Premiera mundiala tar l'ESC: «Quai è la schanza da nossa vita»
Studentas e students da la Scola auta spezialisada dal Grischun han producì transmissiuns en directa per l’Eurovision Song Contest – in novum per la pli gronda show da musica dal mund. Uschia han ellas ed els pudì far experientschas professiunalas interessantas – e mussar sin la tribuna naziunala ed internaziunala, tge che la Svizra porscha sco plaz da furmaziun.
«L’ESC è la pli gronda show che n’ha da far nagut cun il sport. Ch’ins dat questa responsabladad en ils mauns da studentas e students è in highlight per mai», di Simone Reinhard. Ed agiunta: «Quai è la schanza da nossa vita.» Ensemen cun 13 constudentas e constudents ha la studenta da la Scola auta spezialisada dal Grischun (SAS Grischun) dastgà producir l’extracziun per il mezfinal da l’ESC 2025 a Basilea – cun tut quai che tutga tiers. Uschia han ils Multimedia Producer futurs fatg ensemen cun il team da l’ESC in concept, budgetà e surpiglià la producziun en directa e la postproducziun.
Quant preziusa ch’è stada questa experientscha per las studentas ed ils students mussan lur resuns: «Dastgar collavurar ad in dals pli gronds eveniments televisivs dal mund è ina schanza enorma per mai», declera Elia Ribeiro Fiorentino che ha manà reschia da l’extracziun per il mezfinal. «Jau na sai betg, sch’i dat anc insatge meglier per mai che quai.»
14 studentas e students da la SAS Grischun collavuran a l’ESC.
mad
81 dis en acziun
Era per la ceremonia da l’avertura ils 11 da matg 2025 han las studentas ed ils students da la SAS Grischun producì il signal internaziunal, en tut èn ellas ed els stads en acziun durant 81 dis. «Cun il project vulain nus pussibilitar a las studentas ed als students da far experientschas professiunalas interessantas en il rom da l’ESC e da crear raits», di Francesca Guicciardi, Co-Head Public Value ESC 2025 e part dal team che ha inizialisà il project. «Per il team da l’ESC èsi plinavant interessant da survegnir in’autra perspectiva, pli giuvna, sin la producziun.» Il project duai però avair effect era sin nivel social general: «Nus vulain rinforzar en Svizra, però er a l’exteriur, la conscienza per la buna scolaziun da la glieud giuvna qua en Svizra.» Il team ha plaschair dals resuns positivs da las studentas e dals students: «Els èn il motor che mettan en moviment nus – nossa motivaziun.»
«Dapli che mo shows»
Il project cun la Scola auta spezialisada dal Grischun è mo in exempel per la collavuraziun cun studentas e students en il rom da l’ESC. En l’event grond èn numnadamain era sta:das involvi:das studentas e students da la Scola auta turitgaisa dals arts ZHdK e da la Scola auta turitgaisa per scienzas applitgadas ZHAW: Ellas ed els han creà cuntegns per ils chanals da medias socialas uffizials da la SRG SSR. En pli hai dà anc auters projects ed ulteriuras occurrenzas accumpagnantas che han duì crear ina plivalur per la societad: «Nus vulain che l’ESC saja bler dapli che mo las shows en l’arena – el è ina festa per l’entira societad», di Guicciardi.
ESC 2025: Public Report veröffentlicht – ein Rückblick auf einen Event der Superlative
Malolo Kessler, actualisà ils avrigl 2026, publitgà l’emprima giada l’avrigl 2025
Di per di cuntanschan la SRG SSR numerus resuns davart ils pli differents programs. Sper vuschs criticas datti era bler feedback positiv. En la rubrica «Likes» publitgain nus ina selecziun da las reacziuns dal public e mettain en il center ils teams, als quals sa drizzan quests commentaris. Ils resuns rendan visibel l’effect da lur lavur sin il public da radio e televisiun e mussan a medem temp quant fitg che quels motiveschan ed inspireschan las persunas responsablas.
