Il Locarno Film Festival ed RSI – communablamain per il film!

Il Locarno Film Festival è in dals pli impurtants festivals da film dal mund. RSI sustegna sco partenaria l’engaschament per il film. Ella contribuescha al svilup da novas linguas da film ed a l’access dal festival per in public vast. Uschia na vegnan betg mo ils fans dal kino sin lur custs.

Igl èn diesch dis plain magia. Diesch dis, durant ils quals Locarno è il center dal mund cineast: dals 7 fin ils 17 d’avust ha lieu la 77avla ediziun dal Locarno Film Festival. Durant che las salas da kino e la Piazza Grande s’avran per il kino d’auturs, s’emplainan las giassas stretgas e senza traffic cun persunas da l’entira Svizra e da tut il mund.

Era quest onn è RSI da la partida e rapporta dal festival. L’emissiun speziala quotidiana sin LA 1 na tematisescha per exempel betg mo stars, reschissur:as ed actur:as premiad:as che vegnan al festival, mabain era l’ediziun dal festival actuala en general. «Sco emettur giastader metta RSI en scena quest eveniment cultural da prestige che porta blera glischur a noss pajais ed a las regiuns giastadras», declera Alessandro Marcionni, manader da la partiziun da ficziun tar RSI ed anteriur manader da program dal Locarno Film Festival. «Ils cuntegns producids da nus vegnan duvrads era dad auters emetturs da televisiun e radio da l’entir mund.» RSI haja uschia in’incumbensa impurtanta, ella sustegnia e promovia la cultura svizra ed internaziunala.

Il sulet festival en Svizra cun il status «A-List»

«Igl è l’unic festival en Svizra cun status ‹A-List› ed in dals 15 festivals da film ils pli impurtants dal mund», conferma Ivo Kummer, commember da l’Academia dal film svizzer e da l’Academia dal film europeic EFA. «Perquai ha il festival uschè ina gronda muntada per noss pajais e per l’art cinematografic.» Grazia a la libertad per da concepir il program e l’avertadad per temas difficils saja il festival er in’occurrenza singulara sin nivel internaziunal, di Kummer, che ha manà dudesch onns la secziun film en l’Uffizi federal da cultura.

Il Locarno Film Festival ha surmuntà cun success ils regress chaschunads da la pandemia: Il 2023 è il dumber da visitadras e visitaders da las preschentaziuns s’augmentà per 14 pertschient sin 146’930 aspectaturas ed aspectaturs: 86’530 en las salas da kino e 60’400 sin la Piazza Grande. Tar il public expert èn las cifras perfin s’augmentadas per 31 pertschient sin total 4639 persunas – da quellas 1530 da l’industria da film e 783 da la pressa e fotografia. Era las occurrenzas che han lieu dasper il festival han survegnì in schlantsch considerabel grazia al program multifar: cun 105’000 persunas han fatg part 62 pertschient dapli persunas che l’onn avant.

Ina missiun communabla

Las medias ed il festival s’engaschan communablamain per che la cultura dal film possia sa sviluppar vinavant. «Durant ch’il festival, per il qual jau hai pudì lavurar blers onns, sa concentrescha sin scuvrir e perscrutar linguas da film relevantas per la societad en la sparta kino d’auturs ha RSI da l’autra vart la finamira d’esser cun sia purschida in portavusch per il public da lingua taliana en Svizra», declera Alessandro Marcionni. Grazia a la grondiusa lavur dal festival scuvria RSI en mintga ediziun ovras curaschusas ed interessantas ch’ella piglia lura si durant l’onn en la planisaziun dal program e mussa lura alternant cun films per il public vast.

Bleras coproducziuns èn da la partida

RSI coproducescha ad onn en media 40 fin 50 films documentars, films lungs e films curts. «Intgins da quels vegnan tschernids e mussads durant il festival ensemen cun producziuns internaziunalas da prestige. Uschia survegnan els in palc internaziunal», di Alessandro Marcionni. «Da la secziun ‹Pardi di Domani› fin a la Piazza Grande – sco en il cas da ‹Semret› da Caterina Mona l’onn 2022 – mussa Locarno mintg’onn dapli che 20 coproducziuns da la SRG SSR. Quatter u tschintg da quellas derivan da la Svizra taliana.» Era dal program dal festival da quest onn fan part diversas coproducziuns da RSI e da la SRG SSR.

