Cunter la polarisaziun ed il foss tranter citad e champagna: La SRG SSR contribuescha a la coesiun en Svizra

Il chit social en Svizra survegn sfessas. Tge èn ils motivs? E co po la SRG SSR far frunt a quest svilup? In’enquista da gfs.bern mussa: Per la populaziun èsi cler ch’i dovra la SRG SSR per la coesiun en noss pajais. Quai ha era mussà fitg bain la seria d’occurrenzas en ustarias, en las qualas la SRG SSR ha tschertgà il dialog cun las abitantas ed ils abitants d’en total 23 lieus da l’entira Svizra.

Esser qua in per l’auter. Sa sentir sco unitad, communitgar in cun l’auter e respectar las differenzas: La coesiun sociala è impurtanta per la maioritad da la populaziun svizra – ella vegn dentant observada cun preoccupaziun. Tut tenor tge gruppa da la populaziun ch’ins dumonda, percepescha ina gronda part ella sco porusa u schizunt sco periclitada da scrudar. 70 pertschient da la populaziun èn da l’opiniun che la coesiun saja actualmain periclitada.

Bunamain trais quarts crain ultra da quai ch’ella saja sa reducida ils ultims onns. Quai mussa in’enquista actuala cun 2’338 abitantas ed abitants da tut las regiuns linguisticas da la Svizra che l’interpresa da retschertga gfs.bern ha realisà la primavaira 2025 per incumbensa da la partiziun da Public Value da la SRG SSR. Ils resultats conferman danovamain il maletg pauc encuraschant dal stadi da la coesiun sociala che ha constatà gia in’enquista da l’institut da retschertga Sotomo il favrer 2025 ed in’enquista da l’Universitad da Lucerna publitgada in zichel pli baud. Gfs.bern e la SRG SSR n’han dentant betg mo vulì savair co ch’i stettia cun la coesiun sociala ord vista da la populaziun, mabain era tge rolla che la SRG SSR gioghia per rinforzar quella.

Rapports equilibrads: impurtants per cumbatter la polarisaziun

Ils resultats mussan che la rolla da la SRG SSR è incontestada per il chit social. Per 90 pertschient da las persunas dumandadas èsi impurtant che la chasa da medias ha l’incumbensa da promover la coesiun. Tenor 72 pertschient gioga la SRG SSR cun ses service public ina rolla centrala en il cumbat cunter la separaziun da la societad, gist cura ch’i va per la polarisaziun politica. «Cun sia obligaziun da rapportar a moda equilibrada è la chasa da medias predestinada da prestar ina contribuziun relevanta en quest connex», scriva gfs.bern en il rapport davart l’enquista. Ina da las persunas interrogadas che ha dà bunas notas a la SRG SSR en questa dumonda, argumentescha: «La SRG SSR emprova (e quai reussescha bain ad ella) da dar spazi a diversas opiniuns e da sclerir las pli differentas posiziuns.» Quests rapports equilibrads realisads cun premura èn prezius, perquai ch’els èn in med cunter la polarisaziun. E quella fa tenor il rapport dal WEF davart las ristgas 2025 part dals tschintg pli gronds privels per l’umanitad.

Ma cun tge purschidas contribuescha la SRG SSR concretamain a la coesiun? En l’enquista èn vegnidas numnadas il pli savens emissiuns d’infurmaziun, però era plattafurmas da discussiun e rapports davart eveniments gronds ed occurrenzas da sport. «La SRG SSR creescha muments, durant ils quals tuttas e tuts en la populaziun vesan ed audan gratuitamain il medem: las elecziuns dal Cussegl federal, elecziuns/votaziuns, gieus da ballape, cursas da skis, l’ESC», menziuna ina da las persunas interrogadas. Cuntegns ficziunals ed emissiuns da musica populara paran percunter d’avair ord vista da la populaziun la pli pitschna impurtanza per la coesiun sociala.

«Quai gida da chapir»

L’enquista metta ultra da quai in focus sin ils differents aspects da la coesiun sociala – pertge ch’il term è cumplex. E la dumonda tge che unescha ina societad, è ina da las dumondas las pli centralas ed a medem temp cumplexas en la perscrutaziun sociologica. Ins ha perquai era vulì savair da las participantas e dals participants, nua ch’i dettia tenor ellas ed els ils pli gronds foss: quels localiseschan las persunas interrogadas cunzunt tranter las diversas tenutas politicas e tranter las differentas classas da la populaziun, tranter umans cun e senza experientscha da migraziun e tranter citad e champagna.

Mintgamai la plipart da las intervistadas e dals intervistads è da l’opiniun ch’i reusseschia actualmain a la SRG SSR da gidar da serrar il foss tranter umans cun differentas tenutas politicas e tranter la populaziun urbana e rurala. Era per ses engaschament che promova la coesiun sin plaun naziunal, tranter las regiuns linguisticas e las schlattainas dat ina clera maioritad bunas notas a la SRG SSR. I dettia adina puspè emissiuns davart umans che pateschian per exempel d’in disturbi da la sanadad, argumentescha ina persuna participanta sia percepziun positiva da la prestaziun da la SRG SSR. «La SRG SSR mussa ses mintgadi. Quai gida da chapir auters umans.»

