Ils giuvenils apprezieschan l'auta qualitad da las infurmaziuns da la SRG SSR

La SRG SSR fa puncts tar ils giuvenils cun infurmaziuns d’auta qualitad – quai mussa in’enquista cun bunamain 3000 persunas da l’entira Svizra. Quella revelescha dentant era: la purschida da temas che interessan ils giuvenils pudess esser pli vasta. Cun agid da differentas mesiras vul la SRG SSR perquai en l’avegnir tegnair quint meglier da las spetgas dals giuvenils.

Infurmaziuns fidablas, independentas e d’auta qualitad: quai spetgan ils giuvenils da las medias. I n’è dentant betg uschè simpel per els dad ir per quellas, sco quai che mussa il dialog davart il Public Value «Ils giuvenils e la SRG SSR». Cun l’enquista fatga dal zercladur 2022 fin il mars 2023 ha la SRG SSR vulì vegnir a savair dapli davart il consum da medias dals giuvenils (vesair la chascha). Via tge chanals s’infurmeschan els? Co valiteschan els la purschida da la SRG SSR? E tge spetgan els da la chasa da medias publica?

Infurmaziuns fidablas, independentas e d’auta qualitad: quai spetgan ils giuvenils da las medias.
Esser pli preschenta en las medias socialas

83 pertschient dals giuvenils èn da l’avis che la SRG SSR prestia buna enfin fitg buna lavur per dar access ad infurmaziuns d’auta qualitad.
«I dat bleras fake news. Jau vi adina esser al current e pudair ma fidar da la correctadad da las novitads», è s’exprimida ina persuna interrogada.

La maioritad dal gremi è da l’ avis che la purschida d’ infurmaziun da la SSR pussibilitescha als giuvens in access ad infurmaziuns d’ auta qualitad.

«
I dat bleras fake news. Jau vi adina esser al current e pudair ma fidar da la correctadad da las novitads.»
Scolar spezialisà

Ina figura in zic main buna fa la SRG SSR en connex cun l’intermediaziun da cumpetenzas medialas. Cunzunt represchentant:as d’interess dals giuvenils, per exempel l’organisaziun da giuvenils Pro Juventute, valiteschan la purschida da la SRG SSR en quest reguard sco insuffizienta e giavischan dapli engaschament – per exempel cun cuntegns tematics specifics en las medias socialas. U sco quai ch’ina persuna ha intimà durant in lavuratori en ina scola professiunala spezialisada: «Jau giavisch videos curts en las medias socialas che decleran co ch’ins verifitgescha infurmaziuns e sa fa in’atgna opiniun.»


La prestaziun da la SSR vegn valitada dal gremi sco detg buna. In’excepziun èn ils acturs che giuditgeschan la prestaziun da la SSR il pli critic.

I na fa betg smirvegliar che las persunas interrogadas spetgan tranter auter dapli preschientscha en las medias socialas. Instagram, YouTube e TikTok èn ils chanals d’infurmaziun ils pli impurtants per ils giuvenils – ina constataziun dal dialog davart il Public Value ch’è congruenta cun autras retschertgas internaziunalas.

Dapli novitads positivas, dapli temas per giuvenils

Dal punct da vista da las persunas interrogadas ha la SRG SSR potenzial da meglieraziun era quai che pertutga la represchentaziun dals temas e da las opiniuns dals giuvenils – las prestaziuns en quel sectur vegnan recepidas sco plitost mediocras.


Il gremi è dividì areguard la prestaziun da la SSR. Ina pitschna maioritad è dentant da l’avis che la prestaziun da la SSR saja plitost nauscha u nauscha. La maioritad dals giuvens interrogads considerescha la prestaziun da la SSR per buna fin fitg buna.

Las purschidas datti, ma …

Suenter il dialog ha la SRG SSR analisà en il rom d’in lavuratori las spetgas dals giuvenils e las cumpareglià cun las purschidas existentas. Il facit: atgnamain datti gia bleras activitads e numerus formats che rinforzan la cumpetenza mediala, che intermedieschan cuntegns positivs u che mussan l’ambient da viver dals giuvenils. Uschia organiseschan ils differents secturs da la SRG SSR per exempel en scolas regularmain projects davart la cumpetenza mediala. L’atun 2023 ha la SRG SSR plinavant lantschà ensemen cun organisaziuns partenarias la pagina-web newstest.ch. Sin quella pon persunas interessadas testar lur diever da las medias digitalas ed al rinforzar. Per novitads che fan plaschair datti formats sco Die Idee durant 10vor10 u la newsletter da RTS suisse good; ad in public giuven sa drizza tranter auter Tataki (RTS), Impact, Mood (SRF) u Spam (RSI).

L’analisa interna ha dentant era mussà che las purschidas existentas vegnan commerzialisadas e communitgadas memia pauc. Perquai vul la SRG SSR render pli enconuschentas ellas als giuvenils. Ella vul esser pli preschenta là, nua ch’ils giuvenils passentan il temp – online ed offline.
Ulteriuras mesiras ch’ella vul prender suenter il dialog è da recrutar dapli glieud giuvna, cura ch’i va per occupar ina plazza u da furmar in advisory board cun giuvenils. Uschia vul la SRG SSR tegnair quint dals giuvenils e rinforzar la solidaritad tranter giuven e vegl – uss ed en l’avegnir.

Tobias Hänni, favrer 2024

Ils giuvenils e la SRG SSR

Cun il format da dialog «Ils giuvenils e la SRG SSR» ha la SRG SSR tutgà il puls als giuvenils da tut las regiuns linguisticas da la Svizra areguard lur diever da las medias. La partiziun Public Value da la SRG SSR che ha realisà l’enquista ha mess il focus sin las spetgas da giuv:nas consument:as da medias envers la chasa da medias publica. Ultra da la gruppa en mira sco tala èn vegnids a pled era stakeholders che represchentan ils interess dals giuvenils, per exempel organisaziuns da giuvenils u represchentant:as d’uffizis chantunals da la furmaziun professiunala. En tut èn sa participadas 2968 persunas a l’enquista online, da quellas 1097 participant:as sut 25 onns. Plinavant han gì lieu lavuratoris cun 185 giuvenils, principalmain en scolas professiunalas e discurs qualitativs cun 38 represchentant:as d’interess.

En quests secturs creain nus ina valur

COESIUN

La SRG SSR porscha ina tribuna naziunala ad usits regiunals sco la stgargiada d’alp, la lutga u il tschaiver. Quai collia noss pajais sur tut ils cunfins linguistics e creescha in’identitad cuminaivla. Per 82% da las persunas interrogadas è quai in’incumbensa centrala da la SRG SSR.

DEMOCRAZIA

L’auta qualitad da las novitads e l’independenza da la SRG SSR èn centralas per la democrazia. Da quest avis èn 66 pertschient da las persunas interrogadas. Quai èn puncts essenzials da l’incumbensa da la SRG SSR.

DIVERSITAD

Usits genuins, dialects sonors, stils da viver urbans – las atgnadads culturalas e linguisticas rendan la Svizra in pajais singular. Questa gronda diversitad daventa visibla en la vasta purschida da SRF, RTS, RSI e RTR.

VALURISAZIUN

Cun projects sco ils hackdays u l’avertura da nossas bancas da datas faschain nus avanzar l’innovaziun digitala en Svizra e cun noss programs da radio e noss partenaris promovain nus la branscha da film e musica svizra.