Co che la SRG SSR duai rinforzar la valurisaziun
Co contribuescha la SRG SSR a la plazza da medias Svizra? Ils resultats centrals da noss dialog cun la populaziun.
Ils resultats sa basan sin in’enquista represchentativa, in’enquista online, intervistas qualitativas e lavuratoris. En total avain nus ans barattà il 2019/2020 cun passa 8900 persunas areguard la contribuziun da la SRG SSR a la plazza economica Svizra.
Rinforzar la plazza economica
Da quel emprim barat ha la maioritad da las persunas che han participà exprimì l’aspectativa che la SRG SSR contribueschia a moda perceptibla a l’economia svizra e ch’ella duaja far quai sco partenaria.
En il rom dal tema da focus «La giuventetgna e la SRG SSR» avain nus realisà il 2022 otg lavuratoris en tut las parts dal pajais. Scolar:as han pudì s’exprimer davart lur utilisaziun da las medias e dir tge ch’el:las spetgan da las medias. Nus avain tschentà dumondas er en connex cun films e serias da la Svizra.
Ils resultats 2019/2020
La SRG SSR fa ina contribuziun impurtanta a la plazza da medias Svizra
La mesadad da las persunas intervistadas chatta impurtant che la SRG SSR contribueschia al svilup da la branscha da medias en Svizra. Quant bain è quai reussì ad ella fin uss? Tge po ella far meglier? Qua preschentain nus las respostas resultadas da las enquistas, da las intervistas e dals lavuratoris.
Las suandantas prestaziuns da la SRG SSR valiteschan las persunas intervistadas sco fitg impurtantas fin indispensablas en connex cun la contribuziun a la plazza economica Svizra:
- sustegnair la professiun da schurnalist:a (indispensabel)
- sustegnair la producziun naziunala da cuntegns audiovisuals (fitg impurtant)
- collavurar e sa colliar cun autras medias svizras (fitg impurtant)
Qua datti potenzial da meglieraziun
Sin fundament da l’enquista represchentativa d’en total 1179 persunas avain nus pudì analisar il 2019 en tge secturs da prestaziun da la SRG SSR che la populaziun vesa il pli grond potenzial da meglieraziun.
Per ademplir meglier las aspectativas en il sectur da la contribuziun economica sto la SRG SSR sa meglierar tenor l’opiniun da las persunas intervistadas en ils suandants secturs:
- sustegnair la professiun da schurnalist:a (34%)
- collavurar cun autras medias svizras (32%)
- sustegnair la producziun naziunala da cuntegns audiovisuals (31%)
Sustegnair la professiun da schurnalist:a e collavurar pli stretgamain
La SRG SSR duai optimar sia contribuziun al svilup da la branscha da medias svizra. Cuntanscher questa finamira po la SRG SSR cun sustegnair la professiun da schurnalist:a – var in terz da las persunas intervistadas vesa qua il potenzial. Medemamain var in terz è da l’opiniun che la SRG SSR duaja collavurar pli stretgamain cun autras chasas da medias svizras. Las persunas che han participà a l’intervista ed als lavuratoris proponan per exempel da producir emissiuns ensemen cun autras medias. 31 pertschient da las persunas intervistadas avess gugent che la producziun naziunala da cuntegns audiovisuals vegnia sustegnida pli fitg.
«Die SRG sollte eine Informationsquelle sein, wo sich andere Medien auch drauf stützen können. Lokale Medien können sich dies nicht leisten.»
Populaziun, Svizra tudestga (rapport 2019)«Comme c’est LA chaîne nationale, elle devrait être un moteur plus puissant, tirer les plus petits derrière. Je trouve qu’elle pourrait faire plus; on ne la voit pas assez s’investir.»
Populaziun, Svizra franzosa (rapport 2019)«Es braucht mehr Kooperationen, gemeinsame Projekte, gemeinsame Sendungsformate. Bei der Technik eine gemeinsame Infrastruktur zum Beispiel […] .»
Stakeholders, naziunal (rapport 2019)
La pli gronda sfida (2019)
Las constataziuns dal barat 2019 han servì a nus per definir nossa posiziun ed han mussà prestaziuns ch’ins considerescha sco particularmain impurtantas u che ston vegnir meglieradas. Quai ha pussibilità a la SRG SSR da definir sfidas per mintgin dals quatter secturs ch’ins ha approfundà il 2020 en il rom dal dialog da l’uniun purtadra cun la populaziun.
La sfida centrala:
- contribuir a moda constructiva a la cuntrada mediala svizra
La pli impurtanta aspectativa (2020)
L’onn 2020 ha l’uniun purtadra da la SRG SSR approfundà il barat e nus avain pudì definir per la sfida l’aspectativa prioritara.
La pli impurtanta aspectativa:
- demussar a la populaziun che schurnalissem da qualitad custa daners, tuttina sch’el vegn fatg da la SRG SSR u da medias privatas (50–60% da las persunas intervistadas)
I sa tracta da las aspectativas prioritaras en tut las parts dal pajais.
Tenor ils resultats 2019/2020 spetga la populaziun che las persunas giuvnas vegnian pledentadas ed infurmadas a moda suffizienta. Per cuntinuar a rinforzar il factur economic da la SRG SSR ed uschia il public value èsi impurtant da cuntinuar a rinforzar l’utilisaziun da las medias e d’enconuscher meglier ils interess da persunas giuvnas.
Per quel motiv è noss tema da focus stà il 2022/2023 «La giuventetgna e la SRG SSR». Tranter auter avain nus realisà en tut las parts dal pajais lavuratoris cun scolar:as da las scolas professiunalas spezialisadas. Plinavant avain nus fatg intervistas qualitativas ed in’enquista online davart quel tema. Ils resultats detagliads suondan prest.
