaziun da l’opiniun en Svizra e documentescha la relaziun da forzas e raits d’interpresa sin il martgà da medias.» (UFCOM)
Co cuntanscher digital natives en Svizra cun novitads. In studi qualitativ, 2020, ZHAW/UNIL/USI
«Var in terz da las persunas giuvnas en Svizra n’ha nagin u mo pauc interess da novitads (Waller et al. 2019, p. 2). Segund il Jahrbuch Qualität der Medien (Fög 2020, p. 5) è la gruppa da las persunas senza interess per novitads creschida da 21% sin 37% dal 2009 fin il 2020. La cumpart da persunas senza interess per novitads è spezialmain gronda en la gruppa da vegliadetgna dals giuvens creschids (54.6%).» (ZHAW/UNIL/USI)
La qualitad da medias infurmativas svizras en il curs dal temp, 2019, Universitad da Turitg
«Il studi mussa co che la qualitad da las reportaschas da 64 medias svizras è sa midada dal 2015 fin il 2018. Tut en tut sa sminuescha la qualitad da las purschidas examinadas – malgrà la crisa structurala constanta da las medias – mo levamain e betg tut las dimensiuns da qualitad èn pertutgadas tuttina ferm.» (Universitad da Turitg)
