«Igl è in zic sco d'avair 10'000 tattas»
Radio SRF Musikwelle fa tranter auter visibla la varietad da la musica svizra tradiziunala e gida uschia a mantegnair noss patrimoni cultural. Per sias audituras e ses auditurs pli vegls è il program però cunzunt er in’autra chaussa: ina medischina cunter la solitariadad.
Il radio infurmescha e divertescha, educhescha ed accumpogna – en il biro sco era sin il plazzal, en viadi en l’auto, durant cuschinar, mangiar e nettegiar.
Per l’ina auditura u l’auter auditur po il radio però esser anc dapli, sco quai che mussan numerus resuns che entran regularmain tar Radio SRF Musikwelle. «In’auditura pli veglia ha per exempel scrit a nus ch’ella saja stada pli baud fitg solitaria. Quai saja sa midà dapi ch’ella taidlia ‹SRF Musikwelle›», raquinta Christian Klemm, il manader dal team da moderaziun.
Christian Klemm, manader dal team da moderaziun da SRF Musikwelle.
mad
Sin il banc-pigna
L’auditura n’è betg suletta: Tenor Klemm survegn il team blers resuns d’audituras e d’auditurs pli vegls che vivan sulet:tas e che sa sentan grazia a l’emettur accumpagna:das bain tras il di. Inqualin:a considereschia l’emettur schizunt sco sia medischina. «Atgnamain stuess ins pudair inoltrar las taxas a la cassa da malsauns», ha in auditur per exempel scrit dacurt. «Nus sentin extrem blera engraziaivladad da noss public, en spezial da persunas pli veglias, schegea che nus na faschain gea betg conscientamain radio per glieud attempada», di Klemm. Era regals survegnian els adina puspè: biscuits da Nadal, ovras fatgas cun crutsch, in salid da Pasca. «Igl è in zic sco d’avair 10’000 tattas.» Quant damanaivels ch’els sajan da la glieud sa mussia era durant las emissiuns, di il moderatur. «Nus essan en in hui sin il medem nivel cun las persunas che telefoneschan a nus. Sco sche nus sesessan sin il banc-pigna cun ellas.»
«Balsam per l’olma»
Adina puspè survegn il team da Musikwelle era reacziuns positivas per la concepziun dal program. Quel cumpiglia ina gronda varietad da stils da musica tradiziunals, en spezial schlagher, musica populara, ma era chansons, registraziuns da chors e da chapellas da musica instrumentala. 50 pertschient da la musica ha ina relaziun cun la Svizra. «La generaziun, a la quala ina gronda part da las audituras e dals auditurs fa part, n’ha uschiglio nagin access a ‹sia› musica», di Christian Klemm. Perquai apprezieschia ella particularmain da pudair tadlar questa musica al radio – u co ch’ina auditura scriva: «Igl è balsam per l’olma, per mia olma, d’udir ina musica uschè grondiusa.»
Di per di cuntanschan la SRG SSR numerus resuns davart ils pli differents programs. Sper vuschs criticas datti era bler feedback positiv. En la rubrica «Likes» publitgain nus ina selecziun da las reacziuns dal public e mettain en il center ils teams, als quals sa drizzan quests commentaris. Ils resuns rendan visibel l’effect da lur lavur sin il public da radio e televisiun e mussan a medem temp quant fitg che quels motiveschan ed inspireschan las persunas responsablas.
