Dapli ch'in mussavia per esser legher: Il «Comedy Talent Journey»

Dapli ch’in mussavia per esser legher: Il «Comedy Talent Journey»

Il «Comedy Talent Journey» coacha talents giuvens e porscha ad els ina gronda plattafurma. Cun quai na sustegna il program da promoziun da SRF betg mo la scena da comedy da la Svizra tudestga, el presta er ina contribuziun a la furmaziun da l’opiniun – perquai che comedy è dapli che mo divertiment.

«Curt suenter mia scolarisaziun han ins vulì sclerir, sche jau haja ADHS. Savais tge ch’è stà il resultat da quai? – Nagin’idea, jau n’hai betg fatg attenziun!»
Elias Wenger fa ina curta pausa per trair flad. «E», cuntinuescha el, «igl è uschia che…»

Ma la producenta Simone Kern interrumpa el: «Quest ‹E›: Sto quel esser?»
Il giuven da 25 onns cumenza anc ina giada ed emprova da laschar davent il «E». Qua stgarpitscha el sur ses pleds ed emblida la proxima pointa. Anc ina giada davent da l’entschatta. Ed anc ina giada. Simone Kern na lascha betg luc, fa propostas, ed Elias Wenger emprova. Fin che las pointas sesan.

Elias Wenger è in da sis giuvens talents da comedy che survegnan in coaching en il rom dal «Comedy Talent Journey» da SRF. Il program da promoziun è vegnì lantschà il 2017 ed ha la finamira da betg mo coachar newcomras e newcomers, mabain era da porscher ad ellas ed els ina gronda tribuna.

Entant che la producenta da comedy e reschissura Simone Kern mola cun els vi da la performance, lavuran il stand-up comedian Joël von Mutzenbecher e l’entertainer Dominic Deville cun els vi dal material e respundan lur bleras dumondas. Pertge che la via en la comedy n’è betg preparada en Svizra, i na dat nagina scolaziun e mo paucas plattafurmas. Cun il «Comedy Talent Journey», ch’ha lieu ina giada l’onn, emplenescha SRF questa largia culturala.

A l’entschatta datti gronds dubis

Tar il «Comedy Talent Journey» stat il process en il center. A la fin da quest viadi glischan ils reflecturs da la «SRF 3 Comedy Talent Stage»: là vegnan ils sis giuvens talents a stuair sa cumprovar davant il public live ed ina giuria dal fatg. Trais dad els vegnan lura nominads per il «SRF 3 Best Talent Comedy» ed han la schanza da gudagnar il «Swiss Comedy Award».

Quest onn vegnan purschids en il rom dal «Journey» per la terza giada era coachings intensivs: dus dis, nua ch’ils comedians na vegnan betg mo en contact ina cun l’auter, mabain era cun entertainras ed entertainers professiunals e gliman vi da lur preschentaziuns. Alexandra Steck è la redactura da la partiziun comedy e satira da SRF ed organisescha tranter auter il «Comedy Talent Journey». Ella di: «Gist a l’entschatta d’ina carriera pon ins sa sentir fitg sulet sco comedian. Blers na san betg nua ir cun lur dubis, han il sentiment d’esser senza orientaziun e dattan fitg spert puspè si.» Il «Comedy Talent Journey» duai tschiffar ils talents giuvens en lur malsegirtad ed als gidar da fitgar pe.

Perseveranza vegn remunerada

Per far part dal «Journey» ston interessadas ed interessads s’annunziar cun in curt video. Tgi che ha talent e cletg vegn envidà a la segunda runda al «Open Mic Casting» a Turitg u Basilea. Ina giuria tscherna sis talents che pon far part dal coaching.

Naomi Peper è s’annunziada trais giadas, lura è ella finalmain vegnida tschernida. Ella ha gia adina amà la tribuna e fatg teater, anc avant da cumenzar avant trais onns cun la comedy. «En la comedy ston ins crair fitg ferm en sasez», di la pedagoga sociala scolada. «U esser fitg desperà!» Uschè u uschia: perseveranza vegn remunerada. Per restar en la cursa ston ins scriver adina puspè nov material e viagiar la saira e las fins d’emna a preschentaziuns dad open mic en l’entira Svizra. Quai dovra bler temp – e daners. Il participant Pavel Zborik di, ch’el haja dà ora l’onn passà passa 1000 francs per viadis, reclama online per preschentaziuns sco era per equipament per registraziuns. Il problem: En Svizra datti be paucs locals dad open mic, pia lieus da preschentaziun cun public live, nua che giuvens comedians pon testar lur material e crear raits. Ils blers locals èn a Turitg u a Basilea. A Berna datti be dus locals e quels èn savens occupads mais ordavant – ed ordaifer las citads pli grondas mancan uschè u uschia ils locals per open mic.

