Il Montreux Jazz Festival, in star plain fassettas
Il Montreux Jazz Festival transfurma la riva dal Lai da Genevra mintg’onn en ina tribuna da musica enorma. Sia radiaziun internaziunala ha l’event emblematic d’engraziar a ses partenaris da medias sco RTS. Lur collavuraziun che sa sviluppa vinavant cuntinuadamain contribuescha a la creaziun d’ina plivalur economica e culturala considerabla per la regiun.
«Il festival fa part da la vita da las abitantas e dals abitants da la regiun dapi lur uffanza», di Kevin Donnet, directur da la communicaziun dal Montreux Jazz Festival, e precisescha ch’i reusseschia a l’event grazia a ses svilup cuntinuant da svegliar mintg’onn danovamain las mirveglias dal public. E mintg’onn survegn l’event dapli preschentaziuns live che vegnan emessas en l’entir mund e che mantegnan ses renum. La 47avla ediziun dal Montreux Jazz Festival ha lieu dals 5 fin ils 20 da fanadur 2024. Sia radiaziun internaziunala ha il festival d’engraziar er a la SRG SSR, pli precis a RTS, che registrescha ed emetta ses concerts dapi l’entschatta dal festival il 1967 (dapli en il paragraf sutvart). RTS ha en pli era mess a disposiziun ses archiv dals onns 1967 fin 1986, i sa tracta da documents coproducids ensemen cun Montreux Sounds, per realisar la miniseria documentara «They all came out to Montreux – la folle histoire du Montreux Jazz Festival» publitgada l’onn 2022 e disponibla sin Play Suisse.
En tut posseda RTS 700 uras material illustrativ e 1100 uras audioregistraziuns dal festival, ma sia rolla na sa limitescha betg sulettamain a la conservaziun ed a la diffusiun da quest material d’archiv. RTS è anc adina colliada stretgamain cun l’event e vegn incaricada grazia a ses know-how en connex cun l’infrastructura, las registraziuns da concerts, la promoziun u era l’expertisa schurnalistica. Ina collavuraziun fritgaivla en blers reguards che porta plivalur per la regiun. Il Montreux Jazz Festival è in dals total 300 festivals en Svizra che profiteschan directamain dal sustegn finanzial da la SRG SSR, resp. da SRF, RTS, RSI ubain RTR.
Plivalur zunt preziusa per la regiun
Ultra dals effects economics ch’importan plirs milliuns francs (durant il festival chaminan passa 20’000 persunas a di tras la citad) èsi reussì al Montreux Jazz Festival, in simbol per excellenza en la scena da musica mundiala, da far enconuschenta la regiun sin l’entir mund senza perder sias fermas ragischs localas. Cun porscher gratuitamain 80 % da ses program pussibilitescha il festival a mintgina ed a mintgin da giudair concerts d’auta qualitad. Grazia a quest concept dispona il festival entant d’ina clientella fidaivla.
L’ambiziun da democratisar la musica correspunda perfetgamain a l’incumbensa da RTS ch’emprova da pledentar tanta glieud sco pussaivel ed il medem mument da sa posiziunar sco ferm liom. La lavur d’archivaziun fatga dal med da service public suonda il medem princip, ella ha la finamira da render accessibel il stgazi prezius che ademplescha tenor Alexandre Tièche tut las pretensiuns per figurar sin la glista dals patrimonis culturals da l’UNESCO. La collavuraziun dals dus partenaris gida a rinforzar il liom tranter els e lur public respectiv e cun la populaziun en general. «RTS nizzegia il Montreux Jazz Festival per proveder ses public cun buna musica e valurisescha uschia in patrimoni musical internaziunal ordvart impurtant», cuntinuescha Alexandre Tièche.
