Do it yourself: Svutrar en la memoria da la Svizra
Ils archivs da maletg e da tun da la SRG SSR èn in tresor plain nostalgia e spir surpraisas ed els ans raquintan tge che ha marcà la Svizra.
Il di da mia naschientscha han probablamain bleras e blers gì chommas stanclas e mal il chau, pertge che Guns’n’Roses èn stads quel di en citad – pli precis en il Joggeli. Quai è stà l’onn 1993. Sco Basilaisa batta mes cor da rockadura clandestin gist in pau pli svelt, cura che jau frunt sin questa lingia grossa en l’archiv da SRF.
Strembla il proxim stadion svizzer – il «Wankdorf».
Otg onns pli tard strembla il proxim stadion svizzer – ma quella giada per auters motivs: Il «Wankdorf» a Berna sto guntgir: cun 23 kilograms material explosiv vegn fatg plazza per in nov stadion. E lura gudogna Roger Federer ses emprim titel da Wimbledon: Jau aveva diesch onns.
E co guarda ora Vossa uffanza per lung da las lingias grossas las pli impurtantas en Svizra? Giai cun SRF «Timelines» a la tschertga da fastizs e scuvri a moda ludica ils archivs da la SRG SSR.
Perla da l’ archiv: Code da stritgs a la cassa (1973)
Grazia als archivs detagliads è la SRG SSR ina memoria audiovisuala da la Svizra, ed ella lascha prender part tuttas e tuts a quella. Quai grazia a la collavuraziun cun Memoriav, l’Associaziun per la conservaziun dals bains culturals audiovisuals da la Svizra, che nizzegia per sia purschida las interfatschas da programmaziun avertas (curt API) da la SRG SSR. Ins po laschar reviver cun in clic en total dus milliuns uras emessas dals onns 1930 fin oz e nundumbraivlas fotografias.
Fotografias istoricas, contribuziuns da radio ed emissiuns da televisiun chattais Vus sut www.memobase.ch.
Perla d’archiv: infurmaziun da 10 raps (1952)
Era las autras unitads d’interpresa da la SRG SSR RSI, RTS e RTR porschan in vast access interactiv e gratuit a lur communitads d’archiv. Las collecziuns sa cumponan d’inventaris d’archiv privats e da material d’archiv da la SRG SSR.
Francesca Guicciardi, matg 2023
