Il plaschair unescha

La SRG SSR transmetta mintg’onn 9000 uras sport en directa e porscha ina plattafurma ad almain 100 disciplinas da sport, en l’entir pajais ed en quatter linguas. Per Ruth Metzler, presidenta da Swiss Olympic, è ella perquai in element decisiv dal sport svizzer.

Tgi che guarda sport en Svizra, fa quai savens via ils chanals da la SRG SSR. Da la Weltklasse Zürich fin al Tour de Romandie, dal campiunadi mundial da hockey sin glatsch fin a las festas da lutga: La SRG SSR transmetta radund 9000 uras sport en directa ad onn, mussa cuntegns da passa 100 disciplinas da sport e quai en tut las quatter linguas naziunalas.

Per la presidenta da Swiss Olympic ed anteriura cussegliera federala Ruth Metzler-Arnold è precis quai in element impurtant dal sistem da sport svizzer. «La SRG SSR porscha in service public unic», di ella. Quai sa mussia per exempel era cun il parasport che saja francà fermamain en la rapportaziun da la SRG SSR. «Quai na sa chapescha betg da sasez.»

Senza derasaziun nagins sponsurs, senza sponsurs naginas occurrenzas

Las cifras raquintan dentant mo ina part da l’istorgia. L’autra part ha lieu là, nua ch’il sport viva per propi: en la percepziun da la populaziun, en l’identificaziun cun las atletas ed ils atlets ed en ils muments che collian il pajais. «La preschientscha mediala da la SRG SSR creescha la plattafurma naziunala ch’i dovra per ch’ina occurrenza vegnia insumma percepida sco tala», accentuescha era Luana Bergamin, manadra da gestiun da «SwissTopSport». L’organisaziun unescha 21 da las pli grondas occurrenzas da sport che vegnan realisadas mintg’onn en Svizra – tranter quellas per exempel il Tour de Suisse e la Cuppa Spengler. Per Bergamin è la muntada da la SRG SSR per ils organisaturs «simplamain existenziala», sco ch’ella di. «Savens vegn er il suandant fatg sutvalità: La SRG SSR n’è betg simplamain in emettur che transmetta maletgs en las stivas. Ella è la suletta actura en Svizra che ha l’infrastructura tecnica, persunala ed organisatorica per producir la transmissiun d’occurrenzas da passa 100 disciplinas da sport naziunalas ad onn, e quai en ina qualitad che correspunda als standards internaziunals.» Nagin purschider privat na possia garantir questa dimensiun da fidadadad. «Sch’il Tour de Suisse na vegniss betg pli transmess, fissi previsibel ch’el n’avess insacura insumma betg pli lieu.» Quai è ina ponderaziun che para l’entschatta drastica, ma lura logica: Senza visibilitad nagina derasaziun, senza derasaziun nagins sponsurs, senza sponsurs nagins organisaturs – ed insacura naginas occurrenzas da sport grondas pli.

Diesch giadas dapli medaglias

L’effect reciproc tranter la preschientscha mediala ed il svilup sportiv n’è da sentir nagliur uschè ferm sco en l’atletica leva. Il president da Swiss Athletics, Christoph Seiler discurra d’ina «unda da success», che dura dapi bundant diesch onns – ina fasa ch’il sport n’ha anc mai gì en questa furma. Las cifras suttastritgan quai a moda impressiunanta: Durant la decada fin il 2014 ha la Svizra gudagnà quatter medaglias internaziunalas a campiunadis europeics e mundials. En ils diesch onns suenter èn quai stadas 40. Diesch giadas dapli – ma betg casualmain. «Nus avain dumagnà la vieuta», di Seiler. «E la SRG SSR ha contribuì decisivamain a quest success.» Seiler na manegia cun quai betg mo las transmissiuns en directa da meetings gronds, mabain cunzunt quai che capita tranteren: reportaschas fundadas, intervistas a l’arrivada, purtrets, videos en las medias socialas. Tut quai procuria per che las atletas ed ils atlets na vegnan betg mo percepids sco maschinas da resultats, mabain sco umans – cun istorgias, success, trumpadas. «Sch’il public vesa ils umans davos las prestaziuns, sa sviluppa ina relaziun», di Seiler. Ina relaziun creeschia er identificaziun. Quai sa mussa cunzunt en la proxima generaziun: 230’000 starts d’uffants registrescha Swiss Athletics actualmain mintg’onn – in dumber che na fiss betg imaginabel senza exempels medials. Spezialmain visibel è quai tar formats populars sco il «UBS Kids Cup», che animescha mintg’onn dieschmillis uffants da participar a concurrenzas localas – u tar il program da currer «Mille-Gruyère» che mobilisescha curriduras e curridurs giuvens en l’entira Svizra. «Gist tar las dunnas giuvnas vesain nus in vair boom», di Seiler. «Ils exempels ch’igl ha dà ils ultims diesch onns han in’enorma forza d’attracziun.»