Potenzial da meglieraziun: la populaziun giavischa dapli «glieud simpla»

«Potenzial da meglieraziun» vesa la populaziun tenor il rapport percunter areguard la coesiun tranter las classas socialas ed ils umans cun e senza experientscha da migraziun. «Aspects da la diversitad èn fitg preschents en Svizra», constatescha ina persuna dumandada. Ella giavischia ch’il program vegnia orientà pli fitg tenor questa diversitad en l’entira populaziun. Ina persuna da la Svizra franzosa ha ultra da quai remartgà che las purschidas da RTS parian en cumparegliaziun cun las tudestgas in pau elitaras e dettian memia pauc spazi a la «glieud simpla»: «Jau fiss cuntenta, sche betg mo las scheffas ed ils schefs vegnissan adina a pled, mabain er ils lavurants e las emploiadas.»
La finala mussan ils resultats era, co che la populaziun percepescha actualmain la cuntrada mediala en Svizra. Ella stima las medias publicas e privatas sco funtaunas d’infurmaziun e sa fida dad ellas – cuntrari a las medias socialas ubain a blogs. Per las participantas ed ils participants da l’enquista èsi plinavant incontestà che medias independentas èn indispensablas: sco cuntrapais a la separaziun sociala, sco agid d’orientaziun en in mund adina pli cumplex e betg il davos sco pitga purtanta da la democrazia en Svizra.

23 ustarias, 670 persunas

Cun ils resultats da questa enquista è la SRG SSR sa messa l’atun 2025 sin viadi per la seria d’occurrenzas en ustarias: En 23 lieus en l’entira Svizra ha ella mesirà il puls da la populaziun. Represchentant:as prominent:as da la SRG SSR – per exempel Nik Hartmann, Nathalie Christen e Sandro Brotz, dentant era Susanne Wille – han discutà cun ils umans al lieu davart las medias, la societad e la contribuziun da la chasa da medias publica per la coesiun da la societad. La retscha d’occurrenzas è stada part dal format da dialog davart il tema coesiun da la partiziun Public Value che ha gia tschertgà ils onns avant il dialog cun persunas da la cultura (2023/2024) e persunas giuvnas (2022/2023).

En total èn 670 persunas sa participadas a las occurrenzas, da las qualas dudesch han gì lieu en Svizra tudestga, set en Svizra romanda, trais en Svizra taliana ed ina en Svizra rumantscha. L’evaluaziun da las occurrenzas mussa ch’ellas han pledentà in public multifar: «Nus avain gì al lieu tant persunas privatas sco er uniuns e scolas. Vegnid:as èn tant critic:ras sco er aderent:as da la SRG SSR», di Henriette Engbersen, manadra da partiziun «Public Value».

Il public n’ha betg mo pudì dumandar e discutar, mabain era vuschar davart differentas tematicas. Uschia han ins p.ex. dumandà il public, sch’el saja surprais ch’ina enquista da gfs.bern mussia che la maioritad da la populaziun è da l’avis che la coesiun saja periclitada. En Svizra tudestga han 82 pertschient respundì cun na, en la Svizra romanda 81 pertschient. In’ulteriura dumonda davart la coesiun ha confermà il maletg che l’enquista da gfs ha mussà: 62 pertschient dal public da la Svizra tudestga han ditg che las medias classicas contribueschian plitost a la coesiun che a la separaziun. En la Svizra romanda èn quai perfin stads 73 pertschient.

«Enritgint da pudair guardar davos las culissas»

Ultra da quai han ils discurs en las ustarias mussà tge tematicas che commovan il public. La neutralitad, resp. la rapportaziun equilibrada da la SRG SSR èn stadas tema da Kriegstetten fin Claustra e dad Echallens fin Anzère. Il public en la Svizra taliana fatschenta percunter tut in’autra tematica tenor l’evaluaziun da la partiziun da Public Value: Qua è vegnì discutà savens, co che la SRG SSR possia restar relevanta per la giuventetgna. Tut en tut tiran las organisaturas ed ils organisaturs dals inscunters in facit positiv: «Las occurrenzas han mussà a nus ch’il barat al lieu è impurtant.»

Quai vesa er il public uschia – almain sch’ins resguarda intgins resuns: «Per mai èsi stà ina saira fitg enritginta, durant la quala jau hai pudì guardar davos las culissas ed emprender bler davart la SRG SSR, SRF ed il mund medial. Grazia per quest barat!» , ha insatgi per exempel scrit suenter l’occurrenza a la partiziun da Public Value.

Malolo Kessler, publitgà l’emprima giada l’october 2025, actualisà il schaner 2026