Co che RSI s'engascha per la furmaziun professiunala

Cun il project «Noi da Voi» s’engascha RSI dapi tschintg onns per la furmaziun professiunala. Las scolaras ed ils scolars scuvran en il rom da quella iniziativa a moda interactiva las professiuns multimedialas da RSI – e megliereschan a medem temp lur cumpetenza da s’infurmar. «La plivalur dal project è sia moda da motivar ils giuvenils da sa far patratgs davart lur avegnir professiunal», di Eloisa Fiscalini da las scolas medias da Chiasso.

Tge fa ina mediamaticra? Tge incumbensa ha in spezialist d’infurmaziun e da documentaziun? E tge ulteriuras professiuns interessantas porscha RSI er anc? Quai – e bler auter – intervegnan las gimnasiastas ed ils gimnasiasts en il rom dal project «Noi da Voi». Quel è sa sviluppà avant tschintg onns sco reacziun sin la pandemia. «Da quel temp na pudevan nus beneventar naginas scolaras e nagins scolars da scola media pli en noss studios per realisar ils dis tradiziunals da la cussegliaziun professiunala», di Barbara Minotti, manadra dal svilup e da la scolaziun dal persunal da RSI. «Ma nus vulevan tuttina dar a las scolaras ed als scolars la pussaivladad d’emprender d’enconuscher meglier il mund da lavur. Perquai avain nus decis dad ir directamain en las scolas – – cun in format ambulant.» La resonanza da las emprimas ediziuns da «Noi da Voi» saja lura stada uschè positiva che RSI haja decis da cuntinuar cun il project.

Dal s’annunziar cun video fin al distinguer fake news

Classas da scola pon s’annunziar via la pagina-web da RSI per il project ch’è vegnì cumplettà e structurà adina pli fitg ils ultims onns e ch’è oz dapli ch’ina occurrenza d’infurmaziun classica.

Durant las visitas en scola sa preschenta RSI l’emprim sezza in mez di ed explitgescha las differentas professiuns da medias e las pussaivladads dad emprender ellas. Silsuenter dastgan las giuvnas ed ils giuvens experimentar en divers lavuratoris per viver in ad in las professiuns da l’univers audiovisual e schurnalistic. «L’onn 2021 avain nus per exempel introducì il lavuratori da s’annunziar cun video. Quel è sa sviluppà ad ina purschida centrala», raquinta Barbara Minotti.

«Las scolaras ed ils scolars fan videos ch’els discuteschan silsuenter cun tutor:as. Quel lavuratori promova tant lur creativitad sco era lur abilitads tecnicas.» En l’ediziun actuala da «Noi da Voi» pon las gimnasiastas ed ils gimnasiasts eleger tranter dus lavuratoris: ultra dal workshop davart il tema s’annunziar cun video datti er in davart il tema fake news. Quel lavuratori maina las scolaras ed ils scolars a maun d’exempels concrets tras il process schurnalistic dal verifitgar fatgs. Ils giuvenils emprendan en quella moda da distinguer infurmaziuns falladas e co las cumbatter. Els pon damai far in’experientscha che n’als renda betg mo pli famigliara la professiun schurnalistica, mabain ch’als sensibilisescha era da duvrar a moda pli conscienta las medias en il mintgadi.

Ina schanza d’entrar en contact cun ils giuvenils

RSI vesa il project era sco schanza d’entrar en contact cun la generaziun giuvna che na chattia savens betg spontanamain lur chanals, di il redactur da multimedia da RSI Michelangelo Cavadini. Ultra da quai permettia «Noi da Voi» d’intermediar a las scolaras ed als scolars la muntada dad abilitads che na vegnian savens betg mussadas en scola. «Nus intimain ils uffants da sa far patratgs ed als preparain per la vita suenter il temp da scola.» Ils lavuratoris n’hajan sapientivamain betg ina structura d’instrucziun tradiziunala, agiunscha Daniela Gusmeroli, moderatura da RSI, che fa sco Cavadini part dal team da «Noi da Voi». Ils workshops sajan concepids a moda fitg proactiva e dinamica. «Questa avischinaziun po far vegnir a la glisch abilitads e resursas zuppadas da persunas giuvnas.» I saja impurtant da duvrar la lingua dals giuvenils e da nizzegiar tecnologias ch’els enconuschan, damai per exempel telefonins. «Nus n’ans focussain durant ils lavuratoris betg mo sin las cumpetenzas tecnicas, mabain era sin ils facturs loms che fan en il mund da lavur savens la differenza decisiva», di la moderatura da RSI. «Tenor l’experientscha participeschan schizunt ils giuvenils ils pli sceptics als lavuratoris e scuvran talents che na fissan uschiglio betg vegnids a la glisch.» Era las persunas d’instrucziun stimian «Noi da Voi». Quai na cumprovian tenor Cadavini betg mo ils resuns, mabain era las cifras: «Nus avain mintg’onn dapli dumondas da scolas, quai era grazia a la propaganda a bucca tranter las scolastas ed ils scolasts.»

La purschida ha ina rolla impurtanta en la furmaziun professiunala

Per Eloisa Fiscalini, manadra dal post da coordinaziun per mesiras d’orientaziun scolasticas en las scolas medias da Chiasso, ha «Noi da Voi» entant surpiglià ina rolla impurtanta en la furmaziun professiunala. «La plivalur dal project è sia moda da motivar ils giuvenils da sa far patratgs davart lur avegnir professiunal – senza las structuras sterias che caracteriseschan normalmain l’ambient da scola.» Ils workshops sajan utensils ideals per rabitschar or ils giuvenils da lur zona da confort e d’als motivar da scriver per exempel in curs da la vita u ina brev da motivaziun. «Tenor mia opiniun na porscha ‹Noi da Voi› tut en tut betg mo cumpetenzas praticas, mabain era la pussaivladad d’explorar vias professiunalas ch’ins survesa savens en il plan d’instrucziun tradiziunal.»

Keri Gonzato, mars 2025