«I vegn consumà quai che l'algoritmus propona»

Tge cumpetenza mediala ha la giuventetgna e co s’orientescha ella en il spessom da novitads sin Instagram & co.? Tge rolla gioga en quel connex la SRG SSR? Fiona Fehlmann ha fatg retschertgas davart quest tema e declera pertge che cuntegns da la SRG SSR èn dumandads cunzunt en temps da crisa. 

Fiona Fehlmann, gioga la SRG SSR insumma anc ina rolla per la giuventetgna?
En il mintgadi medial da la maioritad da las persunas en la vegliadetgna da 14 fin 35 onns giogan las purschidas da la SRG SSR ina rolla subordinada. Giuvenils che abiteschan anc a chasa u che van anc a scola enconuschan per exempel singuls formats da SRF tras ils geniturs u la scola, perquai ch’i vegn mussà là eventualmain documentaziuns da RTR Uffants. Forsa stgarpitschan els era casualmain sur formats en las medias socialas. Quai vul dir: els na fan per regla betg diever intenziunadamain da purschidas da la SRG SSR, tranter auter perquai che novitads vegnan consumadas ozendi en in’autra moda. 

«
En temps da crisa consumeschan giuvenils pli savens cuntegns da la SRG SSR.»
Fiona Fehlmann, Institut per scienzas applitgadas dals meds da massa ZHAW

Co è il consum da medias sa midà?
Las medias socialas domineschan il mintgadi medial da la giuventetgna – savens vegn consumà quai che l’algoritmus propona. Questa preselecziun cun agid da l’algoritmus è populara, ella gida numnadamain a s’orientar en il spessom da cuntegns sin questas plattafurmas.  

I vegn damai consumà en emprima lingia quai che l’algoritmus propona?
Gea, ma betg exclusivamain. Quai che dat en egl: persunas che vegnan a chasa u en scola en contact cun formats da la SRG SSR, als abuneschan era pli savens en las medias socialas. Er en temps da crisa u en connex cun temas impurtants recurran ils giuvenils dapli a cuntegns da la SRG SSR. 

Pertge?
Ils blers èn conscients: cuntrari a plattafurmas internaziunalas na persequitescha la SRG SSR betg ina finamira sulettamain commerziala, mabain primarmain publica. Perquai fid’ins dapli a ses cuntegns.

«
Anc mai n’èsi stà uschè impurtant sco oz da rinforzar la cumpetenza mediala en il diever da las medias socialas.»
Fiona Fehlmann

La giuventetgna fida pia a la SRG SSR, consumescha dentant en emprima lingia cuntegns d’autras funtaunas en las medias socialas?
Gea, questa cuntradicziun è in punct interessant en mia perscrutaziun. Fitg interessant è er il fatg ch’ils giuvens èn – independentamain da lur vegliadetgna – da l’opiniun che la purschida da la SRG SSR saja fitg impurtanta per la diversitad e la democrazia en Svizra. Mia perscrutaziun mussa: anc mai n’èsi stà uschè impurtant sco oz da rinforzar la cumpetenza mediala en il diever da las medias socialas e da dumandar directamain la giuventetgna tge cuntegns ch’ella giavischia sin talas plattafurmas.  

«
La SRG SSR sto permanentamain metter en dumonda ed adattar sia purschida.»
Fiona Fehlmann

Co po la SRG SSR profitar da Vossas constataziuns?
Ella sto sa fatschentar dapli cun la giuventetgna e l’involver. Per pudair represchentar meglier ils basegns e las spetgas da glieud giuvna duain giuvenils esser preschents davant e davos la camera. Quai è impurtant per che la SRG SSR possia mantegnair sia legitimitad en la societad.  

 Co manegiais Vus quai?
La societad sa mida d’in cuntin. Consequentamain sa midan era las spetgas a la SRG SSR. Ella sto damai metter en dumonda ed adattar permanentamain sia purschida. Mo uschia po ella ademplir sia incumbensa publica e vegnir percepida sco instituziun preziusa ch’i dovra en Svizra.  

Intervista dals 5 da fanadur 2023 (Francesca Guicciardi) 

Image

Fiona Fehlmann

Persuna

Fiona Fehlmann è stada ils onns 2018 fin 2022 doctoranda en il project da perscrutaziun «Service public: Publikumsakzeptanz und Zukunftschancen» da la Scola auta spezialisada dal Grischun en cooperaziun cun l’Universitad da Basilea. En il rom da quest project ha ella scrit sia lavur da dissertaziun «Legitimität als Herausforderungdie SRG SSR bei jungen Zielgruppen». Gia per sia lavur da master – per la quala ella è vegnida undrada il 2017 cun il premi Goldmedia per lavurs da finiziun innovativas – è Fiona Fehlmann s’occupada da la SRG SSR. Oz lavura ella sco collavuratura scientifica en il sectur «Media Literacy» en l’Institut per scienzas applitgadas dals meds da massa da la Scola auta turitgaisa per scienzas applitgadas ZHAW.

Sia dissertaziun

Fiona Fehlmann intercurescha en sia dissertaziun co che umans giuvens tranter 14 e 35 onns percepeschan la SRG SSR e schebain e co ch’els consumeschan sia purschida. Plinavant analisescha ella co che la SRG SSR resguarda la giuventetgna e co che sia purschida s’orientescha a questa gruppa en mira. Questas percepziuns vicendaivlas ha ella cumpareglià.

La dissertaziun da Fiona Fehlmann fa part dal project da perscrutaziun «Service public: Publikumsakzeptanz und Zukunftschancen» che vegn ad esser accessibel libramain en l’internet a partir da la primavaira 2024. 

 Il Fond naziunal svizzer ha sustegnì il project da perscrutaziun manà da la professuressa e dals professers Matthias Künzler, Ulla Autenrieth e Klaus Neumann-Braun. I sa tracta d’in project communabel da l’Institut per Multimedia Production (IMP) da la Scola auta spezialisada dal Grischun e dal Seminari per las scienzas dals meds da massa (SfM) da l’Universitad da Basilea.  

Commentari

«Dapi che jau viv a Mexico, sun jau pli svizzer che mai»

Il dumber da las Svizras e dals Svizzers che vivan a l'exteriur surpassa per l'emprima giada la marca dad 800'000 – ed è ussa tuttina aut sco il dumber da la populaziun dal pli grond chantun da la Svizra, il chantun Vad. Per tut quellas e quels che vivan a l'ester rapporta swissinfo.ch dals fatgs politics en Svizra e da quai che occupa uschiglio anc noss pajais. 

Infurmaziuns fundadas – e nagin:as pseudoexpert:as da teorias conspirativas

Scolas autas e RTS èn sa mess ensemen ed han sviluppà ina plattafurma per infurmaziuns scientificas.

Il post da mediaziun respunda adina – cuntrari a YouTube & co.

Il post da mediaziun è in dals instruments che distingua la SRG SSR da Google, TikTok u Meta. Tgi che ha l'impressiun ch'in rapport saja stà malgist u fauss, po reclamar e survegn en mintga cas ina resposta. La lavur da las mediaturas e dals mediaturs n'è betg adina simpla, ma ella è impurtanta per la qualitad da las medias ed uschia era per la democrazia.