«Igl è impurtant ch'i dat schurnalist:as che prendan temp per retschertgar a fund»
Il schurnalissem investigativ è impurtant per nossa democrazia: Quai mussan ils resuns d’ina retschertga da swissinfo.ch davart imports d’aur dubius che fatschentan era la politica.
Arriva aur da la Russia malgrà sancziuns internaziunalas en Svizra? Las schurnalistas Dominique Soguel e Pauline Turuban èn sa deditgadas per SWI swissinfo.ch a questa dumonda.
Ellas èn suandadas ils fastizs d’imports d’aur dubius: Las schurnalistas da SWI Pauline Turuban (a sanestra) e Dominique Soguel.
maletg: MAD
Lur retschertga investigativa dal settember 2024 davart l’augment d’imports d’aur dubius dal Kasachstan e da l’Usbekistan ha sveglià in grond eco. «Igl è impurtant ch’i dat schurnalist:as che prendan temp per retschertgar a fund e ch’infurmeschan la vasta publicitad davart tals temas», uschia ha per exempel tunà il resun d’in lectur che lavura per ina NGO.
«Quai na sa chapescha betg da sez»
L’onn 2024 èn Dominique Soguel e Pauline Turuban suandadas durant var set mais ils fastizs da l’aur. «Igl è in privilegi da lavurar en in’interpresa da medias che pussibilitescha talas retschertgas», laudan las schurnalistas lur patruna. Ellas n’hajan betg mo gì plaschair dals numerus resuns dal public – «il motiv effectiv, per il qual nus lavurain» – mabain era che la gronda part da las lecturas e dals lecturs hajan legì l’artitgel enfin la fin. «En in temp ch’ils umans han mo curtas capacitads d’attenziun, ed en vista al temp da lectura da var ina mes’ura e la cumplexitad dal text na sa chapescha quai betg da sez.»
Il Cussegl federal confermà ils resultats da la retschertga
Las revelaziuns han er intimà politic:ras da reagir: Jean Tschopp, cusseglier naziunal da la PS, ha engrazià persunalmain a las schurnalistas ed inoltrà l’atun 2024 in’interpellaziun en connex cun ils imports d’aur da l’Asia Centrala. En sia resposta ha il Cussegl federal concedì che aur da la Russia possia chattar la via en Svizra ed ha uschia confermà ils resultats da la retschertga. Tschopp n’è betg stà cuntent cun questa resposta ed ha inoltrà ina segunda intervenziun areguard quest tema. Sin stgalim professiunal saja quest interess politic fitg cuntentaivel, sa legran Dominique Soguel e Pauline Turuban. «El conferma la vardaivladad da nossa lavur e rinforza uschia la reputaziun da nossa interpresa da medias sco funtauna d’infurmaziun fidabla.»
Malolo Kessler, actualisà il favrer 2026, publitgà l’emprima giada il schaner 2025
Di per di obtegna la SRG SSR numerus resuns davart ils pli differents programs. Sper vuschs criticas datti era bler feedback positiv. En la rubrica «Likes» publitgain nus ina selecziun da las reacziuns dal public e mettain en il center ils teams, als quals sa drizzan quests commentaris. Ils resuns rendan visibel l’effect da lur lavur sin il public da radio e televisiun e mussan a medem temp quant fitg che quels motiveschan ed inspireschan las persunas responsablas.
