Do it yourself cun cuntegns e datas da la SRG SSR

Da datas meteorologicas fin a texts en tut ils tschintg idioms – in stgazi per nerds da datas.

As interessais Vus per veglias registraziuns da film u per resultats istorics d’elecziuns e da votaziuns e per lur svilup fin oz? As mancan per tscherts cuntegns da la SRG SSR ils suttitels? U vulais Vus render pli visib:las musicist:as local:as u naziunal:as? Uschenumnads APIs (in’abreviaziun per interfatschas da programmar) pussibiliteschan d’acceder svelt ad ina selecziun da pachets da datas actualisads cuntinuadamain da tut la SRG SSR.

Igl è simpel d’utilisar datas via API

Per pudair utilisar las datas a moda effectiva èn enconuschientschas da programmar centralas. Per che betg mo codad:ras chapeschian per tge che APIs pon vegnir duvrads, ha la SRG SSR installà in nov portal da sviluppad:ras che preschenta las singulas purschidas da datas era per laic:as. La purschida vegn nizzegiada stediamain, actualmain avain nus otg milliuns dumondas al mais.

Per la linguistica stattan a disposiziun per exempel unitads da datas da text ed audio en tut ils tschintg idioms. Era la purschida senza barrieras per persunas cun impediments dals senns vul ins amplifitgar cuntinuadamain.

Grazia als APIs simplifitgescha la SRG SSR ina da sias miras centralas: avrir ils archivs. En collavuraziun cun Memoriav, l’Associaziun per la conservaziun dals bains culturals audiovisuals da la Svizra, èn disponiblas cun mo in clic milliuns uras emessas a partir dals onns 1930 fin oz sco era nundumbraivlas fotografias – e la collecziun crescha cuntinuadamain. Maletgs istorics, contribuziuns da radio ed emissiuns da televisiun chattais Vus sin memobase.ch.

Henriette Engbersen, avrigl 2023