Resuns senza remischun

En lavuratoris avain nus dumandà suenter tge che scolar:as da scolas professiunalas giavischan da la SRG SSR.
«
Jau chat che nus sajan infurmads memia pauc davart las chaussas che capitan en las autras parts dal pajais. Cler ch’i dat la barriera linguistica, ma i fiss tuttina cool da survegnir anc autras novitads.»
Manal (19)

El:las daventan pur:as, droghist:as e spezialist:as da restauraziun, expriman cler e net lur spetgas envers la SRG SSR ed ans raquintan davart lur consum da medias.

Als lavuratoris da la SRG SSR dal 2022 han participà en tut 180 scolar:as da scolas professiunalas en tschintg lieus da tut las regiuns linguisticas.

«
Jau fatsch diever da las medias en emprima lingia pervia da las novitads da sport. Ma era per m’infurmar davart quai che curra e passa en il mund… Ma principalmain per il sport.»
Michael (19)

Il pli sisum sin la glista dals giavischs envers las interpresas da medias stattan l’independenza e la fidabladad da las infurmaziuns. Ultra da quai vulan ils umans giuvens en temps cun in ferm augment da fake news rinforzar lur cumpetenzas medialas. Tuttina sch’i sa tracta da RSI, RTR, RTS u SRF – ils giuvenils giavischan dapli videos explicativs. La SRG SSR duaja s’adattar a las disas da la generaziun giuvna. La televisiun ed il radio sajan impurtants per la generaziun da lur geniturs e lur tattas e tats, els sezs s’infurmeschian via medias socialas sco Tiktok ed Instagram u consumeschian ils cuntegns pli tard.

«
La gronda differenza tranter mes geniturs e mai quai che pertutga il consum da medias è che jau na guard la ‹Tagesschau› betg exnum a las 19.30, mabain insacura pli tard. L’emissiun ‹Echo der Zeit› taidlel jau savens l’autra damaun en il tren»
Valentin (25)

Ils umans giuvens en Svizra na vesan betg mo ils cuntegns, mabain er il service public medial sco incumbensa sociala. I saja la chaussa da la SRG SSR da far insatge cunter la separaziun da la societad e da reparar ils stgarps tranter las differentas gruppas da vegliadetgna, posiziuns politicas e gruppas socialas. En pli giavischan els da vesair en las novitads dapli umans giuvens en ina glisch positiva. La rapportaziun davart lur generaziun saja savens plitost negativa u cuntegnia memia blers clischés.

Mirveglias? Ils resultats detagliads vegnan prest.

Tge spetga la populaziun da la SRG SSR? Quai vulain nus savair. Ils lavuratoris fan part dal dialog che la SRG SSR maina cun la populaziun. Sco interpresa dal service public gioga la SRG SSR ina rolla speziala en l’ecosistem medial ed emprova perquai da chapir meglier co che la populaziun percepescha sia contribuziun a la societad – sia contribuziun a la coesiun, a la democrazia, a la diversitad ed a l’impurtanza economica. Ils inputs dals lavuratoris, da discurs cun gruppas d’interess e d’enquistas vegnan integrads en la strategia da la SRG SSR e gidan nus dad optimar vinavant la realisaziun da nossa incumbensa.

Tge giavischais Vus da la SRG SSR?
Scrivai in commentari.

 

Francesca Guicciardi, matg 2023

Commentari

Guardar en stiva la tschentada sin la glina – l'istorgia da la SRG SSR

L'impurtanza da la SRG SSR per la societad daventa visibla en las istorgias da vita dals umans ch'èn creschids si cun ella. Ina da quellas è l'istorgia dad Irma Murri, mia tatta. E quella da la SRG SSR. 

Avatars che elimineschan ils obstachels

Suttitels, lingua da segns ed avatars 3D: a chaschun dal Di da l’accessibladad ha la SRG SSR discutà cun persunas impedidas d’udida davart las purschidas ch’i dovra per promover l’accessibladad senza barrieras. Grazia a talas prestaziuns pon umans cun impediments d’udida numnadamain sa participar meglier a la vita sociala.

Co in'emna da barat rinforza l'attaschadadad naziunala

Durant l'emprima emna da barat naziunala èn s'inscuntrads 2500 scolaras e scolars da differentas regiuns linguisticas. Ultra da quai han las moderaturas da las novitads da SRF e RTS barattà lur plaz da lavur. Il sigl sur ils cunfins linguistics renda visibla la diversitad en Svizra e promova a medem temp la solidaritad.