«Showcase»: tribuna libra per la diversitad musicala

La musica collia, furma ed inspirescha. Perquai s’engascha RSI per la scena da musica da la Svizra taliana: «Showcase RSI» promova musicist:as giuv:nas e dat al public la chaschun da vesair lur concerts en in rom intim. En ils studios a Besso èn però era gia stads sin visita stars da renum mundial.

L’aventura «Showcase RSI» ha cumenzà l’onn 1996 – e cuntinuescha fin oz. Il format porscha a musicist:as da l’exteriur, dentant cunzunt er a la scena da musica locala, ina tribuna impurtanta. Stgaffì el ha Gian Luca Verga. «Sco amatur da la musica e schurnalist hai jau da vegl ennà plaschair d’entupar ed intervistar artist:as. Uschia hai jau mess en pe a partir da circa la mesadad dals onns 1990 quest program, l’emprim mo per il radio, pli tard dentant er adina pli fitg per l’internet e la televisiun», raquinta el.

«Igl ha duì esser in format che collia plirs elements: concert en directa, sentupada e discurs. Il public gioga damai ina rolla impurtanta.» Inspirà el avant bunamain 30 onns han las «Peel Sessions» legendaras da BBC, durant las qualas in dj popular envidava musicist:as tscherni:das en il studio. «I na deva dentant nagina interacziun, nagin discurs e nagin barat – e cunzunt na devi nagin public.»

Quai è auter tar «Showcase RSI»: las musicistas ed ils musicists sa preschentan en directa ad in grond public che po persequitar il concert er al radio u via streaming. Numerus:as artist:as da la scena locala èn gia sta:das sin visita en l’emissiun, tranter auter Vad Vuc, Sebalter e Make Plain, ma er Andrea Bignasca, Valentino Vivace e Joe Dalla & The Monks. «Ils criteris principals per la tscherna èn la qualitad, la planisabladad ed il talent da la band sco era da las artistas e dals artists», di Gian Luca Verga.

Tatum Rush: «Das vermittelt uns Wertschätzung»

Per l’artist Tatum Rush che ha ragischs talianas, svizras ed americanas e che fa sia atgna moda dad italo-pop han ils concerts da Showcase in caracter tut spezial. Il set-up professiunal da RSI a Besso creeschia in tschert flair da gala, di el.

«Il studio è gia per l’egl in lieu impressiunant, fitg spezial e plain energia. Ed ins sa gea che tut vegn emess al radio ed era filmà.» Perquai stoppian ins sa preparar bain per furnir ina performanza preschentaziun perfetga en mintga detagl. Quai possian ins da l’autra vart nizzegiar sco schanza.

«Per la scena da musica locala – e betg mo per lezza – è quai in’occasiun singulara. Igl è la chaschun per artists sco mai da preschentar al public sia musica en ina qualitad da tun e da tribuna excellenta. Quai intermediescha a nus artistas ed artists stima e regorda nus londervi quant impurtant:as che nus essan per la vita culturala en il Tessin», accentuescha Tatum Rush. «Showcase» saja in enritgiment per artist:as, pertge ch’il format motiveschia da crear novas preschentaziuns per il public. «Ultra da quai mussa l’emissiun che nus creatur:as da cultura essan in dals motivs principals per l’existenza da noss emetturs da radio e televisiun. I dovra nossa creativitad, noss art e nossa energia per embellir nossa regiun.»

La chantautura Romina Kalsi è gia sa preschentada pliras giadas tar «Showcase». Er ella stima il sustegn da RSI. «Jau sun adina ma sentida bainvegnida tar il radio, cura che nus avain preschentà nova musica u collavurà cun aut:ras artist:as», di ella. «Il radio dat a la scena da musica locala ina tribuna, tant cun ‹Showcase› sco era cun autras purschidas. Jau ma regord gugent a la participaziun a l’emissiun ‹Musicaviva›, ma er al program ‹Confederation Music›.»

Sche questas paraids pudsavessan discurrer

«Showcase» creescha in’atmosfera privata e pussibilitescha ad artist:as d’entrar en contact direct cun il public. En in rom pitschen sent’ins spezialmain bain la magia da la musica live. «La sbrinzla da l’inscunter che sa furma durant in’intervista e che tschiffa durant il concert er il public, po tutgar ins directamain en il cor», di il schurnalist Verga.

Ils studios a Besso han gia vis legendas da la musica sco Jovanotti, Tiziano Ferro, Gino Paoli u Mahmood. Bler:as musicist:as èn sin agen giavisch sa preschenta:das pliras giadas tar «Showcase», perquai ch’el:las apprezieschan il rom privat e cordial, la professiunalitad dal team da la tecnica e la qualitad dal program. «Saja quai artist:as local:as u da renum internaziunal: ‹Showcase› procura adina per muments commovents ch’ins na po gnanc tegnair endament tuts», manegia Gian Luca Verga. «Il public è commuventà, sa legra, ri, bragia, chanta e sa participescha. Igl è vair e stget plaschair!» Consequentamain survegnia el era blers resuns positivs dal public e d’artist:as.

Dapli ch’in daletg per las ureglias

A la fin da mintga saira da concert discurra Gian Luca Verga anc cun il public. «Jau vi tschiffar ils sentiments che sa fan sentir directamain suenter l’emissiun. Ils impuls da reflexiun e ponderaziun, il laud ed il plaschair ch’il public exprima èn nunpajabels.» Plinavant saja la musica era dapli che giudiment: «Nus savain che la valur d’ina chanzun, d’ina cumposiziun u d’in toc da musica surpassa il spir giudiment, ella stimulescha la fantasia e po influenzar nossa vita», di Gian Luca Verga. «Cun ‹Showcase› vulain nus dar a la scena da musica en nossa regiun il spazi commensurà per savair crescher vinavant, sa sviluppar ed enritgir il public. Ed jau giavisch che questa diversitad musicala mainia a dapli acceptanza, furmaziun ed avertadad.»

«La musica po esser, sco l’art en general, en tut sias bellezza furmas d’expressiun ina scola per la vita.» — Gian Luca Verga, organisatur da Showcase RSI

Keri Gonzato, zercladur 2024