«La tribuna na tutga betg mo als tips!»

En la collecziun da films curts «Futura!» inscuntrain nus diesch umans giuvens da la Svizra. Els han passiuns dal tuttafatg diversas e creeschan lur atgnas cuminanzas. Uss è «Futura!» da vesair sin Play Suisse.

Films curts dattan la pussaivladad da sfundrar en differents munds da viver. Ils diesch films da la collecziun «Futura!» raquintan istorgias d’umans giuvens che na pudessan betg esser pli differents. Mo els stattan tuts per lur atgna via e lur istorgia, per lur passiun e la convivenza.

Sco Catzilla. Sveltezza, tactica, forza, curaschi, contact corporal – tut quai ed anc bler dapli è rollerderby. Pia in tipic sport dad umens? Tuttavia betg! Catzilla, ina dunna giuvna che ha tschertgà invan ses plaz en la societad gia durant las pausas da scola tranter far tarscholas e giugar ballape, è creschida si cun ils truchets «tipic um» e «tipic dunna» e na gieva tuttina betg a prà ni cun in ni cun l’auter. Quests stereotips èn ids sin la gnerva ad ella ed ella ha cumenzà baud a sa fatschentar cun il feminissem. Oz n’ha Catzilla betg mo quest surnum, ella ha era chattà ses plaz e sia passiun per il rollerderby e la cuminanza che fa quest sport.

«
Mintgatant sun jau mezza impressiunada quanta forza che jau hai.»
Catzilla

A prima vista ha Catzilla da far pauc cun auters umans giuvens da la Svizra, als quals ils films curts da la collecziun «Futura!» èn deditgads. In da quels è Vladi che vul salvar il saut popular serb. U la dragqueen Ava che sa reinventa da cuntin sin la tribuna. Ubain Flurin, il figl da purs, che na vul betg surpigliar il bain patern.

«Futura!» – quai èn diesch purtrets davart diesch differents munds da viver da diesch cineast:as giuvn:as en Svizra. La collecziun da films curts ha festivà sia premiera il 2022 al Zurich Film Festival che la SRG SSR sustegna sco partenaria da medias. Uss è «Futura!» disponibel gratuitamain sin Play Suisse.

Francesca Guicciardi, avrigl 2023

«Grazia a la preschientscha mediala daventa il ballape da dunnas era commerzialmain pli impurtant»

Il plaschair è grond: suenter l'Engalterra il 2022 vegn il campiunadi europeic da ballape da dunnas il 2025 en Svizra.

Co che RTR promova la musica rumantscha

La musica è in'ambassadura excellenta per reflectar la cultura e purtar ella vers anora. Radiotelevisiun Svizra Rumantscha (RTR) prenda serius quest'incumbensa: cun promover sistematicamain musicistas e musicists rumantschs. 

«Hard Life»: in'egliada nunfiltrada sin la societad e davos sias culissas

Grazia a la cooperaziun da la SRG SSR cun autras chasas da medias europeicas pon ins guardar gratuitamain films e serias da l'Europa era sin la plattafurma da streaming Play Suisse da la SRG SSR. Uschia ha il public en Svizra la pussaivladad da suandar istorgias da tut il mund – senza barrieras linguisticas.