«L'economia e la SRG SSR èn en la medema bartga»

Interprendid:ras futur:as duain emprender da pensar e d’analisar a moda critica. La SRG SSR porscha maun e lantscha in partenadi cun las scolas professiunalas spezialisadas che duai preparar ils giuvenils uschè bain sco pussaivel per il martgà da lavur. 

En il rom dal program d’emprender «myidea» s’acquistan las absolventas ed ils absolvents da scolas professiunalas spezialisadas cumpetenzas d’interprendider cun sviluppar sur pliras emnas atgnas ideas da fatschenta ed experimentar cun quellas. Las ideas che naschan en quest ambient èn per exempel l’app «Zeitverbringer» u la bavronda energetica «mtea». Quella vegn producida a Lucerna. Ella na cuntegna nagin zutger, vegn fatga a basa da maila ed è in’alternativa als drinks d’energy usitads. L’app «Zeitverbringer» pussibilitescha ad umans attempads da participar puspè pli activamain a la vita.  

In’ulteriura idea da fatschenta è «trueso» ch’il scolar Pascal Straumann ha sviluppà per cumbatter fake news. Legiai qua l’entir artitgel. 

Per agir tenor princips d’interpresa èsi d’impurtanza centrala da pensar a moda critica e d’analisar bain las infurmaziuns. Tenor Rolf Schmid, mainafatschenta da la Promoziun da l’economia dad Olten e Schweizerischen Zentrum für Unternehmerisches Denken und Handeln (szUDH), na basti betg da savair elavurar in plan da business. In’abilitad decisiva sin il martgà da lavur è era da savair analisar il plan da business a moda critica: «Nus duvrain questas cumpetenzas per in’economia stabila. Pensar tenor princips d’interpresa ed analisar a moda critica èn abilitads centralas per rinforzar la cumpetitivitad ed il potenzial d’innovaziun da la Svizra.» 

In pensar critic augmenta las schanzas da las giuvnas absolventas e dals giuvens absolvents da scolas professiunalas spezialisadas sin il martgà da lavur. Jan Fülscher, l’expert per interpresas start-up, è persvas: «Igl è la premissa fundamentala per manar cun success in’interpresa. Ins metta en dumonda il status quo: Pudain nus far meglier quai? Duvrain nus quai? Pudain nus ir autras vias?»  

Savair pensar a moda critica ed avair cumpetenzas medialas èn er abilitads indispensablas per la democrazia directa. Perquai sustegna la SRG SSR il program d’emprender «myidea» da la Conferenza svizra da las directuras e dals directurs da las scolas professiunalas spezialisadas (SDK-CDS).  

Tenor Schmid è quai ina situaziun da win-win: «Nus essan en la medema bartga e pudain profitar ina da l’autra. La SRG SSR s’engascha activamain en il cumbat cunter fake news. Nus sco responsabels dal project pudain emprender da questa expertisa e la dar vinavant cuminaivlamain.» Er il barat necessari per realisar il project saja impurtant per meglierar la relaziun tranter las collavuraturas ed ils collavuraturs da las medias e las acturas ed ils acturs da l’economia e crear fidanza vicendaivla.  

L’economia e la SRG SSR han ina finamira cuminaivla: promover ina societad ed ina democrazia che funcziunan bain. «L’economia ha interess d’ina democrazia che sa basa sin fatgs ed opiniuns. La premissa per quai èn rapports da medias equilibrads.» A l’exempel da l’USA vesian ins fitg bain tge influenza problematica che las medias polarisantas hajan sin la separaziun da la societad. La SRG SSR saja perquai ina stabilisatura impurtanta, di Schmid.  

I saja impurtant d’infurmar la populaziun a moda equilibrada, fundada ed or d’optica svizra, uschia ch’ella saja capavla da metter en il context era novitads da l’economia, d’analisar quellas criticamain e da scuvrir fake news. Quai saja essenzial per pudair furmar pli tard in’atgna opiniun – er a chaschun da votaziuns.  

Francesca Guicciardi, avrigl 2023