Agid digital per tatta e tat

Durant ils Hackdays da la SRG SSR lavuran hacker:as di e notg vi dal svilup da trics tecnics. 2023 e tranter auter resultà in accumpagnader online per senior:as.

Anc svelt far las cumpras da l’emna u cudeschar il viadi cun il tren directamain sin sbb.ch. Quai che simplifitgescha la vita a bleras persunas po esser cunzunt per glieud pli veglia in impediment. Senior:as na vegnian betg accumpagnad:as e sustegnid:as avunda en il mund online, quai constatescha Sacha Jocic, participant dals Hackdays 2023. Ensemen cun ses team ha el perquai elavurà l’assistenza tecnica «TechToSenior». Il project persvada e fa il segund plaz.

«
Nus avain vulì mussar la diversitad e la ritgezza da la scena da musica svizra a moda ludica.»
manader da la plattafurma da musica mx3.ch

Ils projects realisads als Hackdays èn uschè divers sco ils basegns da nossa societad. Il 2022 èn per exempel stadas en il center las persunas activas sin il champ musical: «Nus avain vulì mussar la diversitad e la ritgezza da la scena da musica svizra a moda ludica», declera Samuel Vuillermoz, manader da la plattafurma da musica mx3.ch. Cun in’applicaziun-web che pussibilitescha in viadi virtual è quai reussì als Hackdays da la SRG SSR. Persunas interessadas pon oz per exempel scuvrir uschia tge musicist:as ch’èn oriundas dad Uri u co che tunan chanzuns dal Vad. Las playlists vegnan generadas automaticamain tenor regiun. Video a davart la «Tour de Suisse»:

«Tour de Suisse»

Hackdays numn’ins era hackatons –  ina cumposiziun da «hacking» (elavurar trics tecnics) e maraton. Il punct da partenza è ina dumonda u in problem, vi dal qual ina gruppa da persunas lavura durant in curt temp senza barrieras mentalas.

En il rom dals Hackdays da la SRG SSR sa fatschentan sviluppad:ras d’IT, design:ras, schuranlist:as ed auters chaus creativs cun ina sfida u in basegn d’utilisad:ras e lavuran dus dis cuminaivlamain vi da soluziuns e novas avischinaziuns. Lur devisa: fixar uschè paucas reglas sco pussaivel. Empè da baiver bler café avair a disposiziun in grond volumen da datas transferibel dal WLAN ed ina massa datas. Ils teams interdisciplinars creeschan novas apps e visualisaziuns sco era novs algoritmus.

«A mai plascha cunzunt l’ambient creativ ed il barat cun collegas da tut la Svizra», di Samuel Vuillermoz. La discussiun cuntinueschia la saira durant baiver ina biera, quai mussia la gronda passiun da las persunas participadas. La finala profiteschia il public – sch’i dat novs formats ch’el po trair a niz. Ils ultims onns èn resultads per exempel in Customer Support Bot ubain in’applicaziun-web per identifitgar deepfakes:

Quest onn è la SRG SSR sa colliada cun l’Open Hackathon a Genevra, l’uschenumnà Festival d’Innovation. Questa occurrenza è stada averta per tut:tas –  ensemen cun il persunal da la SRG SSR, universitads e raits da partenari:as ha la populaziun sviluppà ideas e respostas che portan innovaziuns sin il sectur da la scienza, da la tecnologia e da l’art e che contribueschan al bainstar general da la societad. Las meglras ideas da Genevra reprendan ils Hackdays da la SRG SSR l’atun e las sviluppeschan vinavant. Scuvri en quest artitgel «TechToSenior» ed ils auters projects victurs.

Henriette Engbersen, avrigl 2023

«L'economia e la SRG SSR èn en la medema bartga»

Interprendid:ras futur:as duain emprender da pensar e d'analisar a moda critica. La SRG SSR porscha maun e lantscha in partenadi cun las scolas professiunalas spezialisadas che duai preparar ils giuvenils uschè bain sco pussaivel per il martgà da lavur. 

Da la SRG SSR profita l'entira economia svizra

La SRG SSR è in'actura impurtanta en il martgà svizzer ed influenzescha positivamain l'economia. Ella è patruna e creescha plazzas da lavur er en autras branschas. Quests effects positivs per la creaziun da valur cumprova in studi fatg per incumbensa da l'Uffizi federal da communicaziun UFCOM.  

SRF (RTS/RSI) tranter ils top 20 che porschan ina plivalur per la societad

La Rega, la Spitex e la Pro Senectute occupan ils emprims plazs en la rangaziun da las interpresas ed organisaziuns che prestan servetschs a favur dal bainstar public. S'engaschar per la societad è in trend, declera Timo Meynhardt da la HSG che edescha l'Atlas dal bainstar public.