«Nus faschain program cun uffants per uffants»

Reportaschas d’uffants e novitads per la stanza da scola cuntanschan era blers uffants che vegnan strusch en contact cun novitads ed ellas promovan lur cumpetenza da medias.

«Jau hai prendì cun mai er anc auters chalzers!», cloma Lily. La mattetta da 12 onns deriva da Saanen en la Part Sura Bernaisa ed ella ha in plan concret per oz. I pudess avair blera buglia – qua dovri insatge pli robust che chalzers da gimnastica. Lily vul numnadamain ir en il guaud a cleger bulieus. La reportra d’uffants da SRF è en gir cun il team da SRF Kids per in podcast.
Sin il mund èn enconuschentas var 100’000 sorts da bulieus. Lily enconuscha mo intginas, ma ina noviza cumpletta da cleger bulieus n’è ella tuttina betg. «L’atun vom jau mintgatant cun mia tatta e mes tat», raquinta ella.
Ma co differenziesch’ins in bulieu da tissi d’in bulieu mangiabel? L’expert Ferdinand declera che la savur possia esser in indicatur. «Quel savura sco salata da fritga», constatescha Lily a riend. Ma ins n’al possia betg mangiar, respunda Ferdinand. Chatta il team da SRF Kids tuttina anc insatge per gentar? Qua pon ins tadlar l’aventura da bulieus cun Lily.

La purschida da SRF Kids sa drizza directamain ad uffants tranter 8 e 12 onns. Ils uffants realiseschan u sco Lily lur atgnas ideas en in podcast «SRF Kids Reporter:in» u ch’els emprendan en lavuratoris co ch’ins po transfurmar ideas en contribuziuns per l’emissiun da novitads «SRF Kids News».

Participar activamain – quai stat adina en il center da l’intermediaziun dal plaschair e dal cumportament en contact cun las medias. «Nus faschain program cun uffants per uffants», di Andrea Fehr, manadra da SRF Kids. Quai plascha als uffants, sco che mussan ils resuns: «Il di sco reportra d’uffants hai jau chattà super. Il meglier è stà l’inscunter cun Marco Odermatt.» Salome (10ns)

Mintg’emna cumpara ina nova ediziun dal format da novitads «SRF Kids News». Betg mo ils uffants apprezieschian da pudair contribuir a la producziun dal format, era las persunas d’instrucziun al nizzegian sco med d’instrucziun en las stanzas da scola, di Fehr.

«Las scolaras ed ils scolars han fitg bleras dumondas en connex cun temas actuals. Ellas ed els vesan uschè blera merda sin Tiktok ed autras medias socialas e na pon betg adina metter a lieu il cuntegn. Grazia a ‹SRF Kids News› pudain nus persunas d’instrucziun brigliar.» Raphael Windlin, scolast a Schönholzerswilen (TG)

Uschia cuntanschian las infurmaziuns uffants cun ils pli differents backgrounds – era tals che vegnian uschiglio strusch en contact cun novitads, cuntinuescha Fehr.

Anc bler dapli cuntegns per l’instrucziun en scola porscha SRF school. Quella offerta sa drizza directamain a persunas d’instrucziun e metta a disposiziun ad ellas gratuitamain material d’instrucziun.

Reportras e reporters giuvens plain schlantsch tar la SRG SSR

RTR: Abitas ti en il Grischun? Cun l’acziun pass da vacanzas pos ti visitar la stad il lavuratori da radios da RTR e construir tes agen radio da DAB+.

SRF: Ti faschessas gugent ina contribuziun per SRF Kids sco reportra u reporter d’uffants? Lura t’annunzia per il curs sco reportra u reporter d’uffants. Ti guardas davos las culissas da SRF ed ils profis da SRF Kids ta dattan tips e trics.

Da nov pon persunas d’instrucziun annunziar lur classa per in lavuratori da medias da quatter dis. Las scolaras ed ils scolars emprendan co ch’ins fa in video per «SRF Kids News», co ch’ins retschertga in tema e co ch’ins elavura quel per in’emissiun da novitads.

RSI: Vivas ti en il Tessin ed has ti in’idea per in video? En il studio WeTube da RSI a Lugano stat a disposiziun gratuitamain in studio digital a persunas giuvnas: greenscreens, plazs da montascha e cameras professiunalas – WeTube ha tut quai ch’il cor giavischa.

RTS: Er en Svizra franzosa pos ti far in di da schurnalista u da schurnalist. Co ves jau ch’i sa tracta da fake news? Tge è la magia da tun e maletg? Co tschent jau las meglras dumondas? Tut quai ed anc bler dapli pos ti emprender mintg’onn en ils grondius lavuratoris da RTS.

Las unitads d’interpresa da la SRG SSR – RTR, SRF, RSI e RTS – sustegnan giuvnas creadras e giuvens creaders da medias. Cun apparats professiunals. Cun invistas en il mintgadi da schurnalistas e da schurnalists, da dunnas e d’umens da camera e da profis da las medias socialas. E cun respunder a tut las dumondas en connex cun far medias.

Francesca Guicciardi, matg 2023