Co che vatgas ed il slalom gigant rinforzan il turissem svizzer
«Reportaschas davart events regiunals rinforzan la schientscha per nossas tradiziuns», di Jolanda Spengler dad Appenzell Turissem. Sco chasa da medias ha la SRG SSR in’incumbensa centrala – era sco construidra da punts tranter las regiuns.
Suenter ina lunga stad ad alp turnan il cumenzament da l’atun las signunas ed ils signuns ed ils animals tradiziunalmain enavos en la val. La stgargiada d’alp è in usit sin la glista da las tradiziuns vivas en Svizra. Avant diesch onns ha in’uschenumnada «cowcam», ina camera tranter ils corns d’ina vatga, pussibilità a numerus:as aspectatur:as a chasa sin canapé invistas directas en la stgargiada d’alp ad Urnäsch en l’Appenzell Dadora.
La stgargiada d’alp è in usit sin la glista da las tradiziuns vivas en Svizra (SDA).
Davent da l’ultima giada mulscher sin l’alp fin l’arrivada ad Urnäsch ha SRF accumpagnà duas famiglias en l’emissiun speziala «Schweiz aktuell extra – Alpabfahrt Urnäsch». L’effect da la transmissiun directa da sis uras han las ustieras ed ils ustiers sentì er il di suenter: ils cornets da nuschs ed er ils auters desserts èn stads vendids ora gia il suentermezdi.
Ed il hype ha cuntinuà: il dumber da visitad:ras en la regiun è creschì marcantamain dapi l’emissiun da SRF. «Quai ha franc era da far cun la schientscha augmentada en general per tradiziuns e valurs indigenas ils ultims onns», di Jolanda Spengler dad Appenzell Turissem. «La rapportaziun naziunala multiplitgescha però anc ina giada il trend enavos a las ragischs ed als usits. Emissiuns directas rinforzan la schientscha per nossas tradiziuns.» Ina pli gronda visibilitad influenzeschia a moda positiva il turissem en il Hinterland Appenzellais, manegia Spengler vinavant.
Betg mo las ustieras ed ils ustiers na profiteschan, era la mastergnanza locala senta l’augment dal turissem. Il dumber da stans a la fiera purila è creschì fermamain, entant èsi passa 50 mintg’onn.
Formats sco «Schweiz aktuell», «Potzmusig» e «Landfrauenküche» mussan vitgs giud via, usits regiunals e particularitads localas e dattan uschia ina tribuna a las regiuns. Las reportaschas pon avair in effect positiv – sco ad Urnäsch – sin il turissem regiunal e l’economia locala. La Confederaziun maina ina glista cun las tradiziuns vivas da la Svizra; tar quellas tutga era la stgargiada d’alp:
Il turissem stgaffescha plazzas da lavur
Ils dumbers da l’uniun HotellerieSuisse mussan che turist:as indigen:as èn d’impurtanza per il turissem en Svizra. Passa 50 pertschient da tut las pernottaziuns l’onn 2022 han generà visitad:ras da la Svizra, ulteriurs var 20 pertschient ils martgads damanaivel, pia turist:as d’auters pajais europeics. En bleras regiuns svizras stgaffescha il turissem era numerusas plazzas da lavur, di Monika Bandi Tanner, la manadra dal Post da perscrutaziun dal turissem a l’Universitad da Berna (CRED-T). Plinavant haja il turissem ina funcziun integranta per las regiuns ruralas sin il stgalim economic, la valurisaziun da tschertas regiuns dependia numnadamain per 30 fin 50 pertschient dal turissem.
dr. Monika Bandi Tanner, manadra dal Post da perscrutaziun dal turissem
La SRG SSR fa punts tranter las regiuns
Reportaschas medialas – p.ex. dal FIS Ski World Cup ad Adelboden – gidan essenzialmain il turissem ad ademplir sia incumbensa sco sviluppader regiunal. Eveniments da tala grondezza na fissan betg realisabels, sche la SRG SSR n’acquistass betg ils dretgs da transmissiun, declera Bandi vinavant.
Ils bels maletgs dal Chuenisbärgli en l’Oberland Bernais dattan dapli visibilitad a la regiun e promovan uschia era la chapientscha tranter las singulas regiuns. Bandi è da l’avis ch’i saja impurtant da rapportar a la televisiun da sfidas regiunalas, sco da la mancanza da naiv u da la populaziun da lufs: «Cun sias reportaschas fa la SRG SSR punts tranter las regiuns e procura uschia per chapientscha.»
FIS Ski Weltcuprennen in Adelboden (SDA).
La manadra dal Post da perscrutaziun dal turissem a l’Universitad da Berna vesa qua dentant anc potenzial da meglieraziun. Ils mais da stad ruassaivels pudess ins nizzegiar meglier per furnir reportaschas fundadas davart temas che fatschentan il turissem, ma era la populaziun: «Pertge per exempel betg far attent pli fitg a la problematica dal stress da densitad e gidar a furnir propostas per ina soluziun?» Tenor Bandi è era la SRG SSR obligada da reparter l’affluenza da turist:as: «La rapportaziun mediala è in factur central da la dumonda turistica.»
Francesca Guicciardi, november 2023
