Cura che uffants fan televisiun per uffants – e per persunas d'instrucziun

L’emissiun «OKI» da RTS vegn producida da giuvnas reportras e giuvens reporters e tracta temas che occupan ils uffants. Il project duai augmentar la cumpetenza mediala da las scolaras e dals scolars tranter diesch e dudesch onns. Ultra da quai è ella ina resursa impurtanta per las persunas d’instrucziun: RTS metta a disposiziun material d’instrucziun per mintga emissiun.

Co poss jau giuditgar, sch’in maletg è autentic u sfalsifitgà? En temps da l’intelligenza artifiziala e da las medias socialas occupa questa dumonda blers uffants e giuvenils. L’emprima episoda dad «OKI», in nov format da Radio Télévision Suisse (RTS), va a fund a questa dumonda. «OKI» è concepì aposta per uffants en la vegliadetgna da diesch fin dudesch onns e consista da contribuziuns da video dad otg fin diesch minutas che vegnan emessas tant sin Play RTS sco era mintgamai la sonda sin RTS 1. Ma il giuven format da la televisiun publica romanda n’è betg mo in’emissiun: Igl è in project participativ che pussibilitescha als uffants dad esser realisaders ed aspectaturs enina.

Per far part dal team da redacziun han uffants interessads pudì s’annunziar tar RTS. Las persunas responsablas da RTS han alura mess ensemen dus teams da mintgamai tschintg fin sis uffants da tut ils chantuns da la Svizra romanda che schluitan actualmain en la rolla da la reportra u dal reporter. Natiralmain pon ils uffants era participar a la tscherna dals temas. E las tematicas gia tractadas en l’emissiun «OKI» mussan ch’ils uffants han interess fitg vasts. I dat videos davart il stgaudament global, davart Minecraft, l’ir cun skis, ils daners, l’intelligenza artifiziala, il sien ed ils pumpiers. «Nus ans laschain manar dals temas ch’èn impurtants per ils uffants», di François Egger, moderatur da l’emissiun.

Ils uffants produceschan las emissiuns ensemen cun persunas spezialisadas da RTS en lur studios. I saja impurtant ch’els scuvrian las localitads e chapeschian co che las emissiuns vegnan realisadas, raquinta François Egger. El è surstà dal tempo, cun il qual ils uffants acquistan cumpetenzas audiovisualas, ma era da lur entusiassem e lur mirveglias. Els hajan savens filmà spontanamain quai ch’els hajan observà e tramess il material a la redacziun, raquinta il schurnalist. «Ed els san analisar fitg bain, quai è sa mussà spezialmain a chaschun d’ina emissiun davart Trump.»

Promover il pensar critic

La finamira dad «OKI» saja da promover il pensar critic da las scolaras e dals scolars en vista a las infurmaziuns ed a las novas medias, di la producenta Tania Chytil. Igl è svelt sa mussà ch’il concept funcziuna: Ils uffants che sa participeschan al project hajan per exempel emprendì en fitg curt temp d’identifitgar maletgs generads cun l’intelligenza artifiziala. Els parevian dentant era pli independents e conscients da sasezs.

En pli duai «OKI» animar ils uffants da nizzegiar la purschida da RTS sin sias plattafurmas e betg mo da consumar cuntegns sin las medias socialas. «Quai vegn ad esser ina da las grondas sfidas dals proxims onns: Nus stuain sensibilisar ils giuvenils per cuntegns d’auta qualitad», di Egger. Dentant betg per tut pretsch: Il program na vegn betg derasà en las medias socialas, mabain sulettamain via Play RTS – uschia na mussain nus era betg ils uffants en las medias socialas.

A las giuvnas reportras ed als giuvens reporters plascha la nova purschida: «‹OKI› è super! Ils temas èn adina interessants. Durant che nus tschertgain respostas a las dumondas vegnin nus animads da reflectar», di Lou, 12 onns. «Uschia emprend jau da chapir meglier il mund e da furmar in’opiniun. Ed ins emprenda da filmar bunamain sco in profi!»

«Ils uffants ston vesair tge via ch’ina infurmaziun va»

Christian Georges, collavuratur scientific da la CIIP, la Conferenza interchantunala da las directuras e dals directurs da l’educaziun per la Svizra franzosa e taliana, è expert da furmaziun mediala. El appreziescha il nov project da RTS. Ils uffants emprendian uschia che betg tut las infurmaziuns na sajan tuttina fidadas, che betg mintgina e mintgin saja ina schurnalista u in schurnalist e che l’intelligenza artifiziala fetschia tut anc bler pli intransparent. «Igl è impurtant da declerar als uffants co che las schurnalistas ed ils schurnalists tractan eveniments actuals. Els ston vesair tge via ch’ina infurmaziun va enfin ch’ella vegn publitgada.»

Ina resursa per las persunas d’instrucziun

«OKI» n’è betg mo in’emissiun dad uffants per uffants. Igl è er in’emissiun da persunas d’instruczium per persunas d’instrucziun: Scolastas e scolasts pon gidar a concepir las emissiuns ed i dat per mintga ediziun material accumpagnant che permetta d’approfundar en l’instrucziun ils temas tractads. Grazia a la diversitad tematica daventia l’emissiun in utensil adattà per blers differents roms, declera François Egger. L’expert per la furmaziun mediala Christian Georges appreziescha che las persunas d’instrucziun vegnan integradas fermamain: «Cuntrari a pli baud, cura ch’ins pudeva sin il pli anc scriver ina brev da reclamaziun, sch’insatge na plascheva betg en la televisiun.» La cooperaziun en il rom dad «OKI» creeschia in liom pli ferm tranter la scola e RTS. Ch’il material d’instrucziun vegn era duvrà, mussan ils resuns da las persunas d’instrucziun: François Egger raquinta ch’el haja survegnì dacurt pliras novitads che rendian attent ad in sbagl en in fegl da lavur. «Quai cumprova ch’il cuntegn vegn tematisà en l’instrucziun», sa legra el.

Lucie Donzé, il mars 2026