La populaziun spetga ina ferma preschientscha online da la SRG SSR

In nov studi mussa: La populaziun ha fitg gronda confidenza en ils cuntegns online da la SRG SSR – era la giuventetgna. Ina gronda maioritad giavischa online ina ferma SRG SSR, era per far frunt ad infurmaziuns falladas e per dar scleriment davart quellas.

Telefonin empè da gasetta, streaming empè da televisiun lineara. La digitalisaziun ha midà radicalmain il mund da las medias – tant la lavur schurnalistica sco era la moda co che nus consumain novitads. Il studi actual «Digitale SRG» examinescha quest tema precisamain. Passa 1250 persunas en la vegliadetgna da 15 fin 79 onns èn sa participadas al studi ed han tranter auter respundì a dumondas davart l’intelligenza artifiziala, l’impurtanza da la SRG SSR sco era davart lur temas en connex cun la digitalisaziun. L’enquista mussa cleramain: En il mund digital è la confidenza in bain spezialmain prezius. E la confidenza en la SRG SSR è fitg gronda – en tut las gruppas da vegliadetgna ed en tut las regiuns linguisticas. Uschia fida la populaziun en tut las parts dal pajais il pli fitg a las purschidas da la SRG SSR, er en cumparegliaziun cun purschiders da medias da l’exteriur sco ORF u ZDF. Remartgabel è che perfin participantas e participants da l’enquista che consumeschan darar novitads e ch’èn critic:as visavi medias classicas fidan il pli tgunsch a la SRG SSR.

Purschidas online: centralas per la furmaziun da l’opiniun

Ils resultats dal studi che l’institut da perscrutaziun dal martgà «YouGov» ha realisà per incumbensa da la SRG SSR mussan plinavant cleramain che la populaziun giavischa da la SRG SSR ina ferma preschientscha online. 77 pertschient da las persunas interrogadas inditgeschan che las purschidas online da SRF, RTS e RSI èn «fitg impurtantas» u «plitost impurtantas» per s’infurmar e sa far in’opiniun. «Las differentas opiniuns vegnan preschentadas a moda equilibrada», argumentescha ina persuna. Ed in’autra menziuna che la purschida saja impurtanta, perquai ch’ella tractia era temas, davart ils quals chasas da medias privatas na rapportian betg per motivs da custs. Quests resultats correspundan a quels d’in auter studi medemamain actual davart dumondas sumegliantas, il qual l’Universitad da Turitg ha publitgà dacurt.
La preschientscha online da la SRG SSR vegn stimada surtut er en connex cun las infurmaziuns falladas. Per ina gronda maioritad da las persunas dumandadas èsi damai impurtant che la SRG SSR fetschia frunt ad infurmaziuns falladas, ch’ella sensibiliseschia il public per talas e ch’ella dettia scleriment davart quellas. «Cunquai che jau hai l’impressiun ch’ins possia fidar a SRF, èsi impurtant ch’ins chattia ses cuntegns er online. Gist era per verifitgar novitads dad autras funtaunas», argumentescha ina persuna interrogada.

Agid d’orientaziun en la rait – era per la giuventetgna

Cunquai che la SRG SSR vul cuntanscher adina dapli era persunas giuvnas, è il studi sa focussà sin la vista da las persunas da 15 enfin 29 onns. Interessant è che lur opiniuns na sa differenzieschan betg essenzialmain da quellas d’autras generaziuns. L’evaluaziun mussa ch’era persunas giuvnas èn savens surdumandadas pervia da la quantitad d’infurmaziuns che curseschan online, che la disponibilitad permanenta d’infurmaziuns novas las stressescha e ch’ellas han mintgatant fadia d’identifitgar cuntegns, als quals ellas pon fidar. Sco per las ulteriuras gruppas da vegliadetgna surpiglia la SRG SSR era per las persunas giuvnas in’incumbensa centrala en il spazi digital: Ella serva ad ina gronda maioritad dad ellas sco agid d’orientaziun e sco punct da referenza en la massa immensa dals cuntegns online.

L’IA sco med d’agid, però betg sco remplazzament da l’uman

L’enquista ha anc gì in ulteriur focus, numnadamain il diever da l’intelligenza artifiziala en la lavur schurnalistica. Qua sa mussa che la populaziun n’ha da princip nagut cunter il diever da l’IA sco med d’agid: La maioritad da las persunas interrogadas è da l’avis ch’i saja bun, sche l’IA sustegnia las schurnalistas ed ils schurnalists da la SRG SSR da retschertgar u d’analisar datas – tant enavant ch’el:las resguardian cleras cundiziuns generalas. Interessant è en quel connex ch’i dat differenzas linguistic-regiunalas. Las Romandas ed ils Romands èn cleramain pli sceptic:as areguard il diever da l’IA che las participantas ed ils participants da la Svizra taliana e tudestga.

Auter vesi ora, sche l’IA duai surpigliar incumbensas cleramain umanas. Ina maioritad considerabla da las persunas interrogadas s’exprima cunter moderaziuns fatgas d’avatars. Era maletgs generads da l’IA refusescha ina gronda maioritad da las interrogadas e dals interrogads. En il barat direct cun l’IA sa mussa la populaziun medemamain reservada: Il diever da chatbots e d’auters sistems dad IA orientads al dialog sin las plattafurmas da la SRG SSR sveglia pauc interess.

Naginas scuflas da filters

Per finir han las participantas ed ils participants era respundì a dumondas davart il tema persunalisaziun: damai tge ch’el:las pensian, sche utilisadras ed utilisaders vesian en las medias socialas u sin plattafurmas da novitads mo pli cuntegns adattads individualmain a lur preferenzas. Qua sa mussa in maletg differenzià. Bleras persunas han resalvas, vesan dentant er il niz dad algoritmus. Sut tschertas cundiziuns – ed en champs tematics definids – beneventan las persunas interrogadas las persunalisaziuns. Decisivas èn per ellas la transparenza e la controlla: Ellas vulan chapir, pertge ch’ellas vesan tscherts cuntegns ed ellas vulan pudair adattar sezzas persunalisaziuns, sco er activar e deactivar quellas.
Sch’i va per las plattafurmas da la SRG SSR na vul la maioritad da las persunas interrogadas en il sectur d’ infurmaziun nagina persunalisaziun, perquai ch’ellas teman scuflas da filters. En quel sectur duain tut las utilisadras e tut ils utilisaders vesair las medemas novitads – en spezial tar temas politics naziunals.

Malolo Kessler, October 2026