La purschida culturala è impurtanta – e quai pudess la SRG SSR anc far meglier

Tenor la concessiun ha la SRG SSR l’incumbensa da promover la cultura e da rinforzar las valurs culturalas da la Svizra. È quai necessari? E sche gea: quant bain fa ella quai? Il « Dialog Public Value » emprova da respunder a questas dumondas. Uss èn ils resultats avant maun.

En il «Literaturclub» da SRF discuta la runda d’expert:as davart il nov cudesch da Wilfried Meichtry ed online datti in ticker rumantsch davart l’Open Air Lumnezia. Il medem mument resuna en il radio ina registraziun d’in concert dal festival da jazz a Chiasso ed a la televisiun da la Svizra franzosa va in’equipa en il museum «Mudac» a Losanna sin ils fastizs dal surrealissem: la cultura è ina part centrala da la purschida da la SRG SSR. Tenor lescha ha ella l’incumbensa d’intermediar la cultura svizra, da contribuir al svilup cultural e da rinforzar las valurs culturalas. Ademplir l’incumbensa culturala da la SRG SSR na signifitga dentant betg unicamain da rapportar davart la cultura, mabain era da promover la creaziun culturala en Svizra. Per exempel cun co-producir films e serias, sustegnair finanzialmain occurrenzas e festivals u promover la musica svizra al radio.

Ma quant bain ademplescha la SRG SSR questa incumbensa fixada en la lescha? Tge pudess ella far meglier? Ed èsi insumma relevant per la societad ch’ina chasa da medias da dretg public fa quai? Cun questas ed autras dumondas davart la cultura è s’occupà il «Dialog Public Value» da la SRG SSR: il 2023 ha ella fatg in’enquista entaifer la vasta populaziun e gruppas specificas dal champ cultural (vesair la chascha).

Ils resultats da questa enquista represchentativa e da las intervistas qualitativas mussan: l’incumbensa culturala da la SRG SSR è tenor las passa 3000 persunas interrogadas relevanta per la Svizra. Co ch’ella ademplescha quella, procura dentant per part per critica. En quest reguard datti pia potenzial da meglieraziun.

Ella è la tscharescha empè dal levon

L’emprim suondan ils resultats da las intervistas cun 48 persunas da la scena culturala: ellas èn actualmain per gronda part cuntentas cun la moda e maniera co che la SRG SSR ademplescha l’incumbensa culturala e dattan a l’interpresa notas suffizientas fin bunas. ((En Svizra romanda han las persunas interrogadas valità sia lavur en media cun 6,8 da 10 puncts, en Svizra taliana cun 7,7 puncts, en Svizra tudestga cun 7,1 puncts, en Svizra rumantscha cun 6,5. Ensemen cun las notas da las persunas culturalmain activas sin plaun naziunal ha quai dà ina media svizra da 6,9 da 10 puncts.))

Tenor las persunas interrogadas èn las purschidas da la SRG SSR senza alternativa, saja quai concernent la rapportaziun sco era la promoziun da la cultura. Bleras persunas intervistadas èn da l’opiniun che la SRG SSR haja in’influenza economica indispensabla sin il sectur cultural e faciliteschia a la populaziun l’access a la cultura. Ultra da quai pensa la maioritad dad ellas ch’i saja impurtant d’ademplir l’incumbensa culturala per promover la coesiun e la varietad dal pajais. La SRG SSR rendia visiblas las valurs e tradiziuns che ans uneschian e reflecteschia las numerusas furmas da la cultura. «Grazia a la purschida da la SRG SSR daventain nus adina puspè conscients che nus essan in pajais quadriling», di per exempel Dominik Deuber dal Collegi da musica da Winterthur.

En tut las regiuns e sin plaun naziunal expriman las gruppas d’interess dentant era critica. En Svizra romanda per exempel pensa la maioritad da las persunas interrogadas che la SRG SSR sa focusseschia memia fitg sin la purschida culturala al Lai da Genevra, ed en Svizra rumantscha e tudestga èn intginas persunas da l’opiniun che la giuventetgna vegnia resguardada memia pauc: «La generaziun da mes geniturs na po betg s’imaginar in mund senza SRF, mia generaziun s’orientescha gia pli vastamain e la proxima n’ha mai emprendì d’enconuscher quest feeling da fieus da champ. La dumonda è: a tgi mancass questa purschida?», di Mathias Balzer dal Kulturmagazin Frida. Insaquantas da las persunas interrogadas giavischan era dapli rapports davart temas culturals, per exempel Jacqueline Strauss dal Museum da la communicaziun: «Da preschent èn ils rapports culturals sco la tscherescha sin la petta, ella duess esser il levon en la pasta.»

La vasta populaziun è da l’opiniun che la SRG SSR adempleschia l’incumbensa 

Ils resultats da l’enquista represchentativa mussan che era la vasta populaziun appreziescha l’incumbensa culturala da la SRG SSR: 86 pertschient pensan ch’ella saja «fitg impurtanta» u «plitost impurtanta» per la societad en general ed 85 pertschient da las persunas activas sin il champ cultural pensan ch’ella saja «fitg impurtanta» u «plitost impurtanta». Per sia realisaziun survegn la SRG SSR bunas notas da la populaziun: ina clera maioritad è da l’opiniun ch’ella adempleschia l’incumbensa. Tenor las persunas interrogadas datti potenzial da meglieraziun en connex cun differentas gruppas da la populaziun. Ellas èn da l’avis che la SRG SSR pudess rinforzar la coesiun cun pledentar meglier la generaziun giuvna e las persunas che han in’autra lingua materna ch’ina da las quatter linguas naziunalas. Las valitaziuns da la populaziun generala sa cuvran per gronda part cun quellas da las expertas e dals experts da cultura, damai da las gruppas d’interess. Ina differenza dat dentant en egl: entant che las gruppas d’interess pensan ch’ils cuntegns culturals d’autras regiuns linguisticas sajan impurtants per la coesiun naziunala, na s’interessa la populaziun betg tant per quels.  

 Ils resultats dal «Dialog Public Value» èn resumads en in rapport che skizzescha ils champs d’acziun e las pussaivladads da meglieraziun tant per las singulas regiuns linguisticas sco era sin plaun naziunal. A basa da quels discuteschan ils responsabels fin l’atun 2024 ils resultats en las regiuns linguisticas e fixeschan mesiras pussaivlas – per exempel novs projects u midadas da purschidas existentas. Las mesiras duain rinforzar la contribuziun che la SRG SSR presta a favur da la cultura en Svizra.  

Malolo Kessler per SRG SSR