«Radar»: Giuv:nas artist:as en il focus

Mintga mais dat in nov format da RTS ad in talent ambizius da la scena da musica en Svizra franzosa ina plattafurma sin divers chanals. Grazia a «Radar» augmentan las artistas ed ils artists lur renum e contribueschan ad ina diversitad pli gronda da la scena da musica.

Steff la Cheffe, Lo & Leduc, Nemo: Dapi passa diesch onns tscherna SRF 3 ils «Best Talents» – ed ha cun quaiuschia dà in stausch a la carriera d’inqualin:a giuv:na artist:a. Ussa datti er en Svizra romanda in format sumegliant: «Radar» preschenta dapi l’october 2023 mintga mais talents sin l’emettur da radio da RTS Option Musique, emetta pli savens lur musica ed organisescha concerts en la televisiun e sin ils chanals digitals da RTS. Cun quai na promova RTS betg mo las artistas ed ils artists sezs, il format contribuescha er a la diversitad culturala en Svizra.

La giuria fa la selecziun

L’idea dal format deriva dad Alexandre Tièche, il manader d’events da RTS, e Karine Vouillamoz, la scheffa dal program Option Musique. «Nus avain vulì sviluppar in project includent per che giuv:nas artist:as possian profitar d’ina emissiun en ial radio, en la televisiun e sin chanals digitals. Il model per quai è stà SRF Best Talent. Jau sper che Radar è bainbaud er francà uschè ferm en la populaziun», uschia Karine Vouillamoz.

Tar «Radar» vegnan las artistas ed ils artists tschernids d’ina giuria d’expertas e d’experts. Dasper Karine Vouillamoz ed Alexandre Tièche fan part Emmanuel Colliard, il manader dal program dal festival Francomanias, Lola Nada, l’agenta e managera da musica, sco era Baron.e, in duo da musicist:as sviz:ras. Mintga commembra u commember propona almain in:a artist:a, s’inspirond da MX3 (vesair la boxa). Sin basa da sessions da tadlar cuminaivlas han ins tschernì nov musicist:as che pon profitar mintgamai durant in mais dal palc da RTS.

La giuria ha fixà differents criteris per tscherner las artistas ed ils artists. «Il criteri il pli impurtant è, ch’i na sa tractia betg d’ina artista u d’in artist da RTS u d’ina gruppa dad ina collavuratura u d’in collavuratur da RTS. Uschiglio preferin nus musicistas e musicists sut 30 onns, che van a prà musicalmain cun l’emettur «Option Musique», e che n’han betg gia publitgà diesch albums e che n’èn era betgu èn gia stad:as sin la tribuna gronda dal Paléo. Ma tut è negoziabel», declera Karine Vouillamoz ed agiunta, ch’il team emprovia da chattar in equiliber da stils, geners e linguas.

Dumagnà fin a Paris

La participaziun al format porta blers avantatgs a las artistas ed als artists. «Jau hai marcantamain dapli public, saja quai sin las plattafurmas u en las medias socialas. L’auditori è s’engrondì», commentescha Cem Tem, in dals artists sustegnids. Pharahoe è dal medem avis. Avant sia preschientscha tar «Radar» ha ella gì sulettamain in concert, ussa po ella sa legrar da trais concerts planisads. E per l’artista Lolā ha la plattafurma contribuì a la registraziun da ses emprim album.

Grazia a «Radar» han intgins dals talents perfin dumagnà a Paris, quasi als gieus olimpics. Cun il motto «Swiss music in Paris. La musique suisse soutient ses athlètes à Paris» han San Silvan, Zoë Më e Cem Tem pudì sa preschentar en ils curtins da l’ambassada svizra per mussar la diversitad culturala da la Svizra.

Far punts en Svizra tudestga?

Che questa diversitad vegnia mussada, quai è era l’intenziun da l’emissiun. Medemamain vul ella rinforzar la relaziun tranter las artistas ed ils artists ed il public. Il format focussescha plitost sin in stausch punctual che sin in accumpagnament a lunga vista. «‹Radar› è in impuls. Nus na vulain betg concurrenzar la FCMA, la Fundaziun per promover la musica actuala, u autras structuras che s’engaschan per il svilup da las artistas e dals artists», declera Karine Vouillamoz. «Ma forsa pudessan nus ponderar da sustegnair las artistas ed ils artists en avegnir cun ulteriurs meds.»

L’artist Cem Tem ha il sentiment ch’el e sia lavur vegnia appreziada tras «Radar»: «RTS mussa a nus: Igl è impurtant ch’i dat nossa lavur. E ch’i sto dar ella.» Annunzias spontanas per il format mussan, che ulteriuras artistas ed ulteriurs artists vulan profitar da la plattafurma. Karine Vouillamoz sa legra era dal resun da l’auditori durant ils concerts sco era da las reacziuns positivas en las medias socialas: «Noss program fa senn, el cuntanscha la glieud che nus vulain cuntanscher.»

Il format vegn perquai cuntinuà e pudess en avegnir perfin vegnir enritgì dad autras cooperaziuns novas. «Radar vegn a cuntinuar. Ina collavuraziun cun las autras unitads da la SRG SRG SSR – pia cun las autras regiuns linguisticas – è pussaivla», di Karine Vouillamoz, «Best Talent sin SRF datti gia daditg, ma el è pauc enconuschent en Svizra romanda. Forsa datti potenzial per far punts per noss:as artist:as.»

Lucie Donzé, avust 2024