La magia dals muments collectivs

En pli po il sport crear insatge ch’è daventà rar en il mintgadi d’in pajais: muments collectivs. Per exempel il campiunadi europeic da ballape da las dunnas en Svizra, las victorias istoricas da la cuppa mundiala da skis u da las festas da lutga che carmalan ils umans en tut las regiuns linguisticas davant la televisiun. Per Ruth Metzler-Arnold èn tals muments dapli che mo ina nota marginala.

«Sche la Svizra giubilescha, lura da cuminanza», di ella. «Quest muments d’unitad datti mo perquai che la SRG SSR fa accessibels els per tuttas e tuts.» Precis quai è la dimensiun sociala dal service public medial. Il sport na funcziuna betg sco in video on demand ch’ins po guardar insacura pli tard – sia forza è l’experientscha cuminaivla, la tensiun collectiva, il givel da plaschair communabel. Questa simultanitad è ina valur che giess a perder, sch’il sport svaniss davos taxas d’access. «Quai chaschunass inevitablamain ina separaziun», di Ruth Metzler-Arnold. «Tgi che po pajar guarda – tgi che na po betg pajar, resta ordadora.»

Per disciplinas da sport pli pitschnas è la preschientscha da la televisiun centrala, èn tant Ruth Metzler-Arnold sco er Christoph Seiler persvas. Per il svilup da l’atletica leva en Svizra sajan ils meetings internaziunals pli pitschens, cumparegliads cun Turitg e Losanna, sco Spitzenleichtathletik a Lucerna u Galà dei Castelli a Bellinzona fitg impurtants, di Seiler. «Là pon las atletas ed ils atlets giuvens da la Svizra far emprimas experientschas internaziunalas.» Senza visibilitad vegnissan talas occurrenzas a media vista sut squitsch. «Ed i mancass ina plattafurma impurtanta per nossa proxima generaziun.»

Era l’economia profitescha

Il sport n’è dentant betg mo in motor social, mabain er in motor economic. Passa 11 milliardas francs valurisaziun creescha el mintg’onn en Svizra. Hotels, restaurants, interpresas da transport e fatschentas localas profiteschan d’occurrenzas grondas sco era d’occurrenzas regiunalas. «Mintga franc che la SRG SSR investescha en transmissiuns da sport generescha en las regiuns ina valurisaziun multipla», di Luana Bergamin da «SwissTopSport». Ils maletgs en la televisiun èn per uschè da dir la carta d’invitaziun per fans, turists e giasts. Era Metzler-Arnold fa attent che la SRG SSR na transmetta betg mo occurrenzas existentas, mabain pussibilitescha insumma occurrenzas grondas en Svizra. «Las producziuns d’emprima qualitad da la SRG SSR èn in argument impurtant per l’annunzia da blers campiunadis mundials ed europeics en Svizra», di ella. La valur dal service public medial na finescha damai betg a la banda. La lavur ha in effect er entaifer las regiuns, rinforza il turissem e l’economia locala – ed ella creescha maletgs che represchentan in pajais er a moda internaziunala.

Daniel Schriber, schaner 2026

Quest artitgel è cumparì per l’emprima giada en il Magazin LINK, il magazin da la SRG SSR Svizra tudestga. El è vegnì actualisà per questa publicaziun.