Entusiasmar per temas politics sitgs senza esser superfizials

Ella duai esser equilibrada, interessanta ed entusiasmar la populaziun per la politica: la rapportaziun davart las elecziuns pretenda sensibilitad ed in bun nas per ils temas che muventan.Trais schefredacturs da la SRG SSR raquintan co ch’els dumognan quest art e co che la SRG SSR contribuescha a la furmaziun da l’opiniun politica.

Trais profis da la politica, trais dumondas: Urs Leuthard, Laurent Caspary e Flavio Bundi èn responsabels tar SRF, RTS ed RTR per la rapportaziun avant e durant las elecziuns. En intervistas curtas respundan els mintgamai a trais dumondas davart l’equiliber dals rapports, la democrazia e las sfidas da las elecziuns naziunalas 2023.

RTR: «Adina tegnair en egl l’equiliber»

A chaschun da las ultimas elecziuns naziunalas ha RTR empruvà da satisfar a mintga gruppa da vegliadetgna e da far pli perceptibla la politica, e quai cun porscher differents formats. En il center è stada la dumonda da la participaziun. Uschia ha RTR per exempel visità la vischnanca cun la participaziun electorala la pli bassa – Schluein – e quella cun la pli auta: Lon.

Flavio Bundi è dapi sis onns schefredactur da RTR.

Flavio Bundi, co garantescha RTR ina rapportaziun neutrala en connex cun las elecziuns?
Per mai èn trais puncts impurtants: chapir, contextualisar e pussibilitar. En in emprim pass – e quai è il punct il pli impurtant – vai per tadlar fitg bain. Senza gia valitar u metter en in context. I sa tracta mo da chapir tge che muventa ed occupa la populaziun. Silsuenter èsi d’approfundar il tema e metter el en in context: tge consequenzas han las opiniuns e modas da pensar? Co è il context? Uschia po il public ordinar las infurmaziuns. E la finala: entrar en in dialog per sa barattar. Ina democrazia vivida duess pussibilitar ina discussiun, e là vulessan nus porscher maun. Inscunters reals creschan in dialog e gidan d’avrir la vista.

Tgenina è la pli gronda sfida en connex cun la rapportaziun?
Attrair l’attenziun dal public e render accessibla la politica. La participaziun politica en noss pajais è numnadamain memia bassa. Ina democrazia funcziuna dentant mo, sch’ins sa participescha. Nus vulain perquai svegliar l’interess dal public per las elecziuns e per temas politics. Nossa pli gronda sfida en connex cun las elecziuns naziunalas è numnadamain stà da tegnair en egl l’equiliber da la rapportaziun: betg memia bler, betg memia pauc. Nus ha er occupà la dumonda quant divertenta ed attractiva che la politica dastga esser. Era sche nus vulain svegliar l’interess, na po la rapportaziun betg finir en in divertiment pur, mabain sto vegnir fatga cun seriusadad.

Tgenina è la fermezza da la rapportaziun da la SRG SSR?
A mai statti a cor da menziunar che era las medias privatas prestan buna lavur. La fermezza da la SRG SSR è segir il fatg ch’ella è enragischada en la regiun ed è tras quai fitg damanaivla dal public. Ultra da quai essan nus posiziunads bain era digitalmain, per exempel cun il schurnalissem da datas e las infurmaziuns approfundadas che porschan ina vaira plivalur.

SRF: «Mintgatant èsi da schonglar in pau, per che tut giaja si»

En connex cun las elecziuns 2023 ha SRF producì diversas emissiuns , en il radio per exempel il «Wahlzmorgen» ed il «Parteiencheck», en la televisiun avain nus cumplettà emissiuns cumprovadas sco la «Arena» cun in format nov «Bitte auf den Punkt!» La dumengia da las elecziuns sezza ha SRF emess durant dudesch uras contribuziuns en directa, analisas e calculaziuns approximativas da tut las 26 chapitalas chantunalas.

Urs Leuthard, manader da la redacziun da televisiun da SRF en la Chasa federala ha analisà per la sisavla giada las elecziuns federalas.

Urs Leuthard, co garantescha SRF ina rapportaziun equilibrada en connex cun las elecziuns?
Nus resguardain las directivas da la SRG SSR: La rapportaziun duai esser objectiva, multifara ed independenta. Nus avain in’obligaziun da diligenza particulara ch’è impurtanta surtut ils sis mais avant la dumengia da las elecziuns e votaziuns. Quai vul dir che nus ans stentain anc dapli che uschiglio da tractar tut las partidas a moda eguala. En las emissiuns da novitads na mesirain nus dentant betg la lunghezza da las contribuziuns sco en emissiuns da discussiun sco la «Arena». Nus empruvain però da tegnair en egl la vista globala. Trais emnas avant las elecziuns, en l’uschenumnada fasa chauda, datti dal reminent nagins purtrets singuls pli e la rapportaziun da las elecziuns vegn reducida.

