Wetube — spazi per ils chaus digitals ils pli creativs
Wetube permetta da filmar cuntegns da video, registrar podcasts e tagliar quels ed offra ultra da quai tutorials e lavuratoris per meglierar la cumpetenza da s’infurmar.
La pussaivladad da crear podcasts e videos d’auta qualitad è ozendi in instrument da communicaziun indispensabel. Las generaziuns giuvnas èn versadas cun las medias digitalas ed han ideas brigliantas, ma savens las mancan ils meds tecnics correspundents u las cumpetenzas per crear products d’auta qualitad. Disads dad esser consuments passivs da cuntegns audiovisuals, midan mo paucs sin l’autra vart e tschertgan il schlantsch ed il spazi per … crear! Wetube è vegnì stgaffì per satisfar a quests basegns. I sa tracta d’ina plazza da giugar innovativa che stat a disposiziun als giuvenils digitals ils pli creativs da la Svizra taliana.
Ils workshops ed il local da Wetube.
In studio sa chatta a Besso ed il schaner e favrer 2024 han ins avert dus novs studios a Bellinzona resp. a Mendrisio. Wetube metta a disposiziun gratuitamain locals equipads per la producziun e la postproducziun ed offra cun We Learn purschidas da furmaziun per meglierar la cumpetenza da s’infurmar e las enconuschientschas medialas.
La forza integrativa dal «nus» (we) …
Christian Testoni, il responsabel da Wetube e da l’offerta digitala RSI Kids raquinta: «Grazia a nossa tenuta integrativa è il dumber da giuvenils che sa drizzan a nus per realisar lur ideas creschì a moda exponenziala ils ultims dus onns. Creschidas èn però era las sinergias cun scolas, uniuns ed autras gruppas che han interess d’approfundar lur cumpetenzas audiovisualas. Nus organisain classas da master e curs approfundants sco porta d’entrada en il mund da las creaziuns digitalas.»
![Image](https://publicvalue.srgssr.ch/wp-content/uploads/2024/04/Vorlage-Website-Bilder-29-708x472.jpg)
Christian Testoni
Per l’inauguraziun dal nov spazi a Bellinzona han ins offert il lavuratori Promover l’agen project: co realisar il pitch perfetg? Las participantas ed ils participants han pudì scuvrir cun l’agid d’expertas e d’experts dal storytelling e videomaking las tecnicas ed ils instruments ch’èn adattads il meglier per raquintar l’agen project en in video da 40 secundas. «Nus preschentain regularmain Wetube en scolas e savens ans contacteschan scolar:as che han prendì part a las preschentaziuns per sviluppar lur projects ensemen cun nus», di Christian Testoni.
In punct da partenza per cread:ras da cuntegns digitals
Avant dus onns ha in ami da Dave Wong raquintà ad el da Wetube … «Jau lavurava ensemen cun in ami vi d’in project fotografic da cosplay e nus eran a la tschertga d’in studio cun in greenscreen, la localitad a Besso è pia stada perfetga per nus», raquinta Dave Wong.
![Image](https://publicvalue.srgssr.ch/wp-content/uploads/2024/04/Vorlage-Website-Bilder-28-1-708x472.jpg)
Dave Wong
«Jau aveva gia mes equipament da fotografar e far videos, ma sche jau avess udì gia avant da Wetube, avess jau franc fatg diever stedi da la purschida: per in creader da cuntegns digitals che fa ses emprims pass sin quest champ èsi in grond luxus d’avair a disposiziun tut quai ch’el dovra e da pudair prender part gratuitamain a lavuratoris davart quest tema!»
Questas purschidas permettan da sa concentrar sin il process da producziun e sin la creativitad senza vegnir franà da la mancanza d’equipament e d’ina localitad adattada. Dave sa regorda d’avair tschertgà mais a la lunga insatgi che avess mess a disposiziun ad el in spazi per experimentar avant ch’entrar en in studio da fotografia. «Savens na pudeva jau gnanc exercitar, jau stueva ma cuntentar cun guardar e spustar vi e nà lampas, tastgas e satgados per ils differents sets. Wetube schlia quest problem cun offrir in lieu, nua ch’ins po experimentar libramain cun il sustegn d’expertas e d’experts.»
Wetube ed USI: ina sinergia da success
Wetube collavura regularmain cun differentas instituziuns da furmaziun en il Tessin. La finamira è da permetter a scolar:as da differenta provegnientscha e vegliadetgna da sa famigliarisar cun ils meds da la communicaziun digitala. «Nus essan ans basads sin Wetube, cura che nus avain cumenzà a sviluppar curs che cumpiglian in lavuratori audiovisual», declera Eleonora Benecchi, PhD e docenta da perscrutaziun a l’Universitad da la Svizra taliana. «La pussaivladad d’avair a disposiziun quest spazi avert per tuts che permetta d’entrar en la producziun digitala è in grond regal per nus e per l’entira societad.»
![Image](https://publicvalue.srgssr.ch/wp-content/uploads/2024/04/Vorlage-Website-Bilder-30-708x472.jpg)
Eleonora Benecchi, docenta a l’Universitad da la Svizra taliana
Per ils curs Culturas digitalas e Teoria e producziun audiovisuala (BA) e Social Media Management (MA) da l’USI offra questa collavuraziun in lieu fisic, nua che las studentas ed ils students pon far experientschas praticas en il mund da la producziun audiovisuala e sa barattar cun expertas ed experts. Da la collavuraziun cun Eleonora Benecchi èn resultads era lavuratoris che collian la part teoretica da la furmaziun audiovisuala cun ina part pli operativa e pratica. «Ils lavuratoris permettan d’entrar en il coc da la creaziun digitala cun animar da reflectar il senn dal diever dals meds da communicaziun, las differentas modas e tecnicas che stattan a disposiziun per transmetter in messadi ed ils aspects etics», declera ella.
Per la docenta universitara sa tracti da lieus prezius che stimuleschan la creativitad en il pli vast senn. «I n’è betg mo la pussaivladad d’avair access ad instruments e tecnologias che la gronda part da las persunas na po simplamain betg sa prestar u na sa betg duvrar», di ella e ponderescha. «Wetube offra in support real a giuvenils (ma er ad auters) che han insatge da dir. Per ina societad, en la quala il maletg e cuntegns audiovisuals daventan adina pli preschents en il mintgadi, en la quala nus vesain il mund tras in smartphone, èsi fundamental ch’i dettia la pussaivladad da betg mo absorbar, mabain era da crear e communitgar». Retschertgas actualas conferman ch’il dumber enorm da cuntegns che nus survegnin di per di blochescha il schlantsch creativ. Il spazi mess a disposiziun da Wetube envida las generaziuns giuvnas da giugar ina rolla activa, da s’avrir e d’experimentar.
Keri Gonzato, mars 2024
Eleonora Benecchi, PhD e docenta da perscrutaziun a l’Universitad da la Svizra taliana. Ses interess da retschertga principals èn tranter auter la communitad da fans en l’internet, la cultura participativa cun accent particular sin la diffusiun da cuntegns da la cultura da pop en las medias socialas ed il consum da medias da las generaziuns giuvnas.