Co che la SRG SSR duai far visibla la diversitad
Co po la SRG SSR represchentar e promover la diversitad da la Svizra? Ils resultats centrals da noss dialog cun la populaziun.
Ils resultats sa basan sin in’enquista represchentativa, in’enquista online, intervistas qualitativas e lavuratoris. En total avain nus ans barattà il 2019/2020 cun passa 8900 persunas areguard la contribuziun da la SRG SSR a la diversitad.
Rinforzar las atgnadads regiunalas e naziunalas
Da quel emprim barat è resultà in cler votum: «Las atgnadads culturalas e linguisticas da las singulas regiuns ston esser preschentas e vegnir cuvridas en il program» – quai considerescha la maioritad sco indispensabel per che la SRG SSR possia contribuir a la promoziun da la diversitad. Correspundentamain duai ella represchentar e render visibla la diversitad da la Svizra – tranter auter las quatter linguas naziunalas. Quest resultat principal correspunda a la valitaziun da persunas giuvnas: en otg lavuratoris che nus avain realisà il 2022 en tut las parts dal pajais en il rom dal tema da focus «La giuventetgna e la SRG SSR» sa manifestescha l’interess da bler:as scolar:as per las ulteriuras regiuns linguisticas. Il medem mument occupa il pli fitg quai che capita en lur vischinanza. Las scolaras ed ils scolars accentueschan per exempel ch’els s’interesseschian il pli fitg per novitads che tematiseschan lur regiun e lur realitad en la vita quotidiana.
Ils resultats 2019/2020
La purschida da la SRG SSR duai esser diversa
En il rom d’intervistas qualitativas avain nus fatg il 2019 dumondas a la populaziun sco er a represchentant:as da la societad civila, da la branscha da medias, da l’economia e da las autoritads areguard l’impurtanza da prestaziuns concretas da la SRG SSR per rinforzar la diversitad. Il resultat: Per 75 pertschient da las persunas intervistadas èsi impurtant che la SRG SSR mettia a disposiziun ina purschida diversa.
Las suandantas prestaziuns da la SRG SSR valiteschan las persunas intervistadas sco fitg impurtantas fin indispensablas en connex cun la contribuziun a la diversitad:
- preschientscha e cuvrida da las atgnadads culturalas e linguisticas da las singulas regiuns en il program (indispensabel)
- purschida da films documentars e da reportaschas da la Svizra (indispensabel)
- purschida che reflectescha la diversitad da la societad (fitg impurtant)
- plazza per il barat tranter las singulas parts dal pajais e las atgnadads culturalas da la Svizra en il rom da las purschidas (fitg impurtant)
Qua datti potenzial da meglieraziun
Sin fundament da l’enquista represchentativa d’en total 1179 persunas avain nus pudì analisar il 2019 en tge secturs da prestaziun da la SRG SSR che la populaziun vesa il pli grond potenzial da meglieraziun.
Per ademplir meglier las aspectativas en il sectur da la diversitad da purschidas sto la SRG SSR sa meglierar tenor l’avis da las persunas intervistadas en la suandantas domenas:
- emissiuns da divertiment svizras (29%)
- films e serias da la Svizra (27%)
- films documentars e reportaschas da la Svizra (27%)
Divertiment, sport ed auter: dapli diversitad en la purschida da program
Per la diversitad da program vesan var 30 pertschient da las persunas intervistadas potenzial da meglieraziun en las emissiuns da divertiment svizras. Mintgamai bundant in quart avess gugent ina pli gronda diversitad quai che reguarda films e serias, films documentars e reportaschas, emissiuns da sport e da musica sco era quai che reguarda l’infurmaziun politica ed economica. Mintgamai in tschintgavel spetga in program da cultura svizzer pli divers.
Las intervistas qualitativas ed ils lavuratoris han mussà ch’è indispensabla per las persunas intervistadas cunzunt ina vasta purschida da films documentars e da reportaschas da la Svizra che represchentan la diversitad da la Svizra.
