Sch'il chat da gruppa daventa la trapla da fake news
Ins senta la tensiun cura ch’ils teams preschentan lur ideas. I va per dapli che mo ina concurrenza – i va per ina dumonda che influenzescha il mintgadi da bleras persunas giuvnas: Co vegnin nus a frida cun fake news? Co rinforzain nus la cumpetenza da medias da las persunas giuvnas?
Durant la concurrenza myIdea Challenge 2026 han trais teams preschentà lur respostas concretas en connex cun il tema dischinfurmaziun. La concurrenza d’ideas naziunala ha pretendì dad emprendistas e d’emprendists da scolas professiunalas da tut la Svizra d’analisar problems da la societad e da preschentar atgnas soluziuns – datiers da la pratica, a moda creativa ed en stretg connex cun lur mintgadi.
La SRG SSR s’engascha cun cleras intenziuns en la categoria «fight fake news» e sustegna projects che rinforzan la cumpetenza da s’infurmar da persunas giuvnas. Pertge che dischinfurmaziun capita là, nua che nus communitgain mintga di.
Damian Haas, redactur da SRF Kids e SRF school
maletg: SRG SSR
Per bleras emprendistas e blers emprendists n’èn fake news betg in fenomen abstract. Ellas ed els inscuntran di per di fake news – savens en chats privats u en raits socialas. Precis là han Jana ed Elina, duas giuvnas cun spiert critic, cumenzà a sviluppar lur soluziun premiada. Ellas èn sa fatschentadas intensivamain cun la dumonda, co che la dischinfurmaziun sa derasa en spazis da communicaziun digitals – e co ch’ins po reagir directamain sin quai.
Lur idea: in bot integrà en gruppas da WhatsApp che gida ad ordinar infurmaziuns. Cun quel duain las utilisadras ed ils utilisaders survegnir directamain in avis, sch’ils cuntegns èn fidabels u sch’els ston vegnir contextualisads a moda critica.
Jana ed Elina, victuras da la concurrenza myidea Challenge 2026
maletg: SRG SSR
Emprender nua ch’i daventa relevant
L’idea mussa a moda exemplarica quai che caracterisescha la concurrenza myIdea Challenge: Las emprendistas ed ils emprendists na lavuran betg mo teoreticamain vi d’in tema, mabain sviluppan soluziuns per situaziuns realas. Quai rinforza cumpetenzas centralas sco il pensar critic, la chapientscha mediala e la responsabladad persunala – damai abilitads decisivas en in spazi public pli e pli digitalisà.
Era per la SRG SSR è quest engaschament central. Surtut projects da scolaras e scolars da las scolas professiunalas spezialisadas sajan prezius, perquai ch’els èn datiers al mintgadi da las persunas giuvnas.
Che la categoria «Fight Fake News» chatta grond interess na fa betg surstar. La dischinfurmaziun influenzescha las opiniuns, las discussiuns e la finala er ils process democratics.
Impuls per l’instrucziun
Per persunas d’instrucziun porscha la concurrenza puncts da referiment concrets: Ella mussa, co che la cumpetenza da medias po vegnir intermediada a moda efficazia, sch’ella è colliada cun sfidas realas.
Sche las emprendistas ed ils emprendists sviluppan, discutan e preschentan atgnas ideas, chapeschan ellas ed els pli spert e meglier co utilisar infurmaziuns – e survegnan uschia ina conscienza per l’atgna responsabladad en il spazi digital.
Co che questas ideas naschan, co e cun tge persvasiun ch’ellas vegnan preschentadas da las emprendistas e dals emprendists, mussa l’aftermovie tar la concurrenza myIdea Challenge 2026.
Guarda ussa il video e ta lascha inspirar.
Jacqueline Matzinger, avrigl 2026
