RTR – voll giuven: la giuventetgna surpiglia il program

 RTR è voll giuven: per dus dis surpiglian collavuraturas e collavuraturs tranter 20 e 32 onns il timun da la chasa da medias rumantscha. Ils 5 ed ils 6 d’avrigl realiseschan ellas ed els l’entir program da radio, per exempel cun ina concurrenza tranter duas uniuns da giuventetgna, cun concerts ed auter. Era l’emissiun d’infurmaziun Telesguard dal venderdi saira sco era la pagina online e social media èn en ils mauns da la giuventetgna.

La giuventetgna surpiglia il program

Durant dus dis deditgescha RTR ils programs a la giuventetgna. Realisads vegnan els da giuvnas collavuraturas e da giuvens collavuraturs. Var 33 persunas che lavuran tar RTR èn numnadamain uschenumnads digital natives, han pia sut 30 onns. Ellas ed els vegnan a midar quasi tut en il program da RTR durant quels dus dis. U forsa tuttina betg? Fan giuvnas e giuvens in auter program per la gruppa en mira, sch’els han la pussaivladad da surpigliar il timun? Vegni a tunar pli giuven, frestg e frech? Vegnan ellas ed els era da persvader lur generaziun da consumar lur program?

 

«
Igl è era stà ina sfida da decider tge che nus pudain realisar.»
Carmen Monn, ina da las duas  iuvnas che mainan il project

«Ina da las grondas sfidas è stada l’organisaziun dal persunal. Essan nus propi avunda persunas giuvnas per garantir in program actual ed attractiv per tadlar e guardar?», di Carmen Monn, ina da las duas  iuvnas che mainan il project da «RTR – voll giuven». «Igl è era stà ina sfida da decider tge che nus pudain realisar. Cun nossa schelta essan nus tuttas e tuts dentant fitg cuntents e sperain ch’ella plaschia al public. Igl ha fatg plaschair da survegnir in’invista en la cumplexitad d’in tal project, da  rumper si formats fixs e da lavurar per ina gruppa da persunas che na taidla betg uschè savens radio.»

Image

Giuvnas collavuraturas e giuvens collavuraturs da RTR

Ils schefs e las scheffas laschan maun liber

L’idea davos «RTR – voll giuven» saja stada da surdar la responsabladad a las collavuraturas ed als collavuraturs giuvens, explitga il manader programmaziun da RTR, Valentin Schmed. «Tar RTR lavuran fitg bleras persunas giuvnas ch’èn fitg motivadas, che prestan di per di grondiusa lavur e che han ina massa ideas. Durant quests dus dis pon ellas ed els surpigliar la responsabladad per noss programs e survegnan uschia spazi per lur ideas. Jau sun plain mirveglias quant differentas che nossas emissiuns vegnan ad esser quests dus dis en cumparegliaziun cun il rest da l’onn».

La giuventetgna da RTR

In program da radio variant

Il program da radio da «RTR – voll giuven» cumenza il venderdi da las uras usitadas e finescha cun ina concurrenza tranter duas uniuns da giuventetgna (Dardin cunter Savognin). Guardar la concurrenza pon ins lura sin ils chanals da las medias socialas. Al radio finescha il di cun il DJ da la chasa e cun musica per tuttas e tuts. La sonda cumenza il program da radio a las 08.00, dura dentant fin la saira a las 22.00. En il studio da radio chantan e sunan trais acts rumantschs live per las audituras ed ils auditurs.

Commentari

Agid digital per tatta e tat

Durant ils Hackdays da la SRG SSR lavuran hacker:as di e notg vi dal svilup da trics tecnics. 2023 e tranter auter resultà in accumpagnader online per senior:as.

Pertge che la critica litterara na perda betg sia relevanza

La critica litterara en il dialog cun las ovras – ma era cun il public. Quai è dapi 30 onns l'incumbensa dal «Literaturclub» sin SRF. Dispitar davart litteratura è per la moderatura Nicola Steiner ina part essenziala da la relevanza che la litteratura ha fin oz: «Igl è impurtant da chapir che la litteratura po vegnir legida da maniera fitg differenta.» 

«Für einheimische Produktionen kommt man um die SRG nicht herum»

Wie eine Vereinbarung zwischen der Schweizer Filmbranche und der SRG Kultserien wie «Tschugger» möglich macht.