Co che la SRG SSR duai rinforzar la democrazia
Co contribuescha la SRG SSR a la democrazia en Svizra e nua po ella far dapli? Ils resultats centrals da noss dialog cun la populaziun.
Ils resultats sa basan sin in’enquista represchentativa, in’enquista online, intervistas qualitativas e lavuratoris. En total avain nus ans barattà il 2019/2020 cun passa 8900 persunas areguard la contribuziun da la SRG SSR a la democrazia.
Infurmar a moda independenta, fidabla ed equilibrada
Da quel emprim barat è resultà in cler votum per infurmaziuns independentas, fidablas ed equilibradas, perquai ch’ellas èn centralas per la democrazia. Quest resultat principal correspunda a la valitaziun da persunas giuvnas: en il rom dal tema da focus «La giuventetgna e la SRG SSR» avain nus realisà il 2022 otg lavuratoris en tut las parts dal pajais. Scolar:as han pudì s’exprimer davart lur utilisaziun da las medias e dir tge ch’el:las spetgan da las medias. Cunzunt dus temas han fatschentà las persunas intervistadas: fake news e la qualitad da las novitads.
Ils resultats 2019/2020
La purschida da la SRG SSR è impurtanta per la democrazia
En il rom d’intervistas qualitativas avain nus fatg il 2019 dumondas a la populaziun sco er a represchentant:as da la societad civila, da la branscha da medias, da l’economia e da las autoritads areguard l’impurtanza da prestaziuns concretas da la SRG SSR en connex cun la democrazia.
Il resultat: Per 66 pertschient da las persunas intervistadas è la purschida da la SRG SSR absolutamain necessaria per che nossa democrazia funcziunia.
Las suandantas prestaziuns da la SRG SSR valiteschan las persunas intervistadas sco fitg impurtantas fin indispensablas en connex cun la contribuziun a la democrazia:
- qualitad da las novitads (indispensabel)
- independenza redacziunala (indispensabel)
- resguard da la diversitad d’opiniuns (indispensabel)
- francada en las regiuns (fitg impurtant)
- participaziun politica (fitg impurtant)
Qua datti potenzial da meglieraziun
Sin fundament da l’enquista represchentativa d’en total 1179 persunas avain nus pudì analisar il 2019 en tge secturs da prestaziun da la SRG SSR che la populaziun vesa il pli grond potenzial da meglieraziun.
Fertant che la qualitad da l’infurmaziun vegn appreziada en general, sto la SRG SSR sa meglierar tenor l’avis da las persunas intervistads en ils secturs suandants:
- independenza redacziunala (42%)
- resguard da la diversitad d’opiniuns (40%)
- protecziun da consument:as (37%)
- participaziun politica (34%)
Dapli independenza redacziunala ed in meglier resguard da la diversitad d'opiniuns
Per la purschida da la SRG SSR vesan las persunas intervistadas potenzial da meglieraziun en l’independenza redacziunala (42%) ed en il resguard da la diversitad d’opiniuns (40%). Las persunas che han participà a las intervistas qualitativas ed als lavuratoris pretendan che l’equiliber areguard il diever da las infurmaziuns stoppia esser garantì. Ins stoppia evitar pregiudizis ed en general duajan ins rapportar a moda pli equilibrada e neutrala. Quel aspect han las persunas intervistadas en la Svizra italofona priorisà particularmain ferm.
«Die SRG muss ein Interesse für die Mitwirkung der Bürger wecken, so aktiviert sie politische Partizipation. […]»
Comité directiv, SWI swissinfo.ch (rapport 2019)«Man sollte mehr ins Leben der Leute gehen und direkt mit ihnen diskutieren.»
Stakeholders, naziunal (rapport 2019)«[…] Le problème: la compréhension de l’information, il faut plus vulgariser l’information: ça doit être un rôle de la SSR.»
Populaziun, Svizra franzosa (rapport 2019)
Meglierar la protecziun da consument ed augmentar la participaziun al mintgadi politic
37 pertschient da las persunas intervistadas èn da l’avis che la protecziun da consument:as duess vegnir meglierada. Var in terz è da l’opiniun ch’ils programs da la SRG SSR duessan optimar las pussaivladads da participaziun da burgais:as al mintgadi politic. Quels dus aspects èn vegnids menziunads er en las intervistas ed ils lavuratoris: las persunas che han participà spetgan che la SRG SSR promovia l’interess da la populaziun per la vita politica, e quai via tut ils chanals. Ins pudess per exempel crear novs formats che augmentan l’interess da las burgaisas e dals burgais per la politica. Plinavant pretendan las persunas intervistadas che la SRG SSR saja pli daiters al mund real dals umans e ch’ella s’occupia dapli cun lur mintgadi, per exempel cun reflectar dapli lur vita e lur quitads. Plinavant duain auditur:as, aspectatu:ras ed utilisad:ras da l’internet vegnir encuraschad:as da participar a debattas politicas, per exempel cun procurar durant las emissiuns per dapli interactivitad.