«Il Locarno Film Festival n’è dentant betg mo in lieu nua ch’ins mussa e guarda films, mabain er in spazi per il dialog e la discussiun», di Raphaël Brunschwig, il manader operativ dal Locarno Film Festival. «Plinavant naschan qua ideas e concepts per novs films ed i vegn discutà fitg criticamain davart las vias da producziun e la vendita dal film contemporan. Perquai è ina plattafurma da barat cun il conturn medial regiunal impurtanta.»

Ils ultims onns e decennis è la branscha da film vegnida marcada da grondas midadas – e cun ella er il Locarno Film Festival. Ina constanta collia il festival cun RSI: la stenta permanenta da sa midar e da s’adattar al temp. «Jau pens per exempel al Pacte de l’’audiovisuel e las debattas davart quel», di Brunschwig. «U a ponderaziuns davart plattafurmas da streaming e formats ibrids. Igl è impurtant da prender a mauns quests temas a moda constructiva, quai porta novas soluziuns e svilups.»

«Ina lavur minuziusa e precisa»

Las differentas furmas da collavuraziun tranter il Locarno Film Festival e partenaris da medias sco RSI e la SRG SSR han tuttas la finamira da preschentar l’occurrenza medialmain a moda adequata e da francar il festival en la memoria audiovisuala. «Quant savessan nus davart il festival senza ils rapports en directa? E quant fiss restà da l’entschatta dal festival senza ils maletgs en las emissiuns da la Wochenschau?», dumonda Raphaël Brunschwig. «L’incumbensa da las schurnalistas e dals schurnalists è da contextualisar noss cuntegns, da derasar els e da contemplar els en in connex pli grond.» Perquai s’engascha il festival per che las medias possian far lur lavur uschè bain sco pussaivel. «Da tut temp stain nus a disposiziun per intervistas e tegnain al current las medias davart nossas iniziativas.» RSI è preschenta mintga di durant il festival, tant cun staziuns d’emissiun fixas sco era cun producziuns al lieu cun contribuziuns da radio e televisiun. «Ina lavur minuziusa e precisa», di il manader operativ dal festival. Quai saja mo pussaivel, perquai ch’il festival e RSI tgirian durant l’entir onn ina buna collavuraziun e produceschian ensemen cuntegns da qualitad. Il temp dad oz, di Brunschwig vinavant, saja marcà da la concurrenza senza retegnientschas per l’attenziun dal public. Ina concurrenza che vegnia tranter auter manada d’interess zuppads. «Era pervia da quai è la lavur da RSI indispensabla. Ella communitgescha il caracter excellent da nossa purschida.»

Tractar temas socials

A Locarno discurr’ins grazia al film davart nossa societad ed ils temas che muventan il spiert dal temp: quai capita tras ils egls dals cineasts visitaders. «Ins emprova d’evitar da siglir dad in tema a l’auter sco quai che l’economia da l’attenziun d’ozendi pretendess. Enstagl lavur’ins en la profunditad», di il manader operativ dal festival.

Anc memia savens aud’ins sin las vias tessinaisas la pretensiun ch’il festival saja in’occurrenza mo per «pauc:as». Il festival resta fidaivel als films d’auturs, ha dentant schlargià sia purschida en il decurs dals onns e porscha entant in program extendì per in public vast. «Dapi la 70avla ediziun avain nus per exempel ina purschida per famiglias ed uffants. Ad els deditgain nus duas sairas sin la Piazza Grande, blers lavuratoris ed ina preschentaziun a di», di Raphaël Brunschwig. Ultra da quai giran projects da furmaziun durant l’entir onn. «Per signalisar nossa avertadad existan iniziativas a lunga vista sco il Prix du Public UBS.» Tar quel premiescha il public sin la Piazza Grande dapi l’onn 2000 in film che duai entrar en l’istorgia dal kino. Era per la communicaziun da questas purschidas giogan tenor Brunschwig medias sco RSI ina rolla fundamentala: «Uschia gidan ellas considerablamain il public da perder la tema d’avair contact cun il festival.»

Keri Gonzato, fanadur 2024