«RTR taidla sin il public – e quel engrazia a l'interpresa da medias»
RTR s’occupa regularmain da l’inclusiun e dat ina vusch per exempel a persunas cun impediments. Quant impurtant che quai è per ellas e per la societad sco tala mussan ils resuns che la chasa da medias survegn.
Laschar raquintar quellas e quels ch’ins n’auda uschiglio betg savens. Far visibel l’invisibel, mussar ambients da viver en tut lur diversitad: L’entschatta da la stad 2024 è Radiotelevisiun Svizra Rumantscha (RTR) s’occupada durant quatter emnas e sin tut ses chanals da l’inclusiun, quai sut il motto «ensemen unics». L’engaschament a chaschun dals dis d’acziun naziunals «Futur inclusiun» ha procurà per bleras reacziuns. «Grazia a la visita da RTR han ins percepì nus er ordaifer», è stà il resun da Corinne Pedotti da l’instituziun Movimento che porscha a Scuol plazzas d’abitar e da lavurar per persunas cun impediments.
Ha laschà prender part da ses mintgadi: clientella da «Movimento» a Scuol ensemen cun la squadra da RTR.
maletg: RTR
«Betg mo davart ellas, mabain cun ellas»
Durant la visita da RTR han ins per exempel fatg ensemen radio live directamain al lieu. «Era mais pli tard èn las emissiuns live cun nossa clientella anc adina tema, questa conscienza vegn stimada fitg», scriva Corinne Pedotti vinavant. Resuns sco quel mussan per Valentin Schmed precisamain, pertge che l’engaschament da la chasa da medias è uschè prezius en quest champ. «Per nus èsi impurtant da betg mo discurrer davart persunas cun impediments, mabain da discurrer cun ellas. Da laschar far part ellas: quai è l’inclusiun per mai», di il manader programmaziun da RTR.
Valentin Schmed, manader programmaziun da RTR.
maletg: RTR
Communablamain a la pauca
Dasper las emissiuns live ha RTR realisà diversas contribuziuns da radio, televisiun e purschidas-web en il rom da l’engaschament. Restada en buna memoria al manader programmaziun è l’istorgia da Lucas Quinter ed Olinda Hosang: Il Grischun cun trisomia 21 suna dapi sis onns la pauca en la Societad da musica da Mustér, cun e grazia a l’agid da sia collega d’uniun Olinda Hosang. «L’istorgia mussa quant nuncumplitgadamain che inclusiun po capitar. Ella mussa che mintgin:a po effectuar insatge per che nus tuttas e tuts hajan plazza en nossa societad», di Valentin Schmed. RTR n’è betg mo s’engaschà quest onn per l’inclusiun: ils ultims onns hai dà regularmain emnas tematicas, durant las qualas èn stadas en il focus persunas cun impediments e lur realitad da viver. «En Svizra han 1,8 milliuns persunas in impediment – quai è ina gronda part da la societad», di Valentin Schmed. «E sco medias stuain nus sa chapescha mussar era quella.»
Malolo Kessler, actualisà il favrer 2026, publitgà l’emprima giada l’october 2024
Di per di obtegna la SRG SSR numerus resuns davart ils pli differents programs. Sper vuschs criticas datti era bler feedback positiv. En la rubrica «Likes» publitgain nus ina selecziun da las reacziuns dal public e mettain en il center ils teams, als quals sa drizzan quests commentaris. Ils resuns rendan visibel l’effect da lur lavur sin il public da radio e televisiun e mussan a medem temp quant fitg che quels motiveschan ed inspireschan las persunas responsablas.