Il mastergn pon ins emprender, il sentiment betg

Ils coachings dal «Comedy Talent Journey» han lieu en gruppas pitschnas. Naomi Peper e sia cunparticipanta Nathalie Frei sesan cun Dominic Deville vid ina maisa radunda e discuteschan lur material. Per la «SRF 3 Comedy Talent Stage» ston tut las participantas ed ils participants star sis minutas sin tribuna. I va per mintga singul pled. Enconuscha la glieud l’app da dating «Hinge»? Sa il public ch’en la cultura egipziana bitta’ins chalzers, sch’ins è fitg grit? «Jau pens che cun la pointa vegnia il public a chapir», di Nathalie Frei ch’è mez Egipziana e tematisescha sia derivanza en sia show. «Quai che ma dat savens en egl tar stand-ups», declera Dominic Deville a las duas dunnas, «è, ch’els èn fitg remplazzabels. Vus as stuais dumandar: Tgi essas vus? Per tge stais vus sin la tribuna? E percorsch’ins quai era d’ordaifer?»

Tgi che vul far buna comedy sto avair bler dapli che mo bunas sgnoccas en il repertori. «Qua vegn ensemen bler», di Joël von Mutzenbecher che coacha entant ils trais participants masculins. «L’originalitad, il mastergn, la densitad da pointas, la performance, la preschientscha sin tribuna, la lavur cun il microfon… Il microfon è l’unic instrument che ti has sco comedian sin tribuna. Cun quel stos ti savair lavurar.» Tut quai poss’ins emprender fin ad in tschert punct. Impurtant saja dentant d’avair la comedy en il sentiment. «Sentiment munta: Co poss jau dir insatge autramain u accentuar il cuntegn, per che la sgnocca arrivia anc meglier?», declera Joël von Mutzenbecher. «En la comedy na datti mai ina versiun finala. Ins po raquintar da nov ina sgnocca en mintga show.»

Comedy gida a furmar l’opiniun e collia

Il «Comedy Talent Journey» è ina purschida da promoziun unica en l’entira Svizra en sia moda d’accumpagnar las participantas ed ils participants en il process da carriera. Il «Journey» haja er in niz per la societad, di la redactura da SRF Alexandra Steck. «Cun il program vulain nus garantir ch’il public vegn era vinavant a vesair comedians or da la Svizra. Per quai dovri in spazi segir, nua che la glieud po emprender il mastergn.»

La valur da comedy per la societad ha schizunt ina muntada anc pli profunda. Tenor il scienzià da communicaziun Matthias Künzler consumeschan bleras persunas las novitads via comedy – e per part remplazzan formats sco la «Heute Show» schizunt las novitads. Divertiment ed infurmaziun na sa laschan pia betg separar uschè strict in da l’auter. Künzler di: «Comedy cuntanscha era gruppas socialas che na guardan naginas novitads. Ella prenda si temas sociopolitics e confruntescha il public cun autras realitads da la vita. Quai contribuescha a la furmaziun da l’opiniun.»

Studis cumprovan entant che comedy promova per exempel era la chapientscha per l’auter, per exempel per persunas fugitivas, e po sustegnair l’integraziun. Questa experientscha fa era il participant Thierry Ngalo: «Jau hai raquintà tschel di sin ina tribuna a Basilea da mia mamma africana. Ella po exprimer cun ina suletta ramur circa 25 blastemmas en ina giada. Suenter la show è in Svizzer vegnì tar mai ed ha ditg: ‹‹Ussa chapesch jau finalmain tge che la mamma da mes ami da scola nair vuleva exprimer, cur ch’ella fascheva questa ramur!›» Comedy sco spievel da la societad – quai è tenor Künzler ina da las pli grondas fermezzas dal gener: Comedy renda visiblas las gruppas socialas ch’èn uschiglio da vesair pauc en la televisiun e gida uschia a stgaffir identitad e colliaziun.

Da la «Talent Stage» en la Late Night Show

La «SRF 3 Talent Stage» a la fin dal «Journey» è per blers talents giuvens in impurtant punct da partenza. Milan Milanski, ch’è sa participà il 2022, di: «Sin la ‹Talent Stage› ha Stefan Büsser vis mai per l’emprima giada. In ha manà a l’auter, ed uss sun jau part da sia Late Night Show.» Finamiras e speranzas sumegliantas han er ils participants da quest onn. «Comedy è punk», manegia Joël von Mutzenbecher. «Ti has blera independenza, dentant era blera atgna responsabladad: il ‹Comedy Award› sulet na decida betg davart tia carriera. Ti stos adina puspè generar sez pussaivladads per ta preschentar.» En la televisiun datti dapi quest onn ina nova pussaivladad da sa preschentar: SRF ha schlargià la purschida da comedy cun emetter il matg il nov format da stand-up «Fun Fatale». La tribuna tutga là sulettamain a comedians femininas da la Svizra e da l’exteriur da lingua tudestga. L’emissiun duai mussar la diversitad da la scena da comedy svizra anc pli fitg en la purschida da SRF. E tgi sa: Grazia a la perseveranza, il cletg ed er il flad da desperaziun, dal qual il talent giuven Nathalie Frei ha discurrì, pudessan en l’avegnir forsa er ella e sia collega Naomi Peper star sin questa tribuna.

Noemi Harnickell, matg 2026