![Image](https://publicvalue.srgssr.ch/wp-content/uploads/2024/07/Portrait.jpg)
Alexandre Tièche, responsabel per ils partenadis da reclama musicals da RTS (Funtauna: RTS)
In partenadi che sa sviluppa vinavant cuntinuadamain
En il decurs dals onns è la collavuraziun da RTS e dal Montreux Jazz Festival daventada adina pli cumplexa. Entant che RTS sa concentrava a l’entschatta principalmain sin la registraziun e la diffusiun dals concerts, sa sustegnan las duas instituziuns oz vicendaivlamain per crear cuntegns e promover lur activitads.
![Image](https://publicvalue.srgssr.ch/wp-content/uploads/2024/07/Vorlage-Website-Bilder-37-708x472.jpg)
Expertisa tecnica da RTS per la registraziun da concerts (Funtauna: RTS)
Sco partenaria da medias gioga RTS ina rolla ordvart impurtanta en la promoziun dal festival. Kevin Donnet, directur da la communicaziun dal Montreux Jazz Festival, accentuescha: «Nus n’avain betg in grond budget per il marketing e la communicaziun. Tant pli impurtants èn per nus ils partenaris da medias che permettan a nus da derasar il maletg dal festival, ma era da far enconuschent il program.»
![Image](https://publicvalue.srgssr.ch/wp-content/uploads/2024/07/Vorlage-Website-Bilder-36-708x472.jpg)
Kevin Donnet, directur da la communicaziun dal Montreux Jazz Festival
Il Montreux Jazz Festival profitescha d’ina vart damai ordavant dals numerus chanals da diffusiun da RTS che nizzegia da l’autra vart sezza l’event per rinforzar ses contact cun il public. Quest onn ha RTS in stan sin la tribuna gratuita ed organisescha en spezial in blind test che sa cumpona da sias atgnas playlists e da quellas dal festival.
Ensemen porschan ils dus partenaris plirs events a las visitadras ed als visitaders, sco per exempel RTS Couleur 3 Live ils 12 da fanadur sin la tribuna Ipanema, nua che singuls djs dal radio pon sa preschentar al public, ubain la Pool Party da Tataki (med online svizzer fundà il 2017 da RTS) en il Casino da Montreux ils 13 da fanadur, suandada d’ina festa en il Lisztomania. Tenor Alexandre Tièche, responsabel per ils partenadis da reclama musicals da RTS, «permetta il Montreux Jazz Festival tranter auter a RTS da crear novs cuntegns en spezial pervia da la dimensiun da l’event e da sias cooperaziuns.»
Ina tribuna singulara per artist:as sviz:ras
Il Montreux Jazz Festival ha marcà l’istorgia da la musica contemporana cun promover la visibilitad e la popularitad da las artistas e dals artists. «Grazia a las registraziuns da RTS ha il festival pudì vegnir emess en l’entir mund. A la fin dals concerts han las artistas ed ils artists adina survegnì las registraziuns dal tun per offrir a lur public ina versiun live da lur albums da studio», declera Kevin Donnet.
In videoclip mit da RTS per ils moniturs da tribuna dal Montreux Jazz Festival
Era sche las cundiziuns concernent dretgs e reproducziuns èn vegnidas pli cumplexas dapi lura, è in concert a Montreux anc adina ina buna carta da visita per in:a musicist:a ed in punct da partenza ideal per cumenzar ina carriera. Grazia a las grondas stentas deditgadas durant tut quels onns a l’accoglientscha è il festival daventà ina plattafurma d’emprima classa che pussibilitescha ad artist:as da s’inscuntrar, far raits ed iniziar cooperaziuns.
Il Montreux Jazz Festival sustegna – senza intenziun – en spezial artist:as sviz:ras. «Nus na vulain betg resguardar la derivanza da las artistas e dals artists. Quai ch’el:las porschan sto simplamain correspunder a nossa lingia da program. E la scena svizra è fitg viva», explitgescha Kevin Donnet. Il mussament: Quest onn sa cumpona il program per 40 % d’artist:as sviz:ras.
Lucie Donzé, zercladur 2023