«Wenn das die SRG nicht macht, macht es niemand. In diesem Bereich müsste viel mehr gemacht werden, Schweizer Filme und Serien sind identitätsstiftend. […]»
Stakeholders, naziunal (rapport 2019)«[…] Il n’y pas vraiment de contenu des autres régions. On ne connait rien sur le Tessin. Je ne sais pas ce que les suisses allemands savent de nous.»
Stakeholders, Svizra franzosa (rapport 2019)«Gut ist, dass alle Sprachregionen abgedeckt sind. Allerdings bleiben die Sender der verschiedenen Regionen unter sich […].»
Populaziun, Svizra tudestga (rapport 2019)
Cuvrir meglier la diversitad culturala e sociala
Plinavant avain nus dumandà: Tge stuess la SRG SSR meglierar per render pli visibla la diversitad culturala e sociala dal pajais?
Circa in terz da las persunas che han participà a l’enquista avess gugent dapli barat tranter las singulas parts dal pajais e las differentas culturas en la purschida da la SRG SSR. Bun in quart è da l’avis ch’i dovria purschidas optimadas che reflecteschan la diversitad sociala. Quellas persunas pretendan dapli preschientscha ed ina meglra cuvrida da las atgnadads culturalas e linguisticas en il program.
Las intervistas qualitativas ed ils lavuratoris han mussà ch’igl è elementar da cuvrir las atgnadads culturalas e linguisticas da las singulas regiuns en il program da la SRG SSR per promover la diversitad en Svizra. Concretamain pretendan las persunas intervistadas da la SRG SSR da promover il barat tranter las regiuns, da garantir dapli diversitad da las persunas sin ils moniturs e da mussar meglier il mintgadi en las regiuns, per exempel cun laschar sviluppar differentas regiuns programs cuminaivels u cun entrar en temas difficils, per exempel la povradad en Svizra.
«Wenn ich in Zürich sitze und SRF schaue, sehe ich nichts aus den anderen Landesteilen.»
Stakeholders, naziunal (rapport 2019)«Plus la rédaction est diverse, plus c’est stimulant pour tout le monde. Il faut recruter des gens sans diplômes universitaires.»
Stakeholders, naziunal (rapport 2019)«[…] Wenn man über Ausländer berichtet, muss man auch mit Ausländern sprechen. Da muss man Vielfalt hinbringen.»
Stakeholders, Svizra tudestga (rapport 2019)
Las pli grondas sfidas (2019)
Las constataziuns dal barat 2019 han servì a nus per definir nossa posiziun ed han mussà prestaziuns ch’ins considerescha sco particularmain impurtantas u che ston vegnir meglieradas. Quai ha pussibilità a la SRG SSR da definir sfidas per mintgin dals quatter secturs ch’ins ha approfundà il 2020 en il rom dal dialog da l’uniun purtadra cun la populaziun.
Il sectur diversitad cumpiglia las suandantas sfidas centralas:
- cumponenta svizra da la purschida
- represchentaziun perceptibla da la diversitad
Las pli impurtantas aspectativas (2020)
L’onn 2020 ha l’uniun purtadra da la SRG SSR approfundà il barat e nus avain pudì definir per mintga sfida las aspectativas prioritaras.
Cumponenta svizra da la purschida:
- preschentar temas actuals che pertutgan tant las differentas regiuns linguisticas sco era tut la Svizra (> 65% da las persunas intervistadas)
Represchentaziun perceptibla da la diversitad:
- demussar ils avantatgs d’ina Svizra multiculturala (60–65% da las persunas intervistadas)
I sa tracta da las aspectativas prioritaras en tut las parts dal pajais.
Tenor ils resultats 2019/2020 spetga la populaziun che las persunas giuvnas vegnian pledentadas ed infurmadas a moda suffizienta. Per cuntinuar a rinforzar il public value da la SRG SSR en il sectur da la diversitad èsi damai impurtant da cuntanscher meglier la diversitad da las persunas giuvnas.
Per quel motiv è noss tema da focus stà il 2022/2023 «La giuventetgna e la SRG SSR». Tranter auter avain nus realisà en tut las parts dal pajais lavuratoris cun scolar:as da las scolas professiunalas spezialisadas. Plinavant avain nus fatg intervistas qualitativas ed in’enquista online davart quel tema. Ils resultats detagliads suondan prest.
