«Hard Life»: in'egliada nunfiltrada sin la societad e davos sias culissas
Grazia a la cooperaziun da la SRG SSR cun autras chasas da medias europeicas pon ins guardar gratuitamain films e serias da l’Europa era sin la plattafurma da streaming Play Suisse da la SRG SSR. Uschia ha il public en Svizra la pussaivladad da suandar istorgias da tut il mund – senza barrieras linguisticas.
Ils sumbrivals èn tratgs, la glisch en la chombretta cun il buttun per cas d’urgenza deriva per gronda part dals bustabs illuminads «A-N-D-R-A-D-A». Ma qua sa numna ella «Big Mama». Tar ella vegnan umens a la tschertga da satisfacziun corporala, ma er umens che giavischan affecziun emoziunala. Cun curaschi ed en ina moda directa lascha la dunna oriunda da la Rumenia guardar davos las culissas dal mintgadi d’ina lavurera da sex. Far la duscha avant il sex na ston ils umens betg, ma senza condom na marscha nagut. Qua saja ella stricta, explitgescha Andrada en sia vestgadira erotica naira.
En la proxima scena avra ella l’isch da ses bloc d’abitar e lascha entrar il public er en sia vita privata. Quella è dominada da solitariadad e quitads finanzials, ma era da siemis d’ina meglra vita per sia figlia da dudesch onns. E vi da quests siemis sa tegna Andrada, malgrà ch’ella ha paucs raps e la perspectiva d’ina plazza fixa en ina cuschina. Memia fitg carmalan ils daners gudagnads a la svelta e cunquai la speranza sin in’atgna chasa en Rumenia per ella e sia matta. Ed uschia cuntinuescha «Big Mama» cun ses clients e cuschina sco Andrada a chasa tratgas rumenas cunter l’encreschadetgna.
Las invistas che la seria «Hard Life» da l’ARD dat èn impressiunantas, directas ed onestas. Ils films documentars fan part da la «European Collection» – in’iniziativa communabla dad ARTE, ARD, ZDF e France Télévisions ensemen cun la SRG SSR.
Grazia a quest partenadi da la SRG SSR èsi pussaivel da guardar ina selecziun da films er en Svizra cun suttitels tudestgs, franzos, talians e rumantschs. E cuntrari èn films svizzers disponibels er en il proxim exteriur.
Vus chattais la collecziun gratuita sin Play Suisse. Sin la plattafurma da streaming da la SRG SSR, sin «Schweizer Geschichte», pudais Vus dal reminent sfundrar en ina collecziun da revistas filmicas emnilas ch’èn vegnidas mussadas dals onns 1940 fin 1970.
Barrieras linguisticas? Grazia a suttitels e sincronisaziun s’avran per Vus fanestras en las autras parts da la Svizra diversa. Play Suisse As propona da var 3000 films e serias era contribuziuns da las autras regiuns linguisticas. La purschida da la SRG SSR chatta buna accoglientscha: in onn suenter la lantschada da Play Suisse l’onn 2020 è vegnì guardà gia in quart dals films cun suttitels.
Francesca Guicciardi, avrigl 2023
