La seria «Winter Palace» stimulescha l'economia vallesana

«Winter Palace» è l’emprima coproducziun svizra cun Netflix. La seria da RTS è vegnida realisada da las firmas da producziun Point Prod ed Oble e vegn emessa a partir dals 26 da december. Gia uss èsi cler: quai che reguarda la creaziun da valur economica en il Vallais è il project cinematografic stà pli che profitabel.

Passa 100 statist:as, 12 000 tocs da costums – questas cifras mussan fitg bain: «Winter Palace» è in’enorma chista. La nova seria na dastgass betg mo legrar il public da televisiun, mabain era l’economia dal chantun Vallais e dal Vad. La realisaziun da la seria dad otg parts ha generà tenor il manader da producziun Xavier Derigo bunamain 15 000 pernottaziuns. Ultra da quai ha ella stimulà l’economia cun las visitas en las ustarias u cun las incumbensas surdadas a spezialist:as local:as. La plivalur per la societad, creada cun l’emprima coproducziun svizra cun Netflix, va surpassa dentant sur questa creaziun da valur economica ora: projects audiovisuals sco «Winter Palace» carmalan turist:as en la regiun, sveglian l’interess per professiuns cinematograficas e rendan visibla l’ierta culturala.

 Mintga franc generescha ina plivalur da set francs

L’idea per «Winter Palace» ha gì Jean-Marc Fröhle dal studio Point Prod gia il 2016. El ha dumandà la scenarista Lindsay Shapero ed il scenarist Stéphane Mitchell d’elavurar ils texts. RTS e la firma da producziun Oble han era vulì far part da l’aventura, e la finala è er anc Netflix vegnì a bord. Las lavurs da film per il drama istoric che raquinta da las entschattas dal turissem d’enviern da luxus, han cumenzà il 2023 cun reconstruir l’intern d’in palazi sur Montreux.

Plaunsieu cumenzian las autoritads e la politica a chapir ch’i possia esser attractiv per l’economia regiunala da sustegnair la lavur cinematografica, di il manader da producziun Xavier Derigo: «En Svizra sa mussia ina midada da mentalitad.» Entant ch’ils meds per promover il sectur audiovisual vegnivan fin dacurt unicamain da la promoziun da la cultura, vegnian quels en il fratemp era da la promoziun da l’economia.

In exempel: Avant trais onns è vegnida fundada la «Valais Film Commission». Ella è suttamessa als departaments responsabels per la cultura e l’economia dal chantun Vallais e lavura cun in sistem da stimuls per cineastas e cineasts: Tgi che fa in film en il Vallais survegn ina recumpensa per las expensas. Tristan Albrecht è il directur da la cumissiun. El di che la cinematografia saja «in’economia creativa en il vair senn dal pled – cun ina rendita incumparabla sin las investiziuns». Quai sa mussa er en l’emprim rapport d’activitad da l’organisaziun da promoziun: Là pon ins leger che mintga franc investì ha generà bunamain set francs a l’economia vallesana.

Sco il manader da producziun Xavier Derigo ha era Tristan Albrecht constatà che la politica ha scuvert il potenzial economic dal sectur audiovisual: «Las politicras ed ils politichers mussan interess da crear novas structuras, sco endrizzar in studio da film. Ins s’interessa pli fitg per il turissem da film e co ch’ins po gestiunar bain dumbers da visitadras e visitaders pli gronds», di el. Uschia ha la «Valais Film Commission» in budget da trais milliuns francs per ils proxims quatter onns che po vegnir utilisà per sustegnair la lavur cinematografica e per la furmaziun en quest sectur.

Producziuns grondas: impussiblas senza RTS e la SRG SSR

La producziun da «Winter Palace» n’è betg mo stada gronda, mabain era chara. Senza l’engaschi da RTS e da la SRG SSR na fissi mai stà pussaivel da realisar ina seria sco quella, declera Patrick Suhner, producent redacziunal da RTS. L’interpresa da radiotelevisiun possia sustegnair normalmain duas u schizunt trais serias ad onn cun mintgamai quatter milliuns francs. En «Winter Palace» ha RTS investì set milliuns francs. Ils meds finanzials supplementars han pudì vegnir mess a disposiziun grazia ad in fond da la SRG SSR per talas producziuns. Ma era set milliuns francs na tanschan betg per ina producziun da questa dimensiun, perquai han ins tschertgà la collavuraziun cun Netflix. «Ina sfida sumeglianta ha gì da superar SRF per realisar la seria Davos 1917. Talas producziuns èn charas e na pon betg vegnir finanziadas senza in ferm partenari internaziunal», declera Patrick Suhner. Grazia a la nova lescha da film «Lex Netflix» che oblighescha las plattafurmas da streaming d’impunder quatter pertschient da lur entradas bruttas generadas en Svizra per sustegnair il sectur da film, èsi stà pussaivel da cuvrir l’entir budget per «Winter Palace» e garantir ina transmissiun internaziunala. Suenter che la seria è vegnida emessa durant set emnas exclusivamain sin RTS, vegn ella ad esser visibla sur Netflix en Germania, Spagna, Frantscha, l’Italia e la Svizra.

Malgrà la midada da mentalitad positiva per l’industria da film: la situaziun restia intscherta e vegnia messa en dumonda regularmain da la politica, di David Rihs. Igl haja duvrà 15 onns investiziuns per vegnir al punct ch’ins è oz. «Nus vesain il mument in svilup positiv. Ussa stuain nus guardar ch’i giaja vinavant uschia!»

Malgrà la midada da mentalitad positiva per l’industria da film: la situaziun restia intscherta e vegnia messa en dumonda regularmain da la politica, di David Rihs. Igl haja duvrà 15 onns investiziuns per vegnir al punct ch’ins è oz. «Nus vesain il mument in svilup positiv. Ussa stuain nus guardar ch’i giaja vinavant uschia!»

L’emissiun «Winter Palace» vegn transmessa a la televisiun a partir dals 26 da december. Gia 24 uras pli baud pon ins guardar la seria sin Play Suisse.

Lucie Donzé, november 2024