Da la SRG SSR profita l'entira economia svizra

La SRG SSR è in‘actura impurtanta en il martgà svizzer ed influenzescha positivamain l‘economia. Ella è patruna e creescha plazzas da lavur er en autras branschas. Quests effects positivs per la creaziun da valur cumprova in studi fatg per incumbensa da l‘Uffizi federal da communicaziun UFCOM.  

En la discussiun areguard la SRG SSR e las medias publicas domineschan savens ils custs. I saja pli simpel da numerar ils custs ch‘il niz effectiv, scrivan ils perscrutaders da la conjunctura da l‘institut da retschertga economica svizzer independent BAK Economics AG. Per quest motiv han las auturas ed ils auturs dal studi da l‘onn 2016 drizzà il focus per ina giada sin ils effects economics positivs da la SSR.  

Mintga milliun incassà tras taxas creescha en Svizra var diesch plazzas da lavur.  

Il resultat: mintga franc incassà tras taxas che vegn investì en la SSR procura per ina plivalur. Concretamain correspunda in franc ad ina valur agiuntada brutta da CHF 1.42. U ditg cun auters pleds: mintga milliun incassà tras taxas creescha en Svizra var diesch plazzas da lavur.  

La SRG SSR gioga damai, ensemen cun ils emetturs privats locals da radio e da televisiun ch’obtegnan medemamain daners da taxas, ina rolla betg nunessenziala en l’economia. La SRG SSR realisescha cun var 6800 collavuraturas e collavuraturs ina svieuta annuala da radund 1,6 milliardas francs, ensemen cun ils emetturs privats èn quai 1,8 milliardas.  

Da quai profitan er interpresas e branschas ordaifer la SSR. Mintga segund franc incassà tras taxas utilisescha ella per in’incumbensa externa.  

Vi da mintga plazza da lavur da las medias penda damai ina plazza da lavur en in’interpresa dad in’autra branscha.   

Ella investescha per exempel en l’infrastructura. Quai èn ultra da las cameras e dals microfons, dals bus da transmissiun e dals studios da radio e da televisiun er ils apparats da recepziun.  

Ina stretga colliaziun ha la SRG SSR cun l’industria audiovisuala e sustegna federaziuns da las producentas e dals producents da films, da las acturas e dals acturs da las producziuns incumbensadas e dals servetschs tecnics per audio e video. 

En quella moda profitan autras interpresas da differentas branschas d’ina creaziun da valur dad 840 milliuns francs ed i dat ulteriuras 6700 plazzas ordaifer la SRG SSR. Vi da mintga plazza da lavur da las medias penda damai ina plazza da lavur en in’interpresa dad in’autra branscha. 

Ils effects positivs per l’economia publica èn schizunt surproporziunals èn Svizra franzosa e taliana. En relaziun cun il dumber d’abitantas e d’abitants è la preschientscha da la SSR en il Tessin ordvart ferma. Uschia è la muntada da l’economia generala la pli auta en quella regiun.  

Ultra dal niz cultural e social ha la SRG SSR damai er in’impurtanta muntada economica ed è in’actura interessanta tant sco furnitura da servetschs e tant sco patruna. 

Daniela Huwyler, zercladur 2023

«Für einheimische Produktionen kommt man um die SRG nicht herum»

Wie eine Vereinbarung zwischen der Schweizer Filmbranche und der SRG Kultserien wie «Tschugger» möglich macht.

Agid digital per tatta e tat

Durant ils Hackdays da la SRG SSR lavuran hacker:as di e notg vi dal svilup da trics tecnics. 2023 e tranter auter resultà in accumpagnader online per senior:as.

«L'economia e la SRG SSR èn en la medema bartga»

Interprendid:ras futur:as duain emprender da pensar e d'analisar a moda critica. La SRG SSR porscha maun e lantscha in partenadi cun las scolas professiunalas spezialisadas che duai preparar ils giuvenils uschè bain sco pussaivel per il martgà da lavur.