Reporter dad SRF fa ina donaziun da cellas-tschep – e la camera filmescha

Il format digital «rec.» tematisescha tabus. Per exempel la malsogna endometriosa, situaziuns inacceptablas en la psichiatria u terapias da conversiun dispitaivlas per omosexuals. Ultra da quai dattan las reportras ed ils reporters er invistas en lur viadi fitg persunal.  

Il reporter Christoph Muggler è gia dapi passa trais uras en il letg da l’ospital ed ins vesa ch’el ha plaunsieu avunda. Ses sang cula tras ina canula en ina maschina che filtrescha las cellas-tschep. Il tractament dura anc duas uras. Il pli gugent interrumpess el la procedura, ma i va per bler. Insanua sin quest mund spetga la retschavidra u il retschavider exact sin questas cellas che culan uschè nunditg plaun or da ses corp. La finala vegn l’assistenta da tgira sperasvi ed augmenta in pau la flussiun. Ussa duessi ir pli svelt.  

Avant set onns è l’anteriur student Christoph Muggler s’inscrit tar la Crusch Cotschna en il register da donaturas e donaturs da cellas-tschep dal sang: «Jau hai pensà da far uschia insatge dal bun e che fa senn: nagina gronda chaussa per mai ed in effect positiv per umans cun ina greva malsogna dal sang.» 

Ma el saja alura tuttina stà surprais, cura ch’il telefon haja scalinà durant sias vacanzas ed igl haja gì num ch’ins dovria uss exact sias cellas-tschep dal sang. Quai è stà l’avust 2022. Il settember ha el gì da far in test medical, l’entschatta d’october è il sang vegnì filtrà. Per el, en il fratemp redactur da sport tar SRF e videoschurnalist versà, èsi stà cler ch’el veglia filmar quest mument. Uschia ha el proponì il tema a la redacziun da «rec.». Là è el fruntà sin ureglias avertas cun ses giavisch da realisar in rapport d’experientscha persunal. Ed uschia han las aspectaturas ed ils aspectaturs pudì accumpagnar el en l’ospital universitar e guardar co ch’el ha fatg il test medical, co ch’el ha dà mintga di squittas a sasez e co ch’è sa splegada la procedura da tschintg uras per filtrar las cellas-tschep or dal sang.  

«rec.» stat per «record». Il format exista dapi dus onns ed è s’etablì en curt temp. El vegn publitgà sin il chanal da Youtube dad «SRF Dok» e preschentà er en la televisiun, per exempel sin il plaz d’emissiun da «Reporter». La gruppa en mira primara èn persunas tranter 25 e 35 onns. Impurtant è er il barat cun il public da Youtube. Da mintga sequenza fa part ina glista da dumondas e respostas frequentas e suenter mintga reportascha vegn emessa in’ediziun da «rec.» che tematisescha ils resuns e las reacziuns da la community.

En il cas da la reportascha davart la donaziun da cellas-tschep dal sang èn bunamain tut ils resuns stads positivs. Ed ella ha gì in effect secundar legraivel: suenter la publicaziun da la reportascha èn s’inscrittas tar la Crusch Cotschna marcantamain dapli persunas che vulan far ina donaziun da cellas-tschep dal sang.

«Nus vulain tractar temas cuntravers, dar in’invista en munds da viver nunenconuschents ed era scuvrir cundiziuns inacceptablas», di Ilona Stämpfli, producenta dal format. Per discussiuns en la communitad han per exempel procurà las reportaschas davart ils stgelladers per la libertad u davart teorias conspirativas che fan gronds donns ad umans cun ina malsogna psichica. Era la reportascha davart umans ch’èn sa decidids conscientamain per ina vita senza uffants ha dà bler da discutar. 

Quant problematic èsi d’exponer las reportras ed ils reporters a talas experientschas al cunfin? Ilona Stämpfli: «Per nus n’èn quai betg experientschas al cunfin. Ma la producziun sco tala pretenda effectivamain bler da las reportras e dals reporters. Els viagian sulets cun la camera e filmeschan sasezs e tut quai che capita. Els prendan posiziun, mussan lur fatscha e s’exponan uschia fitg ferm. Duas producentas cusseglian e sustegnan perquai las reportras ed ils reporters durant la producziun e la discussiun suandanta.» 

Daniela Huwyler, zercladur 2023