«Grazia a vus hai jau quasi pudì far part dal declin da la CS»
In onn suenter la fin da la Credit Suisse il mars 2023 publitgescha SRF News Plus Hintergründe in podcast che porta a la glisch eveniments ch’eran fin ussa pauc enconuschents. Ils resuns dal public mussan quant impurtantas che talas retschertgas approfundadas èn.
Ina cussegliera federala en il modus da crisa. Collavuratur:as da la CS en in carussel d’emoziuns. Agids finanzials, tractativas secretas, ina conferenza da medias: La seria da podcasts «Das Ende der Credit Suisse», realisada da SRF il mars 2024, declera tge ch’è succedì las ultimas 100 uras avant ch’ins ha fatg public il declin da la banca gronda.
Ed ella commuventa: «Nus n’avain anc mai survegnì uschè blers resuns d’audituras e d’auditurs», di Raphaël Günther, il host da la seria e vicemanader da SRF 4 News.
Il team da Raphaël Günther: Nicolas Malzacher ed Oliver Kerrison cun la producenta Céline Raval (da sanestra a dretga)
Bild: zVg.
Il podcast chatta buna accoglientscha. In auditur lauda l’auta qualitad da l’emissiun ed è intgantà da quella. In auter ha recumandà la seria er a ses figl da 14 onns: «Ed era lez ha tadlà l’entira episoda senza paus. Il designer dal tun avess merità in Oscar per sia lavur.»
Per las tschintg episodas dal podcast ha il team da SRF manà durant plirs mais numerus discurs approfundads ed ha intervistà dudesch actur:as. «In project da tala dimensiun funcziuna mo sco teamwork», di Raphaël Günther. En la gronda part dals resuns han las audituras ed ils auditurs simplamain engrazià. «Bleras persunas han scrit a nus ch’ellas chapeschian ussa finalmain tge ch’è capità cun la CS.» Ils numerus resuns positivs da l’auditori legran l’audioschurnalist. «Els mussan quant impurtant ch’igl è da raquintar las retschertgas a moda accessibla e da crear uschia la chapientscha dal public per relaziuns cumplexas. Ils resuns mussan: Gea, quai che nus faschain fa propi senn.»
tadlar il podcast
Das Ende der Credit Suisse (1/5)
Das Ende der Credit Suisse (2/5)
Das Ende der Credit Suisse (3/5)
Das Ende der Credit Suisse (4/5)
Das Ende der Credit Suisse (5/5)
Malolo Kessler, actualisà il schaner 2025, publitgà l’emprima giada il matg 2024
Di per di cuntanschan la SRG SSR numerus resuns davart ils pli differents programs. Sper vuschs criticas datti era bler feedback positiv. En la rubrica «Likes» publitgain nus ina selecziun da las reacziuns dal public e mettain en il center ils teams, als quals sa drizzan quests commentaris. Ils resuns rendan visibel l’effect da lur lavur sin il public da radio e televisiun e mussan a medem temp quant fitg che quels motiveschan ed inspireschan las persunas responsablas.