«[…] Die SRG muss aufpassen, dass sie die Polarisierung nicht noch verstärkt.»
Stakeholders, Svizra tudestga (rapport 2019)«Die SRG müsste noch neutraler sein.»
Populaziun, Svizra tudestga (rapport 2019)«Les médias ont tendance à déraper à gauche. […]»
Stakeholders, Svizra franzosa (rapport 2019)
Esser francada pli ferm en las regiuns ed augmentar la qualitad da las infurmaziuns
In terz da las persunas intervistadas è da l’avis che la SRG SSR duess esser francada anc pli fitg en las regiuns. 28 pertschient da las persunas che han participà avess gugent che la qualitad da l’infurmaziun vegnia augmentada. Segund ils parairis en las intervistas qualitativas ed en ils lavuratoris correspunda la qualitad da las novitads a las aspectativas da las burgaisas e dals burgais.
Ultra da la diversitad d’opiniuns e da l’independenza redacziunala considereschan las persunas intervistadas la qualitad da l’infurmaziun sco contribuziun indispensabla da la SRG SSR a la democrazia.
«[…] Es geht darum, die Identität vieler unserer Einwohner abzuholen, dass die sich wiedererkennen.»
Stakeholders, naziunal (rapport 2019)«La SRG SSR fa bler sin plaun naziunal, sin plaun communal pudess ins far dapli.»
Uniun purtadra, Svizra rumantscha (rapport 2019)«Tiefe Stufen sind wichtig, dass man so nah wie möglich an das Leben der Menschen kommt. Dass etwas in La Chaux-de-Fonds stattfindet und nicht in Bern. Dass es nicht nur um die ganz grossen Fragen geht, sondern um konkrete.»
Stakeholders, naziunal (rapport 2019)
Las pli grondas sfidas (2019)
Las constataziuns dal barat 2019 han servì a nus per definir nossa posiziun ed han mussà prestaziuns ch’ins considerescha sco particularmain impurtantas u che ston vegnir meglieradas. Quai ha pussibilità a la SRG SSR da definir sfidas per mintgin dals quatter secturs ch’ins ha approfundà il 2020 en il rom dal dialog da l’uniun purtadra cun la populaziun.
Il sectur democrazia cumpiglia las suandantas sfidas centralas:
- qualitad da las novitads
- participaziun politica
Las pli impurtantas aspectativas (2020)
L’onn 2020 ha l’uniun purtadra da la SRG SSR approfundà il barat e nus avain pudì definir per mintga sfida las aspectativas prioritaras.
Qualitad da l’infurmaziun:
- scuvrir fake news e numnar funtaunas (> 65% da las persunas intervistadas)
- distinguer cleramain tranter infurmaziuns objectivas ed opiniuns (60–65% da las persunas intervistadas)
- approfundar temas e porscher dossiers tematics (60–65% da las persunas intervistadas)
Participaziun politica:
- sviluppar formats innovativs en connex cun temas politics che interesseschan era persunas giuvnas (> 65% da las persunas intervistadas)
- demussar al public tge che projects politics effectueschan directamain en il mintgadi (> 65% da las persunas intervistadas)
I sa tracta da las aspectativas prioritaras en tut las parts dal pajais.
Tenor ils resultats 2019/2020 spetga la populaziun che las persunas giuvnas vegnian pledentadas ed infurmadas a moda suffizienta. Per cuntinuar a rinforzar il public value da la SRG SSR en il sectur da la democrazia èsi damai impurtant da cuntanscher meglier las persunas giuvnas, per ch’ellas possian participar bain infurmadas a la politica.
Per quel motiv è noss tema da focus stà il 2022/2023 «La giuventetgna e la SRG SSR». Tranter auter avain nus realisà en tut las parts dal pajais lavuratoris cun scolar:as da las scolas professiunalas spezialisadas. Plinavant avain nus fatg intervistas qualitativas ed in’enquista online davart quel tema. Ils resultats detagliads suondan prest.
