Dapli che gieus, giubileums e giudiment: pertge che nus duvrain il divertiment

Las emissiuns da divertiment n’han betg simpel. Cuntrari a las emissiuns d’infurmaziun vegnan ellas savens consideradas sco nunnecessarias. Quai è fallà. Pertge mussa ina collecziun da resultats da perscrutaziun davart la valur sociala dal divertiment.

Betg legher. Memia banal. Nunnecessari. E la dumonda eterna: vala quai propi las taxas ch’i custa?

Emissiuns da divertiment vegnan savens crititgadas fermamain. La davosa giada per exempel la nova emissiun da la SRG SSR «Late Night Switzerland» cun Stefan Büsser, ma er emissiuns cumprovadas sco «Happy Day» u«Tatort». E schizunt formats populars dapi ditg sco las «istorginas da buna notg» vegnan valitads criticamain, cura ch’i va per la dumonda, sche quai fa part dal service public.

Ma las emissiuns da divertiment han nungiustifitgadamain in nausch num: ellas èn impurtantas per ina societad. Divertiment è bler dapli che mo gieus, giubileums e giudiment, dapli che mal il cor ed emigrant:as che laschan encrescher. Divertiment po promover la solidaritad d’ina societad, la chapientscha vicendaivla e l’empatia, el po educar e politisar. A questa conclusiun vegn in studi internaziunal davart l’impurtanza dal divertiment da chasas da medias publicas.

Contribuziuns da dudesch scienzia:das

En il studi inizià da l’ORF e sustegnì da diversas chasas da medias da dretg public europeicas examineschan dudesch scienzia:das il tema da differentas perspectivas. Las contribuziuns èn scrittas per gronda part a moda bain chapibla, malgrà ch’ellas èn scientificas e sa drizzan ad in public spezialisà. Ellas decleran tranter auter pertge ch’il divertiment è in’incumbensa da dretg public e pertge che quest champ na duai betg vegnir surlaschà mo a las chasas da medias privatas. In argument: sco interpresas economicamain activas sa focusseschan las medias privatas sin in gudogn. Ellas na pon (u na vulan) betg u mo per part sa prestar emissiuns da divertiment d’auta qualitad.

Tge ch’il divertiment sto prestar per ch’el saja relevant

Ma tge caracterisescha in divertiment che porta ina plivalur a la societad? Questa dumonda emprovan da sclerir duas auturas da l’Universitad da Leipzig. Ellas defineschan quatter funcziuns centralas ch’il divertiment socialmain relevant sto ademplir.

Uschia ha il divertiment ina funcziun integrativa: el pledenta differentas gruppas socialas e creescha uschia occasiuns da barat e da cuminanza. Cun auters pleds: i collia, sche nus ans barattain il glindesdi davart il «Tatort».

La segunda caracteristica è la funcziun infurmativa: ella è impurtanta surtut per umans che nizzegian uschiglio pauc las medias d’infurmaziun. Emissiuns da divertiment d’auta qualitad porschan infurmaziuns realisticas e bain chapiblas. Cun auters pleds: sche «Büssi» fa ina sgnocca davart in’intervenziun politica, vegnin nus quasi a savair en passant dapli davart questa intervenziun e ses motivs.

La funcziun intermedianta dal divertiment va anc in zichel pli lunsch: ella signifitga ch’il divertiment intermediescha dumondas politicas e socialas a moda emoziunala. Quai promova l’empatia dal public ed augmenta l’interess al discurs social ed a la participaziun politica. Cun auters pleds: sche Mona Vetsch è cun sia emissiun «mittendrin» tranter persunas pertutgadas da la povradadad, n’è quai betg mo in’emissiun divertenta che bitta la moderatura en l’aua fraida, per che nus sco public possian guardar, sch’ella vegn da sa tegnair sur l’aua. Nus vegnin intimads da reflectar davart la povradad e las structuras socialas, forsa d’ans engaschar en la politica. Sco ultima funcziun vegn numnada la funcziun protectiva: divertiment da buna qualitad tracta temas a moda sensibla e responsabla, na cuntegna naginas infurmaziuns faussas e nagins cuntegns discriminants.

Co che la televisiun per uffants contribuescha al svilup

Il rapport na mussa betg mo la perspectiva da la societad sco entira: las singulas contribuziuns sa refereschan a gruppas da vegliadetgna specificas. Ina preschenta a maun da differents exempels d’emissiuns per uffants che e co che quellas pon esser preziusas per il svilup dals uffants. Emissiuns divertentas per uffants pon tranter auter contribuir a la furmaziun da l’identitad e da las valurs da las aspectaturas e dals aspectaturs giuvens. Sch’ils uffants guardan damai «Pingu» sco istorgina da buna notg, è quai dapli che tschintg minutas nunchapiblas d’ina figura modellada animada. Uschia vegnan intermediads als uffants temas sco fairness u amicizia.

Sco en questa contribuziun dat il studi invistas scientificamain fundadas ed interessantas en la funcziun dal divertiment en general ed en il divertiment en la televisiun publica en spezial. El mussa: tge ch’è bun divertiment po e sto vegnir discutà, gist er en in temp ch’il diever da las medias sa mida. I na dat dentant nagin dubi ch’el è relevant per ina societad e cun raschun in’incumbensa da dretg public.

Malolo Kessler, mars 2024