Cun avatars cunter fake news
Las persunas d’instrucziun grischunas collavuran stretgamain cun Radiotelevisiun Svizra Rumantscha, per che la generaziun giuvna possia s’orientar en la dschungla da medias e far frunt a fake news. Il pli nov project: in studio da novitads virtual.
Ina damaun da scola nunusitada a Breil: l’entir stgalim superiur po far ina visita virtuala en in studio da televisiun. Cun l’agen laptop tschertgan las scolaras ed ils scolars, en tut var 30, lur avatar preferì e sa rimnan silsuenter en la lounge virtuala. Là emprendan els l’emprim d’enconuscher lur avatar e tge ch’els pon far cun el – in salto qua, in move spezial là. En la stanza virtuala spetgan alura cuntegns impurtants: Co pon ins scuvrir fake news? Tge exempels concrets datti, tge èn las consequenzas?
La visita en il studio virtual è in da plirs projects che Radiotelevisiun Svizra Rumantscha (RTR) porscha per las scolas (vesair la chascha). Per la preparaziun da questa damaun speziala èn stadas necessarias numerusas ponderaziuns e blera lavur da concept. «La dumonda da partenza è stada: tge è service public per giuvnas e giuvens?», declera Flavio Bundi, schefredactur da RTR e responsabel per il project. Ina resposta a questa dumonda saja la promoziun da la cumpetenza mediala. «Nossa finamira è da porscher cuntegns che interessan las scolaras ed ils scolars e da sensibilisar ellas ed els per fake news. Quai è numnadamain ina gronda sfida en noss mund da novitads accelerà. Gist per la glieud giuvna.»
Flavio Bundi, schefredactur da RTR
Sensibilisar a moda ludica
La lounge virtuala correspunda exact al studio da novitads da la SRG SSR en la chasa da medias a Cuira. L’interpresa Bandara, spezialisada sin cuntegns virtuals, ha mesirà or il studio e creà el sco spazi virtual. Ussa spetgan las scolaras ed ils scolars referats, discussiuns, videos, contribuziuns auditivas e graficas ch’ils producents han telechargià ordavant. I dat schizunt ina stanza da medias socialas che vegn adina puspè inundada cun posts per demonstrar l’immensa quantitad da novitads.
La lounge virtuala correspunda exact al studio da novitads da la SRG SSR.
Ivo Fry, scolast dal stgalim superiur a Breil, ha gia visità cun sias classas il studio real. «Esser ina giada en il studio senza far il viadi a Cuira simplifitgescha bler», di el. «La visita virtuala tegna ultra da quai quint dal mund d’experientschas dals giuvenils e sensibilisescha els a moda ludica ed interessanta per lur consum da medias.» Pudair profitar da la cumpetenza schurnalistica e dals exempels concrets da RTR sustegnia las stentas da la scola en quest sectur, di Fry. «Quai è in vair service public.»
Ina nova relaziun cun la chasa da medias RTR
Er il schefredactur da RTR Flavio Bundi vesa avantatgs: «Sper la cumpetenza mediala che nus promovain e sustegnain, creain nus era muments da wow ed ina relaziun cun la generaziun giuvna.» Tals inscunters hajan in effect duraivel. «Quai vesain nus, cura ch’ils giuvenils spluntan pli tard tar nus per far in fufragnadi u in emprendissadi e raquintan exact da tals contacts directs.»
Il stgalim superiur da Breil dat en mintga cas per gronda part resuns positivs davart la visita virtuala en il studio: «A mai hai plaschì da pudair chaminar enturn cun ina figura e schliar incumbensas.» u: «Emprender la materia da scola sco en in gieu da video è cool.» Autras scolaras ed auters scolars pensan gia a la proxima pandemia e beneventassan in’instrucziun virtuala – almain per part. «Jau na poss dentant betg m’imaginar d’emprender mo en quella moda. Ins n’ha nagina persuna da contact directa e nagin na bada, sch’ins taidla u betg.» Las stentas da promover in pensar critic paran gia da purtar fritg, betg mo en vista a fake news.
Las purschidas da RTR per las scolas
Cumpetenza mediala per scolaras e scolars dal stgalim superiur:
En quest lavuratori d’in di produceschan las giuvnas ed ils giuvens atgnas contribuziuns. Els lavuran a moda creativa e discuteschan temas sco fake news, la cumpetenza da participaziun u l’effect da games.
Invista en il mund da las medias per scolaras e scolars primars:
Ils uffants creeschan in’atgna emissiun dad A fin Z, da la planisaziun dals temas sur la retschertga fin a la producziun. Els emprendan d’enconuscher las pli impurtantas reglas schurnalisticas u era da raquintar istorgias a moda creativa.
Emna da project per giuvenils:
Durant quell’emna da project fan las scolaras ed ils scolars atgnas emissiuns. Els defineschan ils temas, fan retschertgas e produceschan. RTR sustegna els e promova la cumpetenza d’applicaziun e da participaziun.
Visita en il studio virtual:
Las scolaras ed ils scolars emprendan en il studio virtual da scuvrir fake news e vegnan sensibilisads a moda ludica per lur consum da medias.
Scuvri qua tut las purschidas pedagogic-medialas da RTR.
Daniela Huwyler, december 2023
