«Happy Day»: Betg mo traglischiez e larmas dal plaschair
Far surpraisas e plaschairs a la glieud: quai è dapi 17 onns il recept apparentamain simpel da l’emissiun «Happy Day». Ma per mintga emissiun dovri lungas preparativas. E mintga ediziun sto ademplir auts criteris da qualitad. Tenor il schef da divertiment da SRF Reto Peritz è l’emissiun uschè populara, perquai ch’ella collia ils umans: «Ella è sco in chit social.»
Bea è fatschentada. Ella nettegia gist cun in uder d’aua la plazza davant sia chasa, cura ch’ella survegn visitas nunspetgadas: Röbi Koller e ses team da camera. «Surpraisa e Happy Day», hai num – e Bea resta là cun bucca averta. «È l’abitaziun rumida si, n’èsi betg penibel, sche la camera filmescha ussa simplamain en directa?», sa dumonda ella, cura ch’ella maina il team en stiva, nua che ses um Hubi sesa. Il motiv da la visita nunspetgada: Insatgi vul far ina surpraisa al pèr, perquai che lur amur saja uschè excepziunala. Bea e Hubi, che sesa dapi ses 18avel onn da vita en la sutga cun rodas, èn passa 30 onns in pèr. Els han trais uffants. La visita surprendenta dal team da camera ston els l’emprim digerir: «Uss dovr jau in vinars», di Bea.
Bea e Hubi en la stiva ensemen cun il giast da surpraisa Röbi Koller
Standards etics, nagin voyeurissem
Istorgias sco quellas tunan a prima vista da televisiun da buna luna. Purschidas da divertiment pon dentant prestar dapli che quai ch’ins pensa en general. Ina tscherna da resultats da perscrutaziun scientifics actuals mussa: purschidas da divertiment èn relevantas per la solidaritad d’ina societad, per la chapientscha vicendaivla e l’empatia, ellas scoleschan e politiseschan. Per avair quests effects ston ellas dentant ademplir tscherts criteris. Perquai sto mintga istorgia mussada en l’emissiun «Happy Day» da la sonda saira percurrer ina procedura da selecziun conscienziusa. Ella sto satisfar als criteris da qualitad da la partiziun da divertiment da SRF che determineschan per exempel che las emissiuns na pon betg esser voyeuristicas e ston resguardar standards etics.
«Avant in temp avain nus decis da betg realisar pli formats da licenza internaziunals sco ‹The Voice of Switzerland› e da sviluppar nossas emissiuns per gronda part sezs», di Reto Peritz che maina la partiziun da divertiment. «Happy Day» saja in format enorm popular e vegnia guardà da giuven e vegl: «L’emissiun è sco chit social: ella ha ina forza collianta, ella fa frunt a la solitariadad e rinforza la cuminanza cun transmetter valurs cuminaivlas.»
La tensiun è in element impurtant
Kiki Maeder accumpogna l’emissiun dapi diesch onns. Ella di davart l’impurtanza da Happy Day: «L’emissiun ans fa endament ch’i dovra savens mo pitschens gests d’amicabladad per far ina gronda differenza en la vita d’auters umans. Uschia pudain nus gidar cun l’emissiun ‹Happy Day› da reducir pregiudizis, da rinforzar l’empatia e la convivenza.» Röbi Koller ha cosviluppà l’emissiun e dat ad ella dapi 17 onns sia tempra persunala. Dacurt è l’otgantavla ediziun vegnida emessa a la televisiun. «Ins po rir, ins po bragir. ‹Happy Day› funcziuna uschè bain, perquai che l’emissiun mussa istorgias realas», di il moderatur. «Nus stimain ils umans. E la tensiun è in element impurtant. Quai è dapli che ‹spir› divertiment, quai è per mai in veritabel service public ed indispensabel.» Sur tut quests onns han Röbi Koller e ses team fatg surpraisas e pussibilità muments ventiraivels a nundumbraivlas persunas, e quai en differentas modas: cun porscher viadis da vacanzas ed embellir abitaziuns, cun organisar partis da surpraisa e reunir famiglias. Mintgina e mintgin po s’annunziar tar «Happy Day» e proponer ina surpraisa per in auter uman. En il cas da Bea e Hubi da Tuggen en il chantun da Sviz èsi stà ina vischina da blers onns che ha ditg: els dus sajan in pèr maridà ed in pèr inamurà uschè inspirant ch’els hajan propi merità ina surpraisa speziala.
