«Grazia a la preschientscha mediala daventa il ballape da dunnas era commerzialmain pli impurtant»
Il plaschair è grond: suenter l’Engalterra il 2022 vegn il campiunadi europeic da ballape da dunnas il 2025 en Svizra.
La stad passada è l’agitaziun stada gronda en il stadion da Wembley a Londra. Prest 90’000 aspectatur:as èn stad:as da la partida en directa durant il final dal campiunadi europeic tranter l’Engalterra e la Germania. En pli han var 250 milliuns aspectatur:as en 195 pajais persequità il final a la televisiun. Seraina Degen, redactura da sport da SRF, sa regorda: «L’atmosfera è stada grondiusa e paschaivla, il public fitg divers. Antruras gievan plitost famiglias cun uffants a guardar gieus da ballape da dunnas, oz fan quai persunas da tut las vegliadetgnas. Era blers umens. Igl è in sport per tuttas e tuts.»
Ins senta anc adina l’interess cleramain augmentà per il ballape da dunnas, ma la schurnalista da sport admonescha: «Il ballape da dunnas internaziunal sa sviluppa enormamain. La Svizra sto far attenziun da restar al current.»
Per ballapedistas professiunalas signifitga la carriera per il pli ina chargia dubla: «Las bleras lavuran u studegian a temp cumplain. Igl èn lungs dis per las giugadras da ballape d’elita. Las dunnas prestan en quel connex dapli ch’ils umens», constatescha Degen. Perquai èn transmissiuns en la televisiun impurtantas. La visibilitad procura per interess, il gener da sport survegn dapli impurtanza commerziala e po damai sa sviluppar e sa professiunalisar vinavant.
La preschientscha mediala ha dà schlantsch al ballape da dunnas. In’intervista (DE) cun Tatjana Haenni, l’anteriura directura dal ballape da dunnas tar l’Associaziun svizra da ballape.
Dapi intgins onns transmetta la SRG SSR ils gieus da l’AXA Women’s Super League svizra. Marion Daube, dapi il 2022 directura dal ballape da dunnas tar l’Associaziun svizra da ballape, appreziescha l’engaschi da la SRG SSR en favur dal ballape da dunnas.
Las transmissiuns en la televisiun sajan da gronda impurtanza e la basa per ulteriurs svilups. Ins n’haja però anc betg cuntanschì la finamira: «Nus vulain esser ina part fixa dal program medial e betg mo interessantas, cura ch’i sa cunfa gist cun il chalender u sch’igl èn planisads gronds turniers u gieus. In sguard en noss pajais vischins, per exempel en Germania, mussa ch’ils gieus da las dunnas vegnan mussads là mintg’emna en la televisiun. Quai sto er animar nus.»
La dumonda da la paja penda anc adina en l’aria. Ils ultims onns è girà in pau, ma l’egualitad è anc ditg betg cuntanschida. La stad passada han ins adattà las premias da la squadra naziunala svizra da las dunnas a quellas dals umens. Ils bonus per qualificaziuns per ils campiunadis europeics u mundials dal sponsur principal correspundan uss in a l’auter, però betg quels da l’Associaziun svizra da ballape.
Susy Schär, l’anteriura scheffa dal sport tar Radio SRF, pretenda en pli che mintga club da la Super League promovia explicitamain ultra da la generaziun giuvna er il ballape da dunnas. Per ella è il ballape da dunnas il pli grond moviment d’emancipaziun en il sport: «Ussa mo betg dar luc!»
Questa stad transmetta SRF tut ils gieus dal 9avel campiunadi mundial da ballape da las dunnas (FIFA Women’s World Cup) che ha lieu dals 20 da fanadur fin ils 20 d’avust 2023 en l’Australia ed en la Nova Zelanda. SRF è avant lieu cun in team da set persunas e rapporta cuntinuadamain en la televisiun, al radio e sin las plattafurmas online.
1. gieu, ils 21 da fanadur: Svizra cunter las Filippinas
2. gieu, ils 25 da fanadur: Svizra cunter la Norvegia
3. gieu, ils 30 da fanadur: Svizra cunter la Nova Zelanda
Plinavant producescha la SRG SSR tut ils 119 gieus da l’AXA Women’s Super League. Dapi la stagiun 2020/21 mussan ils emetturs da la SRG SSR topgieus tschernids da l’AXA Women’s Super League sco er il final dal cup en directa en la televisiun u era sin las plattafurmas online.
Daniela Huwyler, avrigl 2023