Tgenina è la pli gronda sfida da la rapportaziun?
Jau ves qua trais puncts. Primo èsi difficil da tractar tut las candidatas e tut ils candidats exact tuttina gist ed a medem temp garantir la rapportaziun da novitads normala. Qua èsi mintgatant da schonglar in pau per che tut giaja si. I dat mintga di da sclerir dumondas sco: pudain nus anc far in’intervista senza metter en privel l’equiliber? Quest process vegn accumpagnà stretgamain, en la planisaziun, ma er en nossa runda da resuns.
Segundo avain nus constatà a chaschun da las ultimas elecziuns che bleras partidas han tschertgà ordavant l’attenziun ed envidà pli savens a conferenzas da medias. Qua avain nus guardà nà fitg exact: è il tema relevant u sa tracti mo d’ina occurrenza en il rom dal cumbat electoral? E betg il davos èsi stà ina sfida da satisfar a tuts cun nossas resursas limitadas – la mesadad dal team è stà occupà las emnas avant las elecziuns cun preparar l’emissiun per il di da las elecziuns.

Tgenina èn la fermezza da la rapportaziun da la SRG SSR?
Nus avain la pretensiun d’esser independents. Ed jau pens che quai ans reusseschia detg bain. Cuntrari ad intginas chasas da medias privatas n’avain nus nagina vischinanza a tschertas partidas. Quai che jau appreziesch fitg vi da mia lavur: ils ultims 20 onns n’è anc mai in superiur sa maschadà en en mia lavur u ha empruvà d’influenzar in’istorgia. Nus pudain adina decider sezs tge ch’è publicisticamain raschunaivel e tge betg. Ultra da quai avain nus a disposiziun ina gronda rait da correspundent:as: la dumengia da las elecziuns ha mintga chantun in’atgna correspundenta u in agen correspundent.

RTS: Debatta directa tranter la populaziun e las partidas

Las emnas avant las elecziuns naziunalas ha RTS mess il focus sapientivamain sin la populaziun. En il format «L’avis d’ici» ha RTS purtretà 18 persunas che han confruntà las responsablas ed ils responsabels da las partidas en il decurs dal cumbat electoral cun dumondas dal mintgadi.

Laurent Caspary è dapi set onns schefredactur da Radio RTS e lavura dapi 14 onns tar l’emettur.

Laurent Caspary, co garantescha RTS ina rapportaziun equilibrada en connex cun las elecziuns?
Nus essan obligads da chattar in equiliber. Per che quai reusseschia mesirain nus en tut las emissiuns la preschientscha ed il temp da discurrer dals giasts politics. Quai faschain nus da princip adina, las emnas avant las elecziuns dentant anc cun dapli quità. A partir dals 21 d’avust avain nus per exempel persequità mintga preschientscha d’in commember da partida sin noss emettur per avair ina survista cumplessiva da nossa purschida e per pudair equilibrar la preschientscha da las partidas en cas da basegn. Nus avain nudà la durada da las preschientschas, il gener d’emissiun ed il format, per exempel, sch’i sa tracta d’ina intervista en directa u d’ina reacziun registrada ordavant. I n’è betg adina stà simpel da chattar l’equiliber. Gist en connex cun la demissiun e la successiun dad Alain Berset hai forsa dà ina surpaisa da la partida socialdemocratica.

Tgenina è la fermezza da la rapportaziun da la SRG SSR?
Quai è la vischinanza a la populaziun che nus creain grazia a nossa rait da correspundent:as en tut ils chantuns. Nus pudain intermediar fitg bain a noss public co che la Svizra funcziuna. Ultra da quai avain nus era collavurà stretgamain cun las staziuns da televisiun privatas e per exempel integrà sin nossa pagina-web ils links a lur debattas. Uschia pon tuttas duas varts profitar: nus da la vischinanza dals emetturs locals a las debattas urbanas, els da nossa vastadad e diversitad.

Tgenina è la pli gronda sfida en connex cun la rapportaziun?
Las elecziuns èn per tschert:as burgais:as memia cumplexas. Nus vulain cuntanscher ch’ellas ed els s’interessian per quellas. La pli gronda sfida è perquai da selecziunar ils temas ed aspects relevants. Cun prender decisiuns redacziunalas cleras augmentain nus nossas schanzas d’attrair l’attenziun da noss:as aspectatur:as e da far cler al public ch’el po far sez in’elecziun politica. Nus faschain quai cun formats classics sco debattas tranter politicras e politichers u a chaschun da las elecziuns 2023 l’emprima giada era cun noss nov format «L’avis d’ici». Per quest accent tematic avain nus tschertgà 18 persunas da differentas classas da vegliadetgna, professiuns e regiuns e creà in spectrum da persunas – dal dischoccupà fin al patrun. Noss:as schurnalist:as han accumpagnà questas persunas stretgamain durant in’emna – igl ha schizunt dà collegas che han pernottà tar ellas. Da quai èn resultads portraits auditivs e visuals. En las emissiuns han questas persunas tschentà lur dumondas persunalas a las partidas ed a las candidatas ed als candidats, davart temas sco la capacitad da cumpra, l’immigraziun, la sanadad u era l’ambient. Quai è stà ina nova experientscha per tuttas e tuts: ina debatta autentica e directa ch’è era stada ina sfida per las persunas responsablas da las partidas.

Daniela Huwyler, mars 2024