«Cordial engraziament! In'occurrenza uschè multifara hai jau vis darar»
RTR avra a chaschun da la «Sonda lunga» a Cuira mintga dus onns sias portas per la vasta publicitad e lascha guardar la populaziun davos las culissas. Quai creescha transparenza e fidanza – e vegn apprezià dal public, co ch’ils resuns mussan.
La contribuziun da televisiun, l’intervista da radio, l’artitgel online: Bleras aspectaturas, audituras e blers lecturs enconuschan ils products d’ina chasa da medias, ma na san savens betg uschè precisamain tge ch’i dovra tut per realisar quels. «Perquai dain nus regularmain la chaschun da guardar davos las culissas. Uschia emprenda la populaziun d’enconuscher ils umans, la lavur ed ils process davos noss products», di Flavia Vincenz, coordinatura d’events tar Radiotelevisiun Svizra Rumantscha (RTR). «Quai creescha transparenza e fidanza.»
Flavia Vincenz, coordinatura d’events tar RTR.
mad
L’ultima occurrenza è stada quella dal november 2024, cura che RTR ha avert sias portas per la populaziun a chaschun da la «Sonda lunga» a Cuira: 2500 visitadras e visitaders han pudì scuvrir las professiuns da la chasa da medias e prender in’invista da tut sias partiziuns – da l’archiv sur la producziun da film e la mascra fin al studio da radio. Era concerts han fatg part da la purschida, otg differentas gruppas da musica èn sa preschentadas sin la tribuna da RTR.
En tut han 2500 visitadras e visitaders guardà davos las culissas da RTR a chaschun da la «Sonda lunga» 2025.
Mattias Nutt
Ina conferma per l’engaschi
Quant preziusas che talas invistas pon esser, mussan ils numerus resuns che RTR ha survegnì per l’occurrenza dal november. «Cordial engraziament per la grondiusa occurrenza! In’occurrenza uschè multifara e programmada a moda uschè intelligenta hai jau vis darar», ha per exempel scrit ina visitadra. Per il team èn tals resuns – quels al lieu sco era quels en scrit – tenor Vincenz ina conferma ch’i vala la paina da far quests sforzs. Var 45 collavuraturas e collavuraturs da diversas partiziuns da RTR èn stad:as en acziun a chaschun da la «Sonda lunga» passada, ultra da quai represchentantas e represchentants da la SRG SSR e da SRF ed ulteriuras persunas spezialisadas externas.
«Uschia pudain nus crear vischinanza»
RTR sa participescha dapi il 2016 a la «Sonda lunga» a Cuira, a chaschun da la quala han lieu mintgamai var 200 occurrenzas culturalas. L’occurrenza pussibiliteschia da promover il dialog cun il public e da crear uschia era vischinanza, di Vincenz. «Ultra da quai è ella per nus ina schanza per accentuar l’impurtanza da las medias regiunalas.»
Di per di cuntanschan la SRG SSR numerus resuns davart ils pli differents programs. Sper vuschs criticas datti era bler feedback positiv. En la rubrica «Likes» publitgain nus ina selecziun da las reacziuns dal public e mettain en il center ils teams, als quals sa drizzan quests commentaris. Ils resuns rendan visibel l’effect da lur lavur sin il public da radio e televisiun e mussan a medem temp quant fitg che quels motiveschan ed inspireschan las persunas responsablas.
Matg 2026