Bea e Hubi tar lur nozzas, cun lur uffants ed en lur dachasa.
Suenter ch’in giavisch cuntanscha la redacziun sclerescha quella cun premura, sche quel sa lascha ademplir en l’emissiun e co ch’ins vul preparar la surpraisa. Far ina surpraisa ad insatgi saja numnadamain in art, di Nicole Simmen, schefproducenta. Impurtant saja per exempel il «factur da pudair cuir»: «Las aspectaturas ed ils aspectaturs da televisiun duain pudair sa legrar cun las persunas e cuir ad ellas quest ‹Happy Day›.» Savens mussian els perquai las istorgias impressiunantas da las persunas surpraisas e raquintian dals obstachels che quellas hajan stuì surmuntar en lur vita. In aspect impurtant è tenor la producenta era che la surpraisa po vegnir realisada filmicamain – qua sa tracti da crear la dretga maschaida da tensiun. A Bea e Hubi da Tuggen per exempel avevan els mo tradì ch’els hajan da vegnir ils 23 da december en l’emissiun. Bea è gia stada stressada mo da spetgar sin quest di: «Jau hai simplamain sperà ch’els na surfetschian betg. Nus essan numnadamain modests e na vulain betg star en il center.»
Entant che Bea e Hubi han damai spetgà plain tensiun sin lur di, ha la squadra da l’emissiun, tut en tut otg persunas, preparà la surpraisa. Ellas han retschertgà, planisà ed organisà. L’entira famiglia da Bea e Hubi èn vegnids infurmads e filmads, tuttas e tuts èn dentant vegnids instruids d’avair quità da tradir nagut.
«En quests muments na vai betg per la quota»
Per il moderatur Röbi Koller è mintga istorgia singulara e commoventa. «Il pli fitg m’han commovì las surpraisas per umans fitg malsauns ch’èn morts curt suenter», di el. Er istorgias d’adopziun sajan idas ad el particularmain sut la pel: adina puspè gida «Happy Day» persunas d’inscuntrar lur geniturs biologics.
«Qua èsi impurtant d’accumpagnar quests umans bain sin lur viadi decisiv», di Röbi Koller. «En quests muments na vai betg per la quota, mabain per metter ensemen singuls tocs d’in puzzle. L’impurtant è che quests umans chattian respostas a dumondas da la vita elementaras che occupan els gia daditg.» La squadra saja conscienta da la responsabladad ch’ella haja per la protagonista u il protagonist en l’emissiun. «E nus ans dain gronda fadia ch’i dettia a la fin propi in happy end.»
Er en l’emissiun dals 23 da december na resta la finala nagin egl sitg. La surpraisa per Bea e Hubi: ina chanzun d’amur persunala, cumponida aposta per els d’in producent da musica professiunal. En l’emissiun chanta la jodladra Arlette Wismer davart l’amur dad els dus. Alura sa volva ella vers la tribuna, nua ch’il sumbrival s’avra andetgamain e davos quel cumpara in entir chor. Da la partida: il bab da Bea. «Igl è stà nundescrivibel. Tut è stà sco in siemi. Sco a las atgnas nozzas. In film!», raquinta Bea plain entusiassem.
Hubi, Bea, la jodladra Arlette Wismer e Röbi Koller cun il Chor davosvart (d.s.a.d)
Il mument da televisiun è svelt passà – lur chanzun, «Liebi für dich», tutga dentant per adina ad els. Bea e Hubi taidlan ella regularmain e sa regordan da lur «Happy Day». Cun la chanzun hajan els survegnì in regal unic, di Bea. «Quella dat a nus uschè blera forza. Per nus è ‹Happy Day› in’emissiun ch’è fa simplamain bain. E suenter quella pon ins durmir grondius.» Constataziuns sco quellas mussan la valur dal divertiment.
Per ils individis, ma era per l’entira societad. U sco Reto Peritz di: «Divertir è impurtant, gist en in mund che polarisescha adina pli fitg. Nossas istorgias èn relevantas per la societad e mussan la Svizra en sia diversitad.»
Daniela Huwyler, mars 2024
