«Vus pussibilitais a mai d'elavurar ina veglia istorgia»
Il podcast «Crimes suisses» da RTS raquinta da cas criminals en Svizra. Ils resuns da las audituras e dals auditurs mussan: Il format po gidar da chapir meglier il preschent, d’elavurar eveniments persunals e da metter las regurdientschas en in context.
Els captiveschan e fascineschan, fan snuizis e sveglian empatia: Ils formats da True Crime, che rapportan da vairs cas criminals, èn populars. Betg mo, perquai ch’els èn divertents – lur valur per la societad è dapli che divertiment. Savens gida il gener da metter eveniments istorics en in context, el furma e tematisescha valurs e normas d’ina societad. Mintgatant gida in’emissiun da True Crime schizunt a chapir meglier l’atgna istorgia. Sco per exempel tar Jacques Küng, auditur dal podcast «Crimes suisses» da Radio Télévision Suisse (RTS).
Chapir meglier las regurdientschas
Suenter la transmissiun da l’episoda davart in murdraretsch antisemitic il 1942 a Payerne è Jacques Küng sa drizzà a la redacziun dal podcast. Ses bab saja stà durant il temp dal murdraretsch ami d’intgins protagonists da l’istorgia. Grazia al podcast possia el ussa chapir meglier sias regurdientschas, ha l’auditur scrit. «Grazia per la lavur d’auta qualitad. Ella ma pussibilitescha d’elavurar ina veglia istorgia ch’è anc adina dolurusa.» In resun che ha commovì particularmain il team responsabel ed il schurnalist Antoine Droux. In da blers: Il format è popular en Svizra romanda e vegn era ludà adina puspè da persunas dal fatg, collavuratur:as dal fedpol e forensic:ras.
Il schurnalist da RTS Antoine Droux è l’inventader e host da «Crimes suisses».
maletg: RTS/Laurent Bleuze
Antoine Droux (davosvart) ed il reschissur David Golan durant la producziun dal podcast.
maletg: RTS/Laurent Bleuze
«Ellas raquintan insatge da nus»
Il team da RTS lavura mintgamai var diesch dis per in’episoda. «Ins pudess cun raschun sa dumandar pertge ch’ina chasa da medias publica raquinta istorgias uschè terriblas», di Antoine Droux da RTS. Natiralmain dettia quai in interess general per temas sombers e tabuisads. «Ma abstrahà da quai raquintan questas istorgias surtut da la Svizra. Ellas descrivan epocas, umans sco ti ed jau. Ellas raquintan insatge da nus – quai è per mai ina da las valurs impurtantas.» Per mintga episoda discurra Droux cun persunas spezialisadas, per exempel da la giustia, polizia, medischina u perscrutaziun. Quellas mettan en in context odiern ils crims e lur (emprovas da) scleriment, succedids per part avant decennis. «Jau sun persvas ch’ins po declerar il preschent cun raquintar il passà», di il schurnalist. «Ins dat ina clav per chapir il mund – schizunt cun crims. Quai è la valur publica da nossa lavur.»
Malolo Kessler, actualisà il schaner 2026, publitgà l’emprima giada il settember 2024
Di per di cuntanschan la SRG SSR numerus resuns davart ils pli differents programs. Sper vuschs criticas datti era bler feedback positiv. En la rubrica «Likes» publitgain nus ina selecziun da las reacziuns dal public e mettain en il center ils teams, als quals sa drizzan quests commentaris. Ils resuns rendan visibel l’effect da lur lavur sin il public da radio e televisiun e mussan a medem temp quant fitg che quels motiveschan ed inspireschan las persunas responsablas.
