«Medias en il dialog»: emprender d'enconuscher en directa il schurnalissem

Co vesa or il mintgadi d’ina correspundenta? E co sa cumprovar sco schurnalist visavi in public adina pli critic? A questas dumondas sa deditgescha «Medias en il dialog». La retscha d’occurrenzas mussa: igl è prezius per il public d’entrar en in barat cun las medias e d’emprender d’enconuscher la professiun schurnalistica .

Davant il sgrattatschiel Meret Oppenheim dasper la staziun principala da Basilea stat la glieud en colonna per la vardad. Tgi che n’ha betg pli survegnì in bigliet è collià online davent da chasa. La dumonda che fatschenta tuts: A tgi pon ins anc fidar oz en il schurnalissem?

Sin la tribuna da l’auditori dal studio da SRF sesan Philipp Cueni e Susanne Brunner. Cueni è schurnalist da medias e Brunner maina la redacziun audio da l’exteriur da SRF.

Quella saira discuteschan els ensemen davart il tema «vardad en il schurnalissem – il cumbat per la confidenza dal public».

Transparenza creescha confidenza

La saira da discussiun ha lieu en il rom da la retscha «Medias en il dialog», organisada da la Scol’auta populara da tuts dus Basileas en cooperaziun cun la SRG Basilea . «L’idea», declera il moderatur Philipp Cueni al public, «è che Vus possias dar in’egliada davos las culissas da la lavur da medias ed uschia verifitgar Vossa confidenza en las medias.»

Cueni ha stgaffì il format l’onn 2020. El è gia ditg avant s’occupà da la dumonda tge ch’i dovria per che schurnalissem da qualitad possia persvader. Sia constataziun: pli transparenta ch’è l’invista en ils process da svilup e pli gronda ch’è la confidenza dal public. «Il schurnalissem», di el, «è in instrument social impurtant per controllar la democrazia .» El haja tschertgà ina pussaivladad per intermediar a moda attractiva co che la professiun schurnalistica funcziunia.

Da la lingua a la cultura: il mintgadi d’ina correspundenta

Il public taidla cun bucca e nas tge che Susanne Brunner raquinta dal mintgadi da redacziun. Correspundent:as a l’exteriur, raquinta ella per exempel, stoppian emprender gugent linguas. «Englais e franzos na quintan tar nus betg sco linguas estras. La glieud emprenda arab, tirc u mandarin. Linguas na simplifitgeschan betg mo la communicaziun, mabain avran la porta a l’entira cultura.»

Susanne Brunner lavura dapi passa 30 onns sco reportra ed infurmescha regularmain da la guerra a Gaza. La sfida n’è betg mo da tegnair quint da duas varts socialas fermamain polarisantas. Ella sto era filtrar la vardad factica. Quai n’è betg ina simpla incumbensa en temps da fake news e material da film generà cun l’intelligenza artifiziala.

«Durant la retschertga vai savens per cumbinar rapports da perditgas», di ella. Adina cumparegliar: sa cunfa pretensiun A cun pretensiun B cun pretensiun C? «Mia incumbensa è d’intermediar ultra dals fatgs era las nianzas», di ella. «Igl è impurtant da savair co che las Israelianas ed ils Israelians sa sentan suenter ils 7 d’october. Il medem mument stuain nus er ans dumandar: co è quai da viver sin ina surfatscha ch’è uschè gronda sco la mesadad dal chantun da Glaruna?» Ella fa ina pitschna pausa e lascha far effect ils patratgs tar il public. «Cun polarisar situaziuns», accentuescha ella, «prendain nus la dignitad umana da tuttas duas varts.» Per impedir quai lavura Susanne Brunner mintgamai cun differents umans al lieu. «Mintga uman ha puncts tschorvs», di ella. «Mia incumbensa sco schurnalista è perquai adina da discurrer cun tuttas duas varts.»

Il dialog cun il public sco schanza

Philipp Cueni vesa la gronda valur da «Medias en il dialog» gist en il titel da la retscha d’occurrenzas: en il dialog tranter las medias ed il public. A la fin dal discurs ha il public perquai adina sez la pussaivladad da far dumondas.

«Pli baud eran ils umans anc main critics envers las instanzas, er envers las medias», observa Cueni. «Oz èn els pli sceptics. Els vulan savair precis tge che constat.» Quai saja er ina reacziun sin l’internet cun ses tempo enorm e la gronda quantitad da novitads ch’il public normal po strusch pli metter en in context e verifitgar sia vardaivladad. Quai haja per consequenza che la glieud vegnia malsegira e disfidanta, manegia Cueni. Quai saja però er ina schanza. «Il nov schurnalissem sto raquintar sin in metanivel co ch’el lavura», declera el. «Schurnalissem da qualitad duai prender serius ed integrar in public critic. La sfida è: tge pudain nus far sco medias per che la glieud veglia sa fatschentia a moda pli approfundada cun la rapportaziun?»

«Vesair las schurnalistas ed ils schurnalists live creescha ina pli gronda vischinanza.»

La sala plaina a Basilea mussa: il public giavischa il dialog. Susan Lüthi, manadra da la furmaziun politica a la Scol’auta populara da tuts dus Basileas e cunorganisatura da «Medias en il dialog», di: «Grazia a quest’occurrenza vesa la glieud tge che la SRG SSR fa tut.» I saja impurtant surtut en vista a l’iniziativa «200 francs bastan» da chapir las prestaziuns dal schurnalissem e da pudair classifitgar quellas.

Dus umens che sesan quella saira en il public din che l’occurrenza saja in «regal». In dad els ha 88 onns. Il giavisch da sa confruntar cun quai che capita en il mund na sa sminueschia betg cun la vegliadetgna, di el. «Vesair ed udir umans, dals quals jau enconusch la vusch mo dal radio, creescha vischinanza», di la visitadra Brigitte Bruderer. «Sche jau ves Susanne Brunner live, na vegni gnanc endament a mai da dubitar da sias abilitads. La saira ha anc suttastritgà sia autenticitad e professiunalitad.»

L’occurrenza «Medias en il dialog» cuntinuescha il 2025. La gronda popularitad dal format è in pitschen success per Philipp Cueni ed il team d’organisaziun. Tuttina na considerescha el la lavur anc betg sco terminada: «Las chasas da medias ston entrar pli fitg en in dialog cun lur public», di el. «Era la SRG SSR duess empruvar ora anc bleras autras furmas per promover il barat cun ses public. Quai è ina sfida – fa la lavur schurnalistica dentant anc pli interessanta.»

Noemi Harnickell, zercladur 2024