Schurnalistas e schurnalists en stanza da scola: Nov project per promover la cumpetenza mediala
Envida in profi da medias en tia classa: La SRG SSR lantscha ina nova purschida che intermediescha als uffants ed als giuvenils a moda fitg directa e pratica co ch’ins fa novitads, nua ch’ins chatta funtaunas fidadas e co ch’ins scuvra cun success dischinfurmaziuns e fake news.
T’imaginescha: Ti es en la tschintgavla classa ed en tia scola va la fama che l’aua da baiver saja tissientada. Eviteschas ti immediat tut las spinas d’aua e ta lavas ils mauns mo pli cun aua minerala? U mettas ti en dumonda la fama e cumenzas a retschertgar a fund?
Exact cun questa sfida avain nus confruntà scolaras e scolars da la scola dal di privata «gsw.schule» a Winterthur. Durant in mez di èn ils uffants da la tschintgavla classa daventads schurnalistas e schurnalists d’investigaziun ed han ponderà vi e nà co ch’els pudessan s’avischinar il meglier a la vardad. Sa chapescha n’era l’aua da la scola a Winterthur en realitad betg tissientada. Quai è stà in exempel concret en il rom dal nov project per promover la cumpetenza mediala che la SRG SSR porscha proximamain a tut las scolas da la Svizra tudestga. Las persunas d’instrucziun pon empustar ina schurnalista u in schurnalist che visita durant trais lecziuns lur classa e mussa a las scolaras ed als scolars co che las medias lavuran (guarda la chascha).
Schurnalistas e schurnalists da la SRG SSR visitan classas da scola e dattan in’invista pratica en la lavur schurnalistica.
maletg: SRG SSR
Chapir il schurnalissem sco pitga da la democrazia
La purschida cumenza a partir da l’avust[KM5.1], vegn amplifitgada cuntinuadamain e duai esser accessibla enfin la fin da l’onn a tut ils stgalims da scola a partir da la 5avla classa fin a la scola professiunala ed al gimnasi. Ils cuntegns èn vegnids elavurads metodicamain e didacticamain dal pedagog da medias Martin Baumann che ha gia experientscha cun sumegliants projects per promover la cumpetenza mediala. Sustegn ha el survegnì da l’anteriur schurnalist da SRF Pascal Nufer ch’è oz sco manader da project Public Value da la SRG SSR responsabel per ils temas cumpetenza mediala e cumpetenza da s’infurmar[PN6.1]. «Ils uffants vegnan animads durant trais lecziuns da daventar sezs activs, consultar atgnas funtaunas e furmar sezs in’opiniun. A la fin duain els chapir il schurnalissem sco pitga impurtanta da la democrazia», di Nufer.
Il nov project cumplettescha las purschidas existentas per promover la cumpetenza mediala, sco il vagun da «fake news» da las VFF ul’exposiziun interactiva en il Museum svizzer da Transports a Lucerna. La SRG SSR vul rinforzar uschia a lunga vista il schurnalissem en la societad e crear dapli sensibilitad per la relevanza sistemica da las professiuns da medias: «L’emprim pass è da declerar als uffants tge che las schurnalistas ed ils schurnalists fan insumma, tenor tge reglas ch’ellas ed els lavuran e co che lur lavur sa differenziescha per exempel da quella d’autras persunas che creeschan cuntegns, per exempel influenzadras ed influenzaders», declera Nufer.
Pascal Nufer raquinta ad ina classa da pilot a Winterthur da sia lavur sco correspundent da SRF en China.
maletg: SRG SSR
Ils rapports davart experientschas concretas restan en memoria
En las lecziuns da test che l’anteriur correspundent e scolast primar ha dà sez, ha el constatà svelt che las scolaras ed ils scolars tegnan endament surtut ils exempels dal mintgadi da las collavuraturas e dals collavuraturs da medias. A la manadra da scola da la GSW, Christine Villiger, plascha la purschida gist era per quest motiv: «Sche las schurnalistas ed ils schurnalists vegnan qua tar nus en nossa stanza da scola, ha quai in ferm effect sin las scolaras ed ils scolars. Il tema cumplex da la cumpetenza mediala vegn intermedià a moda fitg pratica.» Era sch’il tema «medias ed informatica» è cuntegnì en il plan d’instrucziun 21, na saja la realisaziun betg adina simpla per las persunas d’instrucziun. Surtut sch’i sa tractia da rumper giu il tema abstract sin in nivel accessibel, di Christine Villiger. «Sch’in schurnalist sco Pascal Nufer raquinta dentant live che ses partenaris d’intervista en China sajan mintgatant vegnids arrestads, sulettamain perquai ch’els han raquintà ad el ina vardad malempernaivla – resta quai en memoria als uffants.»
«Igl ha impressiunà fitg ils uffants quant impurtant ch’il schurnalissem è»
Schizunt Martin Baumann sco pedagog da medias versà è stà surprais positivamain suenter las lecziuns da test da vesair quant che las scolaras ed ils scolars han tegnì endament: «Il pli impurtant è era suenter trais lecziuns anc stà preschent.» A Winterthur èn Baumann e Nufer stads particularmain impressiunads dal schlantsch schurnalistic dals uffants durant l’exempel concret: «Intgins dad els han gì tut sulets l’idea ch’i stuess bain dar in uffizi ch’examinescha la qualitad da l’aua!», raquinta Nufer. E Christine Villiger cumplettescha: «Igl ha impressiunà fitg ils uffants quant impurtant ch’il schurnalissem è.» Ed: Emprendì insatge n’han betg mo las scolaras ed ils scolars. Era la manadra da scola ha gì in mument che ha fatg surstar: «Jau hai vis quant fitg che la professiun da la scolasta e dal scolast sumeglia quella da la schurnalista e dal schurnalist. Tuttas duas professiuns intermedieschan la cumpetenza da tschentar bunas dumondas, da formular ipotesas e dad ir a fund a quellas.»
Noemi Harnickell, zercladur 2026
Per che las scolas possian empustar in profi da medias a moda uschè simpla sco pussaivel, creain nus actualmain in pool da schurnalistas e schurnalists che sa mettan a disposiziun per las unitads d’instrucziun. En la fasa da pilot sa cumpona il pool da schurnalistas e schurnalists da SRF, en ina proxima fasa pon sa metter a disposiziun era collavuraturas e collavuraturs da chasas da medias privatas. La finamira è da crear ina plattafurma da reservaziun, sin la quala tant persunas d’instrucziun sco era profis da medias interessads pon sa registrar sut il tetg da l’uniun UseTheNews che s’engascha per promover la cumpetenza da novitads. La plattafurma tschertga alura a maun da Vossa regiun la cumbinaziun adattada da scola e schurnalista u schurnalist – in zichel sco Tinder per la pedagogia da medias.
Uschespert ch’il project cumenza uffizialmain, publitgain nus quai sin la pagina-web da Public Value ed en nossa newsletter. Sche Vus n’avais anc betg abunà quella, As annunziai qua.
