Dapli che pumpa e pop? Tge che l'ESC porta a la societad

Il 2025 è l’Eurovision Song Contest en Svizra. Schebain ch’el custa milliuns, ha el tenor expert:as er ina plivalur per la societad: L’ESC contribuescha a la creaziun da valur, al barat cultural ed a la diversitad. Ma promova el era la solidaritad en la societad?

Per intginas persunas èsi il punct culminant da l’onn, per autras in’occurrenza nunnecessaria cun blera pumpa e musica da nauscha qualitad. Las opiniuns davart l’Eurovision Song Contest (ESC) varieschan fitg. In fatg è: l’ESC è la pli gronda concurrenza da musica mundiala cun mintgamai 150 fin 200 milliuns aspectatur:as. In auter fatg è era: la mega-occurrenza vegn il 2025 en Svizra e la SRG SSR dastga u sto organisar l’ESC, tut tenor la perspectiva. Vuschs criticas han accentuà gia curt suenter la victoria da Nemo ils auts custs d’ina tala occurrenza. Ma ha l’ESC er effects positivs, creescha el ina plivalur per la societad? E sche bain, tgenina?

Far reclama per il pajais sco destinaziun da vacanzas

Precis a questa dumonda è sa deditgà er il Festival dal Public Value a Lissabon. A chaschun da l’occurrenza da plirs dis han represchentant:as da la perscrutaziun, furmaziun e pratica discutà davart il tema dal Public Value or d’ina perspectiva paneuropeica.

A la discussiun da panel davart l’ESC ha participà tranter auter Maria Ferreira. La vicedirectura da la partiziun musica ed art da la chasa da medias portugaisa RTP ha fatg part dal team da producziun che ha mess en pe l’ESC 2018 a Lissabon. Ella sa perquai d’emprim maun tge che l’ESC po signifitgar per il pajais ospitant – e tge che la Svizra po spetgar da l’eveniment grond.

Maria Ferreira ha accentuà la plivalur economica ed il potenzial turistic da l’ESC. «Ina da nossas finamiras strategicas è stà da far reclama per la citad e per l’entir pajais», ha ella explitgà. Per quest intent hajan ins collavurà cun l’agentura da turissem statala e producì per exempel per mintga chanzun participada in video d’in auter lieu dal pajais. «Uschia avain nus pudì far gust ad in vast public da scuvrir il Portugal sco lieu da vacanzas.»

Lissabon haja ultra da quai pudì sa posiziunar sco lieu da represchentaziun per gronds eveniments internaziunals. E betg il davos ha l’ESC creà tenor Maria Ferreira numerusas plazzas temporaras. «Passa 1500 persunas han gidà da planisar e da realisar l’eveniment.» Grazia al sponsoring ed a divers partenadis èn ils custs per la chasa da medias RTP stads bass. La finala ha l’interpresa da medias da dretg public schizunt fatg in surpli da var quatter milliuns euros.

Che l’ESC po dar in stausch economic al lieu da represchentaziun ha era cumprovà in studi davart l’ESC da l’onn passà a Liverpool. Tenor l’evaluaziun ha l’occurrenza generà entradas supplementaras da var 55 milliuns glivras sterlinas als hotels, als restaurants, a las butias ed ad auters manaschis da la citad englaisa. Ultra da quai ha in studi mussà era la gronda participaziun ed in ferm engaschament da la populaziun locala, d’artist:as e d’organisaziuns, per exempel en furma da lavur voluntara u da la participaziun a numerus events culturals ed a programs da la community da l’ESC.

Promover la vendita da televisiuns

Gia dapi l’emprima ediziun è l’ESC stà dapli ch’ina occurrenza da pumpa e da pop. Davent da l’entschatta ha la concurrenza purtà sper la creaziun da valur economica er ina plivalur per la societad, sco quai ch’ins ha era menziunà a chaschun dal panel a Lissabon. «L’occurrenza ha reunì ils pajais europeics suenter la Segunda guerra mundiala, ha promovì la toleranza e l’integraziun europeica», ha explitgà il scienzà da lingua e da cultura tudestg Irving Wolther. La European Broadcast Union (EBU) haja gì fundà la concurrenza da musica ils onns 1950 cun in’intenziun cumplettamain differenta.

«L’idea da la concurrenza era da promover la vendita da televisiuns», ha ditg Wolther ch’è enconuschent era sco dr. Eurovision, perquai ch’el ha promovì davart l’ESC. Era oz na veglia la EBU betg porscher primarmain ina plivalur per la societad, mabain ina producziun da televisiun en directa da classa mundiala.

L’ESC sco program da barat

Per dr. Eurovision n’è questa orientaziun commerziala dentant betg in mussament che la concurrenza da musica na presta betg implicitamain er ina contribuziun per la societad e promova per exempel la coesiun ed il barat cultural. «Per mai è l’ESC ina sort dain curt program da barat, nua ch’ins vegn a savair bler davart auters pajais, lur cultura e lingua.»

L’eveniment ristgia dentant actualmain da daventar in’occurrenza da nischa, manegia Wolther. «Sch’ins metta il focus memia fitg sin la diversitad da l’orientaziun sexuala e da l’identitad da las schlattainas, na sa sentan grondas parts da la populaziun betg pli represchentadas.» La EBU stoppia far attenziun da betg daventar ina «Queer Music Show» che pledentia surtut la cuminanza LGBTQ+. Igl è perquai intschert quant enavant che l’ESC promova da princip la coesiun da la societad. Cler è percunter che la concurrenza da musica po en auters secturs tuttavia crear ina plivalur per la populaziun.

Maximar la plivalur per la populaziun

En Svizra duai la plivalur per la societad esser uschè gronda sco pussaivel, ha ditg Emilie Demaurex che ha participà per la SRG SSR al panel a Lissabon. «Nossa finamira è da far visiblas las minoritads en la societad e da dar ad ellas ina vusch. E nus vulain pledentar e reunir uschè bleras Svizras e blers Svizzers sco pussaivel», di la manadra da project e responsabla per il Dialog cun la societad en il sectur dal Public Value. L’ESC duaja promover la solidaritad naziunala, pussibilitar in’experientscha culturala communabla e preschentar las pli differentas realitads da viver en Svizra. Per che quai reusseschia, pensian ins davent da l’entschatta a la plivalur potenziala per la societad , ha ditg Demaurex. «Da la planisaziun e dal marketing sur la realisaziun fin a l’evaluaziun da l’ESC: la diversitad, la coesiun e la creaziun da valur vegnan resguardadas en mintga pass.»

Tobias Hänni, fanadur 2024